ଆନନ୍ଦପୁର,୩ା୩(ସୁଶାନ୍ତ କୁମାର ସାହୁ/ ଉମେଶ ଚନ୍ଦ୍ର ପାଢ଼ୀ): ଢେଙ୍କାନାଳ ଜିଲା କପିଳାସ ଜଙ୍ଗଲରୁ ଆସିଥିବା ଏକ ଗୋଠଛଡ଼ା ଦନ୍ତା ଆନନ୍ଦପୁର ଉପଖଣ୍ତରେ ଉତ୍ପାତ ମଚାଇଛି। ରବିବାର ରାତିରେ ବେଲବାହାଳି ଓ ହରିଡ଼ାପାଳ ପଞ୍ଚାୟତ ଅଧୀନ ବିଭିନ୍ନ ଗ୍ରାମକୁ ଗୋଠ ଛଡ଼ା ଦନ୍ତା ପଶିଥିଲା। ଫଳରେ ଅଞ୍ଚଳବାସୀଙ୍କ ମନରେ ଭୟର ବାତାବରଣ ସୃଷ୍ଟି ହୋଇଥିଲା। ବନ ବିଭାଗ ଉଦ୍ୟମରେ ହାତୀକୁ ହଦଗଡ଼ ଅଭୟାରଣ୍ୟରେ ଛଡ଼ାଯାଇଥିବା ଜଣାପଡ଼ିଛି।
ସୂଚନା ଅନୁଯାୟୀ, ଦନ୍ତା ରବିବାର ଗଡ଼ବାନ୍ଧଗୋଡା, ଭଣ୍ଡାରିପଡା ଦେଇ ମେଘନାଦପୋଇ ଜଙ୍ଗଲରେ ଦିନ ତମାମ ରହି ସାରେ ଗତିପଥ ବଦଳାଇ ରାତିରେ ସାଇଁକୁଳ ସିଆପଡ଼ା ଦେଇ ଟୋଲଙ୍କପଡା ଗ୍ରାମକୁ ପ୍ରବେଶ କରିଥିଲା।
ଆନନ୍ଦପୁର ବନବିଭାଗ ପକ୍ଷରୁ ସୂଚନା ପାଇ ଗ୍ରାମବାସୀ ମସାଲ ଜଳାଇ ହାତୀ ଘଉଡ଼ାଇବାକୁ ଉଦ୍ୟମ କରିଥିଲେ। ଦିନରେ ଅଳତୀ, ଗଡ଼ବାନ୍ଧଗୋଡା, ପୁରୁଣା ବାନ୍ଧଗୋଡା, ଗଁପୁର ଅଞ୍ଚଳକୁ ପ୍ରବେଶ କରିଥିବା ବେଳେ ରାତିରେ ସାଇଁକୁଳ, ସିଆପଡ଼ା ଟୋଲଙ୍କପଡା, ପୁରୁଣିଆ ଦେଇ ଯାଇଥିବା ସୂଚନା ମିଳିଛି।
ଏନେଇ ୨୦ରୁ ଊର୍ଦ୍ଧ୍ୱ ଗ୍ରାମରେ ବିଦ୍ୟୁତ୍ ସରବରାହ ବିଚ୍ଛିନ୍ନ କରାଯାଇଥିଲା। ଦନ୍ତା ସୋମବାର ଭୋରରେ ଆନନ୍ଦପୁର ଭଦ୍ରକ ୫୩ ନମ୍ବର ରାଜ୍ୟ ରାଜପଥ ଦେଇ ଫକୀରପୁର, ଶାଳବଣୀ, ତରତରା ଛକଠାରୁ ଚକ୍ରତୀର୍ଥ ରାସ୍ତାରେ ଯାଇ କାଠକଟା ଶିଆପଡ଼ା ନିକଟ ହଦଗଡ଼ ଜଙ୍ଗଲକୁ ପଳାଇଥିଲା।
ଆନନ୍ଦପୁର ଡିଏଫ୍ ଅଭୟ କୁମାର ଦଳେଇଙ୍କ ନିର୍ଦ୍ଧେଶକ୍ରମେ ଏସିଏଫ ଅଶୋକ ବିଶ୍ୱାଳଙ୍କ ସହ ବନ ବିଭାଗର ଉଚ୍ଚ ପଦାଧିକାରୀ ଓ ୧୦୦ରୁ ଊର୍ଦ୍ଧ୍ୱ ବନ କର୍ମଚାରୀ ହାତୀର ଗତିବିଧି ଉପରେ ନଜର ରଖିଥିଲେ। ଜନସାଧାରଣଙ୍କ ସହଯୋଗ ଏବଂ ବନବିଭାଗ କର୍ମଚାରୀଙ୍କ ଅକ୍ଲାନ୍ତ ପରିଶ୍ରମ ଯୋଗୁ ବିନା କ୍ଷୟକ୍ଷତି ଏବଂ ଧନ ଜୀବନ ହାନୀରେ ହାତୀ ଗନ୍ତବ୍ୟସ୍ଥଳରେ ପହଞ୍ଚି ଥିବା ବନ ବିଭାଗ ପକ୍ଷରୁ କୁହାଯାଇଛି।
