ଭୁବନେଶ୍ବର,୧୮।୨: ରାଜ୍ୟରେ ବିକ୍ରି ହେଉଛି ନିମ୍ନ ମାନର ଦୁଗ୍ଧ ଓ ଦୁଗ୍ଧଜାତ ଦ୍ରବ୍ୟ। ଏନେଇ ବୁଧବାର ବିଧାନସଭାରେ ଗୁରୁତ୍ୱପୂର୍ଣ୍ଣ ତଥ୍ୟ ରଖିଛନ୍ତି ମତ୍ସ୍ୟ ଓ ପ୍ରାଣୀ ସମ୍ପଦ ବିକାଶ ମନ୍ତ୍ରୀ ଗୋକୁଳାନନ୍ଦ ମଲ୍ଲିକ। ପରୀକ୍ଷା କରାଯାଇଥିବା ମୋଟ ୮୮ଟି ନମୁନା ମଧ୍ୟରୁ ୮ଟି ନମୁନା ନିମ୍ନମାନର ବୋଲି ଜଣାପଡ଼ିଛି।
୨୦୨୫ ମସିହା ମଧ୍ୟରେ ଭୁବନେଶ୍ୱରସ୍ଥିତ ରାଜ୍ୟ ଖାଦ୍ୟ ପରୀକ୍ଷାଗାରରେ ୮୮ଟି ନମୁନା ଯାଞ୍ଚ କରାଯାଇଥିଲା। ସେଥିମଧ୍ୟରୁ ୮୦ଟି ନମୁନା ନିର୍ଦ୍ଧାରିତ ମାନଦଣ୍ଡ ଅନୁଯାୟୀ ଠିକ୍ ଥିବାବେଳେ ୮ଟି ନମୁନା ନିମ୍ନମାନର ବୋଲି ଚିହ୍ନଟ ହୋଇଛି। ତେବେ ସନ୍ତୋଷଜନକ ବିଷୟ ହେଉଛି ଯେ, କୌଣସି ବି ନମୁନା ‘ଅସୁରକ୍ଷିତ’ କିମ୍ବା ‘ନକଲି ବ୍ରାଣ୍ଡ’ ବୋଲି ମିଳିନାହିଁ।
ଓମଫେଡ୍ (OMFED) ବ୍ୟତୀତ ରାଜ୍ୟରେ ଅନ୍ୟ ୨୨ଟି କମ୍ପାନୀ ଦୁଗ୍ଧ ବ୍ୟବସାୟରେ ନିୟୋଜିତ ଅଛନ୍ତି। ସେଥିମଧ୍ୟରୁ ୧୦ଟି ଓଡ଼ିଶାର ଏବଂ ୧୨ଟି ରାଜ୍ୟ ବାହାରର କମ୍ପାନୀ।
ବିଧାୟକ ଟଙ୍କଧର ତ୍ରିପାଠୀଙ୍କ ଏକ ପ୍ରଶ୍ନର ଉତ୍ତର ଦେଇ ମନ୍ତ୍ରୀ କହିଛନ୍ତି ଯେ, ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ ଅଧୀନରେ ଥିବା ଖାଦ୍ୟ ସୁରକ୍ଷା କମିଶନରେଟ୍ ଦ୍ୱାରା ଏହି ସମସ୍ତ ନମୁନା ସଂଗ୍ରହ ଓ ପରୀକ୍ଷଣ କରାଯାଉଛି। ଖାଦ୍ୟ ସୁରକ୍ଷା ନିୟମ ଅନୁସାରେ ସମସ୍ତ କମ୍ପାନୀ କାର୍ଯ୍ୟ କରୁଛନ୍ତି କି ନାହିଁ, ତାହା ଉପରେ କଡ଼ା ନଜର ରଖାଯାଇଛି।
