ବରଗଡ଼ ଅଫିସ,୨୬ା୧୦: ହସ୍ତତନ୍ତ ଓ ବୟନ ଶିଳ୍ପ ମନ୍ତ୍ରୀ ରୀତା ସାହୁ ବୁଧବାର ବରଗଡ଼ ଜିଲା ପାଇକମାଳ ଗସ୍ତରେ ଯାଇଥିବାବେଳେ ତାଙ୍କ ଗାଡ଼ି ଉପରକୁ ଅଣ୍ଡାମାଡ଼ ହେବା ଘଟଣା ଚର୍ଚ୍ଚାର ବିଷୟ ହୋଇଛି। ପୋଲିସ ଏହି ଘଟଣାରେ ୬ଜଣଙ୍କୁ ଅଟକ ରଖିଛି। ତେବେ ଏ ସମ୍ପର୍କରେ ପଦ୍ମପୁର ଏସ୍ଡିପିଓ ବିଭୂତି ଭୂଷଣ ଭୋଇଙ୍କୁ ପଚାରିବାରୁ, ମନ୍ତ୍ରୀ ସାହୁଙ୍କ ଗାଡ଼ି ଉପରକୁ ଅଣ୍ଡାମାଡ଼ କରିବାକୁ ଚେଷ୍ଟା କରୁଥିବାବେଳେ ୬ ଜଣ ଭାଜପା କାର୍ଯ୍ୟକର୍ତ୍ତାଙ୍କୁ ପୋଲିସ କାବୁ କରି ନେଇଛି ଏବଂ ସେମାନଙ୍କ ବିରୋଧରେ ଏକ ମାମଲା ରୁଜୁ କରି ଅଧିକ ତଦନ୍ତ ଚଳାଇଛି ବୋଲି କହିଛନ୍ତି।
ପ୍ରକାଶ ଯେ, ଆଜି ପୂର୍ବାହ୍ନରେ ମନ୍ତ୍ରୀ ରୀତା ସାହୁ ପାଇକମାଳ ବ୍ଲକ ଅନ୍ତର୍ଗତ ଯମୁନା କନ୍ଧୁଣୀ ସ୍କୁଲରେ ସ୍କୁଲ ରୂପାନ୍ତରୀକରଣ କାର୍ଯ୍ୟକ୍ରମର ଭିତ୍ତିପ୍ରସ୍ତର ସ୍ଥାପନ କରିଥିଲେ। ସେହି କାର୍ଯ୍ୟକ୍ରମ ସାରି ସେ ପାଇକମାଳ ତହସିଲ ଅଫିସ ନିକଟ ସରକାରୀ ହାଇସ୍କୁଲରେ ହେବାକୁ ଥିବା ରୂପାନ୍ତରୀକରଣ କାର୍ଯ୍ୟର ଭିତ୍ତିପ୍ରସ୍ତର ସ୍ଥାପନ କରିବାକୁ ଆସୁଥିଲେ। ଏହି ସମୟରେ ପାଇକମାଳ ତହସିଲ ଅଫିସ ଛକ ନିକଟରେ ରହିଥିବା କିଛି ଲୋକେ ରାସ୍ତା ଉପରକୁ ଆସି କଳାପତାକା ଦେଖାଇବା ସହିତ ମନ୍ତ୍ରୀଙ୍କ ଗାଡ଼ି ଉପରକୁ ଅଣ୍ଡାମାଡ଼ କରିଥିଲେ। ପୋଲିସ ସେମାନଙ୍କ ମଧ୍ୟରୁ ୬ ଜଣଙ୍କୁ ଧରିଥିବାବେଳେ ଅନ୍ୟମାନେ ସେଠାରୁ ଖସି ଯାଇଥିଲେ। ତେବେ ଏ ସମ୍ପର୍କରେ ଭାଜପା ନେତା ତଥା ପୂର୍ବତନ ବିଧାୟକ ପ୍ରଦୀପ ପୁରୋହିତ କହିଛନ୍ତି, ପଦ୍ମପୁର ଉପଖଣ୍ଡବାସୀ ଚିର ଅବହେଳିତ ହୋଇ ରହିଛନ୍ତି । ରାଜ୍ୟ ସରକାର ସାମଗ୍ରିକ ବିକାଶର ନାରା ଦେଉଛନ୍ତି କିନ୍ତୁ ଏ ଅଞ୍ଚଳବାସୀ ସର୍ବନିମ୍ନ ମୌଳିକ ସୁବିଧା ସୁଯୋଗରୁ ବଞ୍ଚିତ ଅଛନ୍ତି। ଏହା ସତ୍ତ୍ୱେ ମନ୍ତ୍ରୀ ତ ଦୂରର କଥା, ବିଧାୟକ ବି ଲୋକଙ୍କ ପାଖକୁ ଆସୁ ନ ଥିଲେ। ଅଣ୍ଡାମାଡ଼ ଜନ ପ୍ରତିକ୍ରିୟାର ଏକ ପ୍ରତିଫଳନ ବୋଲି ପୂର୍ବତନ ବିଧାୟକ ପୁରୋହିତ କହିଛନ୍ତି।
