ଭଞ୍ଜନଗର,୮ା୮(ବାବୁଲା ପ୍ରଧାନ): ରାଜ୍ୟରେ ପ୍ରଥମଥର ପାଇଁ ଗଞ୍ଜାମ ଜିଲା ପୋଲସରା ବ୍ଲକ ଅନ୍ତର୍ଗତ ଡିମିରିଆଠାରେ ଏକ ଟ୍ରାକ୍ଟର ଚାଳିତ ଧାନ ଜମି ହୁଡ଼ା ତିଆରି କରିବା ଯନ୍ତ୍ରର କ୍ଷେତ୍ର ପ୍ରଦର୍ଶନ ଆୟୋଜନ କରାଯାଇଥିଲା। ବ୍ରହ୍ମପୁର ନିକଟସ୍ଥ ଗୋଷାଣୀ ନୂଆଗାଁ ଥରେ ପ୍ରତିଷ୍ଠିତ ସିଟ ପ୍ରୋଫାଇଲ କମ୍ପାନୀ ତରଫରୁ ଏହି ପ୍ରକାରର ଅତ୍ୟାଧୁନିକ କୃଷିଯନ୍ତ୍ରକୁ ଆମ ରାଜ୍ୟରେ ଲୋକପ୍ରିୟ କରାଇବା ପାଇଁ ପ୍ରଚେଷ୍ଟା କରାଯାଇଛି। ସାଧାରଣତଃ ରୁଆ ଧାନଚାଷରେ ଜମି କାଦୁଅ କରିବା ସମୟରେ ଜମିର ହୁଡ଼ାଗୁଡ଼ିକୁ କତି କରାଯାଇଥାଏ ଅର୍ଥାତ ଜମିର ହୁଡ଼ା ବା ବନ୍ଧଗୁଡ଼ିକୁ ସୁଦୃଢ଼ କରାଯାଏ। ଯାହାଦ୍ୱାରା ଜମିରେ ପାଣି ଅଧିକ ସମୟ ରହିପାରେ। ଜମିର ଆକାର ସ୍ପଷ୍ଟ ହୋଇଥାଏ ଓ ହୁଡ଼ା ଉପରେ ଚଳ ପ୍ରଚଳ ମଧ୍ୟ ସହଜ ହୁଏ। ଏତ୍ଦ ବ୍ୟତୀତ ଜମିର ହୁଡ଼ା ମଧ୍ୟରେ ଥିବା ଅନିଷ୍ଟକାରୀ ପୋକ, ଅନାବନା ଘାସ ଇତ୍ୟାଦି ମଧ୍ୟ ନଷ୍ଟ ହୋଇଯାଏ ଓ ମାଟିରେ ଥିବା ଖାଦ୍ୟ ସାରର ଉପଯୁକ୍ତ ବିନିଯୋଗ ସମ୍ଭବ ହୋଇଥାଏ । ତେବେ ଏହି କାମ କରିବା ପାଇଁ ଅଧିକ ଖର୍ଚ୍ଚ, ସମୟ, ପରିଶ୍ରମ ଓ ଲୋକ ବଳର ଆବଶ୍ୟକତା ପଡ଼ିଥାଏ ଯାହା ସବୁବେଳେ ସମ୍ଭବ ହୋଇ ନ ଥାଏ। ଫଳରେ ଫସଲ ଉତ୍ପାଦନରେ ହ୍ରାସ ହୋଇଥାଏ। ଟ୍ରାକ୍ଟର ଚାଳିତ ଧାନ ଜମି ହୁଡ଼ା ତିଆରି କରିବା ଯନ୍ତ୍ରର ବ୍ୟବହାର ଦ୍ୱାରା ଏହିକାର୍ଯ୍ୟ ଅତି ସୁରୁଖୁରୁରେ ସମ୍ପନ୍ନ ହୋଇଥାଏ। ଏହି କ୍ଷେତ୍ର ପ୍ରଦର୍ଶନ କାର୍ଯ୍ୟକ୍ରମରେ ଇକରିସାଟ ସଂସ୍ଥାର କୃଷି ଯାନ୍ତ୍ରିକରଣ ପରାମର୍ଶଦାତା ଡଃ ସଂଗ୍ରାମ କେଶରୀ ସ୍ବାଇଁ ଯୋଗଦେଇ ଯନ୍ତ୍ରର କାର୍ଯ୍ୟ ପ୍ରଣାଳୀ ଓ ଦକ୍ଷତା ବିଷୟରେ ଆଲୋକପାତ କରିଥିଲେ। ଏହି ଯନ୍ତ୍ରରେ ଏକ ସମୟରେ ହୁଡ଼ା ପାଖରୁ ମାଟି କାଟି ହୁଡ଼ା ଉପରେ ଓ ହୁଡ଼ା ଭିତର ପାଖରେ ଲେସି ଦିଆଯାଏ ଓ ଘଣ୍ଟା ପ୍ରତି ପ୍ରାୟ ୧୦୦୦ ମିଟର ବନ୍ଧ କାମ କରାଯାଇପାରେ I ଅଳ୍ପ ସମୟ ମଧ୍ୟରେ ଏହି କାର୍ଯ୍ୟ କରାଯିବା ହେତୁ ଚାଷ କାମ ସଠିକ ସମୟରେ ଆଗେଇ ଚାଲେ ବୋଲି ସ୍ବାଇଁ କହିଛନ୍ତି। ସିଟ୍ ପ୍ରୋଫାଇଲ କମ୍ପାନୀର ମୁଖ୍ୟ ପ୍ରଭାତ ରଞ୍ଜନ ସାହୁ ଏହି ଯନ୍ତ୍ରକୁ ନିକଟ ଭବିଷ୍ୟତରେ ସରକାରୀ ରିହାତି ସହ ଆମ ରାଜ୍ୟର ଚାଷୀମାନଙ୍କ ପାଖରେ ପହଞ୍ଚେଇବାର ପ୍ରଚେଷ୍ଟା କରୁଛନ୍ତି ବୋଲି ପ୍ରକାଶ କରିଥିଲେ I ବର୍ତ୍ତମାନ ଚାଷ କାମ ପାଇଁ ଆବଶ୍ୟକ ଅନୁଯାଇ ଲୋକ ବଳର ଅଭାବ ଓ ବର୍ଦ୍ଧିତ ମଜୁରି ହାରକୁ ଦୃଷ୍ଟିରେ ରଖି ଏହିପରି ଉନ୍ନତ କୃଷି ଯନ୍ତ୍ରପାତିର ବ୍ୟବହାର ଏକାନ୍ତ ଅପରିହାର୍ଯ୍ୟ ହୋଇପଡିଛି ବୋଲି ସାହୁ ମତ ରଖିଥିଲେ। ଏହି କ୍ଷେତ୍ର ପ୍ରଦର୍ଶନରେ ଆଖପାଖ ଅଞ୍ଚଳରୁ ଶତାଧିକ ଅଗ୍ରଣୀ ଚାଷୀ, ସହକାରୀ ନିର୍ବାହୀ ଯନ୍ତ୍ରୀ ଇଂ ପ୍ରମିତ କୁମାର ସାହୁ, କୃଷି ବିଭାଗର ପଦସ୍ଥ ଅଫିସର, ସହକୀରୀ କୃଷି ଅଧିକାରୀ କୁମାରୀ ରାଜଲକ୍ଷ୍ମୀ ପାଢ଼ୀ, ବେସରକାରୀ ସଂସ୍ଥାର କର୍ମକର୍ତ୍ତାଗଣ ଇତ୍ୟାଦି ଯୋଗଦେଇ ସନ୍ତୋଷ ପ୍ରକାଶ କରିଥିଲେ। ଏହି କାର୍ଯ୍ୟକ୍ରମରେ ଭଞ୍ଜନଗର କୃଷି ବିଜ୍ଞାନ କେନ୍ଦ୍ର ଗଞ୍ଜାମ ୧ ଏବଂ ଗଞ୍ଜାମ ୨ର ବୈଜ୍ଞାନିକମାନେ ଯୋଗଦେଇ ଧାନଚାଷରେ କମ୍ ଖର୍ଚ୍ଚ କରି, କମ୍ ସମୟରେ କମ୍ ପରିଶ୍ରମରେ ଉନ୍ନତମାନର ଜମିର ହୁଡ଼ା ତିଆରି କରିବା ଦ୍ବାରା ଚାଷୀମାନଙ୍କର ଉତ୍ପାଦନ ବୃଦ୍ଧି ପାଇବା ସହ ବିଶେଷ ଭାବରେ ଲାଭାଂଶରେ ଉନ୍ନତି ଆସିପାରିବ ବୋଲି ମତବ୍ୟକ୍ତ କରିଥିଲେ।
