ଆବୁଧାବି, ୮।୧୦: ଆଇପିଏଲ୍ ତ୍ରୟୋଦଶ ସଂସ୍କରଣ ୨୧ତମ ମୁକାବିଲାରେ ବୁଧବାର କୋଲକାତା ନାଇଟ୍ ରାଇଡର୍ସ ୧୦ ରନରେ ଚେନ୍ନାଇ ସୁପର୍ କିଙ୍ଗ୍ସକୁ ପରାସ୍ତ କରିଛି। ଏହି ମ୍ୟାଚ୍ରେ ପ୍ରଥମେ ବ୍ୟାଟିଂ କରି କୋଲକାତା ରାହୁଲ ତ୍ରିପାଠୀ (୮୧ ରନ)ଙ୍କ ଅର୍ଦ୍ଧଶତକ ବଳରେ ୧୬୭ ରନରେ ଅଲ୍ଆଉଟ୍ ହୋଇଯାଇଥିଲା। ଜବାବରେ ମହେନ୍ଦ୍ର ସିଂ ଧୋନୀଙ୍କ ନେତୃତ୍ୱାଧୀନ ଚେନ୍ନାଇ ୧୫୭/୫ ସ୍କୋରରେ ଅଟକି ଯାଇଥିଲା। ଏହି ମ୍ୟାଚ୍ରେ ଚେନ୍ନାଇ ପରାସ୍ତ ହୋଇଥିଲେ ମଧ୍ୟ ଦଳର ଷ୍ଟାର୍ ଅଲ୍ରାଉଣ୍ଡର ଡ୍ବେନ ବ୍ରାଭୋ ଆଇପିଏଲ୍ରେ ଏକ ସ୍ବତନ୍ତ୍ର କ୍ଲବରେ ସାମିଲ ହୋଇଛନ୍ତି। ବ୍ରାଭୋ ଏହି ମ୍ୟାଚ୍ରେ ୩ ଉଇକେଟ୍ ନେଇଥିଲେ। ଏଥିସହ ଆଇପିଏଲ୍ରେ ତାଙ୍କ ମୋଟ୍ ଉଇକେଟ୍ ସଂଖ୍ୟା ୧୫୦ ଛୁଇଁଛି। କୋଲକାତାର ଶିଭମ ମାଭିଙ୍କୁ ଆଉଟ୍ କରି ସେ ଆଇପିଏଲ୍ରେ ନିଜର ଦେଢ଼ଶହ ଉଇକେଟ୍ ପୂରଣ କରିଥିଲେ। ଏହି ସଫଳତା ପାଇବାରେ ସେ ଲିଗ୍ର ୫ମ ବୋଲର ହୋଇଛନ୍ତି। ବ୍ରାଭୋଙ୍କ ପୂର୍ବରୁ ଲସିଥ୍ ମାଲିଙ୍ଗା (୧୭୦ ଉଇକେଟ୍), ଅମିତ୍ ମିଶ୍ରା (୧୬୦), ପିୟୂଷ ଚାଓ୍ବଲା (୧୫୬) ଓ ହରଭଜନ ସିଂ (୧୫୦) ଏହି କ୍ଲବରେ ସାମିଲ ହୋଇସାରିଛନ୍ତି।
