ଆନନ୍ଦପୁର,୧୪।୧୧(ସ୍ବ.ପ୍ର.): କେନ୍ଦୁଝର ଜିଲା ଆନନ୍ଦପୁର ପୌରପରିଷଦର ୧୩ ନଂ. ଓ ୧୪ ନଂ. ଓ୍ବାର୍ଡକୁ ସଂଲଗ୍ନ ଭିଆଇପି ରୋଡ୍ ଧୂଳିମୟ ହୋଇପଡ଼ିଛି। ଯାନବାହନ ଯାତାୟାତ ସମୟରେ ଅପ୍ରୀତିକର ପରିସ୍ଥିତି ସୃଷ୍ଟି ହେଉଛି। ଭାରିଯାନ ଯାତାୟାତ ସମୟରେ ସମ୍ପୃକ୍ତ ରାସ୍ତାଟିରେ ଧୂଳି ଓ ଧୂଆଁରେ ସାଧାରଣ ଲୋକ ଅତିଷ୍ଠ ହେଉଛନ୍ତି।
ସୂଚନାଯୋଗ୍ୟ, ବୈତରଣୀ ନଦୀବନ୍ଧ ପଥର ପ୍ୟାକିଂ ନିର୍ମାଣ କାର୍ଯ୍ୟ ଚାଲିଛି। କାମରେ ନିୟୋଜିତ ହାଇଓ୍ବା ଚକାରେ ବର୍ଷା ସମୟରେ କାଦୁଆ ଆସି ରୋଡରେ ପଡ଼ିଥିଲା। ଏବେ ପାଗ ଶୁଖିଲା ରହିଥିବାରୁ ରାସ୍ତାରେ ଲାଗି ରହିଥିବା କାଦୁଆ ସବୁ ଧୂଳିରେ ପରିଣତ ହୋଇଛି। ଘଟଣା ଦିଗରେ ଦୃଷ୍ଟି ଦେଇ ପୌର ପ୍ରଶାସନ ଆବଶ୍ୟକ ପଦକ୍ଷେପ ଗ୍ରହଣ କରିବାକୁ ସାଧାରଣରେ ଦାବି ହୋଇଛି। ସେହିଭଳି ଦୁଇ ଦିନ ହେଲା ଶାଲପଡ଼ା ବାଇପାସ୍ରୁ ଡାକ୍ତରଖାନା ଅଭିମୁଖେ ଆସିଥିବା ସର୍ଭିସ୍ ରୋଡ ପାର୍ଶ୍ୱରେ ପାଣି ପାଇପ୍ ବିଛା କାର୍ଯ୍ୟ ଚାଲୁଥିବାରୁ ରୋଡ୍ଗୁଡ଼ିକ କାଦୁଅରେ ପରିଣତ ହୋଇଛି। ଠିକା ସଂସ୍ଥାଗୁଡ଼ିକର ବେପରୁଆ ମନୋଭାବ ପାଇଁ ଏଭଳି ପରିସ୍ଥିତି ସୃଷ୍ଟି ହୋଇଥିବା ଅଭିଯୋଗ ହେଉଛି। ଘଟଣା ଦିଗରେ ପ୍ରଶାସନିକ କର୍ତ୍ତୃପକ୍ଷ ଦୃଷ୍ଟି ଦେବାକୁ ସମାଜସେବୀ ବୁଲୁ ପଟ୍ଟନାୟକ ଦାବି କରିଛନ୍ତି।
