ଦୁବଇ,୨୧ ।୧୧: ଦୁବଇର ଶାସକ ଶେଖ ମହମ୍ମଦ ବିନ ରଶିଦ ଅଲ ମକତୁମଙ୍କ ରାଜକୁମାରୀ ପତ୍ନୀଙ୍କର ନିଜର ସୁରକ୍ଷାକର୍ମୀଙ୍କ ସହ ସମ୍ପର୍କ ରହିଥିବା କୁହାଯାଉଛି । ଏହାକୁ ନେଇ ରାଜକୁମାରୀ ହୟା ସୁରକ୍ଷାକର୍ମୀଙ୍କୁ ଏ ସମ୍ପର୍କରେ ମୁହଁ ନ ଖୋଲିବାକୁ କହି ୧୨ କୋଟି ଟଙ୍କା ଦେଇଥିବା କୁହାଯାଏ । ବ୍ରିଟେନ୍ କୋର୍ଟରେ ଚାଲିଥିବା ଏକ ଶୁଣାଣିରୁ ଏହା ଜଣାପଡିଥିବା ଡେଲି ମେଲରେ ପ୍ରକାଶ ପାଇଛି । ଦୁବଇ ଶାସକ ରାଜକୁମାରୀ ହୟାଙ୍କୁ ନ ଜଣାଇ ଶରିୟା ଆଇନ ଆଧାରରେ ଫେବୃୟାରୀ ୨୦୧୯ରେ ତଲାକ ଦେଇଥିଲେ । ରିପୋର୍ଟ ଅନୁଯାୟୀ, ରାଜକୁମାରୀଙ୍କ ବଡିଗାର୍ଡ ବିବାହ କରିଥିଲେ ହେଲେ ତାଙ୍କ ସହ ସମ୍ପର୍କ ପରେ ବଡିଗାର୍ଡଙ୍କ ବିବାହ ବିଚ୍ଛେଦ ହୋଇଥିଲା । ଏବେ ରାଜକୁମାରୀ ଦୁବଇ ଛାଡି ବହୁଦିନ ହେବ ବ୍ରିଟେନରେ ରହୁଛନ୍ତି । ପିଲାମାନଙ୍କ କଷ୍ଟଡିକୁ ନେଇ ରାଜକୁମାରୀ ବ୍ରିଟେନ ଅଦାଲତର ଦ୍ୱାରସ୍ଥ ହୋଇଥିବା ବେଳେ ମାମଲା ତାଙ୍କ ପକ୍ଷରେ ଆସିଛି । ରାଜକୁମାରୀ ତାଙ୍କ ବଡିଗାର୍ଡଙ୍କୁ ବହୁ ମୂଲ୍ୟବାନ୍ ଉପହାର ଦେଉଥିବା କୁହାଯାଏ । ଯେମିତିକି ୧୨ ଲକ୍ଷ ଟଙ୍କାର ଘଡି, ୫୦ ଲକ୍ଷ ଟଙ୍କାର ବନ୍ଧୁକ ଇତ୍ୟାଦି । ରାଜକୁମାରୀ ଦୁବଇ ଶାସକଙ୍କର ୬ ନମ୍ବର ପତ୍ନୀ ଥିବା ବେଳେ ସବୁଠାରୁ କମ୍ ବୟସର ବୋଲି କୁହାଯାଏ । ୨୦୧୬ରୁ ରାଜକୁମାରୀଙ୍କର ବଡିଗାର୍ଡଙ୍କ ସହ ସମ୍ପର୍କ ଥିବା ବେଳେ ଏବେବି ଏହା ରହି ଆସିଛି ।
