ଖଡ଼ିଆଳ,୮।୮(ଡି.ଏନ.ଏ.): ନୂଆପଡ଼ା ଜିଲାରେ ଚୋର ଆତଙ୍କ ବଢ଼ିବାରେ ଲାଗିଥିବାବେଳେ ବର୍ତ୍ତମାନ ଖଡ଼ିଆଳ ଅଞ୍ଚଳରେ ତାର ପ୍ରଭାବ ପଡିଛି। ଖଡ଼ିଆଳର ବିଭିନ୍ନ ଗ୍ରାମାଞ୍ଚଳରେ ଡ୍ରୋନ କ୍ୟାମେରା ଉଡୁଥିବା ନେଇ ଲୋକଙ୍କ ଭୟ ଦ୍ବିଗୁଣିତ ହୋଇଥିବା ଜଣାପଡିଛି। କିଛି ଦିନ ହେଲା ତୁକୁଲା, କିରିକିଟା, ନେହେନା, ସାନମହେଶ୍ବର ଏପରିକି ସମ୍ବେଦନଶୀଳ ସ୍ଥାନ ତିଖାଲି ଡ୍ୟାମ ପରିସରରେ ଡ୍ରୋନ କ୍ୟାମେରା ଉଡୁଥିବା ଫଟୋ ସ୍ଥାନୀୟ ଲୋକମାନେ ଉତ୍ତୋଳନ କରି ଦେଖାଉ ଥିବାବେଳେ ଖଡ଼ିଆଳ ପଞ୍ଚାୟତ ସମିତି ଉପାଧ୍ୟକ୍ଷ ଗୌତମ ତାଣ୍ଡିଙ୍କ ଉଦ୍ୟମରେ ଗୋଟିଏ ପ୍ରତିନିଧି ଦଳ ଆସି ଖଡ଼ିଆଳ ଥାନା ଅଧିକାରୀ ଅନିରୁଦ୍ଧ ମୁଦୁଲିଙ୍କୁ ଭେଟି ତାର ତଦନ୍ତ ପାଇଁ ଦାବି କରିଥିଲେ। ଫଳରେ ଜନସାଧାରଣ ଦିନରାତି ଭୟଭୀତ ଅବସ୍ଥାରେ ଥିବା ଜଣା ପଡ଼ିଛି। ଗ୍ରାମାଞ୍ଚଳରେ ଗ୍ରାମବାସୀ ଏକତ୍ରିତ ହୋଇ ସଚେତନତା ସୃଷ୍ଟି କରିବା ସହିତ କୌଣସି ଅଜଣା ବ୍ୟକ୍ତିଙ୍କୁ ଗ୍ରାମରେ ପ୍ରବେଶ ନିଷେଧ କରିବାକୁ ନିଷ୍ପତ୍ତି ନେଉଥିବା ଜଣାପଡିଛି। ନୂଆପଡ଼ା ଜିଲାର ପ୍ରମୁଖ ସହର ଖଡ଼ିଆଳ ଶିକ୍ଷା, ସ୍ବାସ୍ଥ୍ୟ ଓ ବ୍ୟବସାୟିକ ପ୍ରାଣ କେନ୍ଦ୍ର ହୋଇଥିବାରୁ ସବୁବେଳେ ଚଳଚଞ୍ଚଳ ରହୁଛି। ହେଲେ ଚୋର ଭୟ ନେଇ ଲୋକଙ୍କ ମଧ୍ୟରେ ସାସମୟରେ ଆତଙ୍କ ଖେଳିଯାଇଛି। ଅନ୍ୟ ପକ୍ଷରେ ଖଡ଼ିଆଳ ସହରକୁ ଅନ୍ୟ ରାଜ୍ୟରୁ ଅଣ ଓଡିଆ ବହୁତ ପରିମାଣରେ ଆସି ରହୁଛନ୍ତି। ହେଲେ ସେମାନଙ୍କ ବିଷୟରେ ପ୍ରଶାସନ ନିକଟରେ ତଥ୍ୟ ନାହିଁ। ସରକାରୀ ନିୟମ ଅନୁଯାୟୀ ବାହାର ରାଜ୍ୟରୁ ଆସି ଜଣେ ବ୍ୟକ୍ତି ବହୁତ ଦିନ ଧରି ରହୁଛି ତାହେଲେ ନିକଟସ୍ଥ ପ୍ରଶାସନ ପାଖରେ ତାର ସମ୍ପୂର୍ଣ୍ଣ ତଥ୍ୟ ରହିବା କଥା। ତାହା ସ୍ଥାନୀୟ ପ୍ରଶାସନ ନିକଟରେ ନିଟକରେ ନଥିବାରୁ ଜନସାଧାରଣରେ ଅସନ୍ତୋଷ ପ୍ରକାଶ ପାଇଛି। ଅଣ ଓଡିଆ ଆସି ଖଡ଼ିଆଳର ବିଭିନ୍ନ ଲଜ ତଥା ଅନେକ ଲୋକଙ୍କ ଘରେ ଭଡା ସୂତ୍ରରେ ରହୁଥିବା ବେଳେ ସମ୍ପୃକ୍ତ ଲଜ କିମ୍ବା ଘର ମାଲିକ ସେମାନଙ୍କ ଠାରେ ରହୁଥିବା ବ୍ୟକ୍ତିଙ୍କ ତଥ୍ୟ ପୋଲିସକୁ ତୁରନ୍ତ ଦେବାକୁ ଜନସାଧାରଣରେ ଦାବି କରିଛନ୍ତି। ଚୋରମାନେ ଦିନରେ ନାନାଦି ଧନ୍ଦା କରି ଗ୍ରାମ ଗ୍ରାମ ବୁଲି ତଥ୍ୟ ସଂଗ୍ରହ କରୁଥିବାବେଳେ ରାତ୍ରରେ ସେମାନେ ବିଭିନ୍ନ ପ୍ରକାର ମାରଣାସ୍ତ୍ର ଧରି ଚୋରି କାର୍ଯ୍ୟରେ ନିୟୋଜିତ ହେଉଥିବା ଜନସାଧାରଣରେ ଚର୍ଚ୍ଚା ହେଉଛି। ଏନେଇ ଖଡ଼ିଆଳ ଆଇଆଇସି ମୁଦୁଲିଙ୍କୁ ଅବଗତ କରିବାରୁ ଦୁଇ ତିନି ଦିନ ହେଲା ପୋଲିସ ପ୍ରଶାସନ ପକ୍ଷରୁ ବାହାର ରାଜ୍ୟରୁ ଆସିଥିବା ଅଣ ଓଡିଆଙ୍କୁ ଚିହ୍ନଟ କରି ସେମାନଙ୍କୁ ତାଙ୍କ ଘରକୁ ପଠାଇ ଦେଇଛୁ। ଅଣଓଡିଆ ଆସି ରହିଲେ ସମ୍ପୃକ୍ତ ଲଜ ମାଲିକ, ଭଡାରେ ଦେଇଥିବା ଘର ମାଲିକ ସେମାନଙ୍କ ଆଧାର କାର୍ଡ ତଥା ପରିଚିତ ପୁଲିସ ପାଖରେ ଦେବାକୁ କୁହାଯାଇଥିବା ପ୍ରକାଶ କରିଥିଲେ।
