କେନ୍ଦୁଝର,୧୬ା୩(ସ୍ବ.ପ୍ର.): ଡ୍ରାଇଭର ମହାସଂଘ ଡାକରାରେ ଷ୍ଟିୟରିଂ ଛାଡ଼ି ହଜାର ହଜାର ଡ୍ରାଇଭର ଆନ୍ଦୋଳନକୁ ଓହ୍ଲାଇବା ଫଳରେ ରାସ୍ତାରେ ଗାଡ଼ି ଚଳାଚଳ ଠପ୍ ହୋଇଯାଇଛି। ବିଶେଷକରି ବ୍ୟବସାୟିକ ଟ୍ରକ, ଟିପ୍ପର, ବସ୍, ଟ୍ୟାକ୍ସି ଆଦି ଚଳାଚଳ ଗୁରୁବାର ଦ୍ୱିତୀୟ ଦିନ ପାଇଁ ବନ୍ଦ ରହିଥିବାରୁ ଯାତାୟାତ ବ୍ୟାହତ ହୋଇଛି। ବିଶେଷକରି ଯାତ୍ରୀମାନେ ଯିବା ଆସିବା କରିପାରୁ ନ ଥିବା ବେଳେ ମାଲ୍ ପରିବହନ ବନ୍ଦ ରହିଛି। ଫଳରେ ପନିପରିବା, ଅତ୍ୟାବଶ୍ୟକୀୟ ସାମଗ୍ରୀ, ପେଟ୍ରୋଲ/ଡିଜେଲ ଆଦି ପରିବହନ ସମ୍ପୂର୍ଣ୍ଣ ବନ୍ଦ ରହିଥିବାରୁ ଏହାର ପ୍ରଭାବ ସାଧାରଣ ଲୋକଙ୍କ ଉପରେ ପଡୁଛି। ଏଭଳି ଆନ୍ଦୋଳନ ଜାରି ରହିଲେ ଦିନେ/ଦୁଇ ଦିନ ମଧ୍ୟରେ ଅଭାବ ଦେଖାଦେବ ଏବଂ ଖାଉଟି ଓ ଲୋକମାନେ ସଙ୍କଟର ସମ୍ମୁଖୀନ ହେବେ। ଖାଦ୍ୟର ଦର୍ଦାମ ବୃଦ୍ଧି ପାଇବାରେ ଲାଗୁଥିବା ବେଳେ ବେପାରୀମାନେ ଅଧିକ ଲାଭ ଆଶାରେ ସାମଗ୍ରୀ ସାଇତି ରଖିବା ଆରମ୍ଭ କଲେଣି। ଏଣୁ ଏଥିପ୍ରତି ପ୍ରଶାସନ ପକ୍ଷରୁ ପଦକ୍ଷେପ ନେବା ଜରୁରୀ ବୋଲି ମତପ୍ରକାଶ ପାଇଛି।
ସେହିପରି ଗାଡ଼ି ଚଳାଚଳ ବନ୍ଦ ଯୋଗୁ ଏହାର ପ୍ରଭାବ ଖଣି ଅଞ୍ଚଳରେ ଦେଖିବାକୁ ମିଳିଛି। ଟ୍ରକ୍/ଟିପ୍ପର ବନ୍ଦ ରହିଥିବାରୁ ସାଇଡିଂ ତଥା ଜିଲା ଓ ଜିଲା ବାହାରେ ଥିବା ବିଭିନ୍ନ କାରଖାନାକୁ ଲୁହାପଥର ପରିବହନ ବାଧାପ୍ରାପ୍ତ ହୋଇଛି। ଯୋଡ଼ା ଓ କେନ୍ଦୁଝର ଖଣି ମଣ୍ଡଳରେ ଥିବା ଖଣିରୁ ଲୁହାପଥର ବନ୍ଦ ରହିଛି। କେବଳ ରେଳପଥରେ ଲୁହାପଥର ପରିବହନ ଜାରି ରହିଥିବା ବେଳେ ରାସ୍ତା ପଥରେ ପରିବହନ ବନ୍ଦ ରହିଥିବା ଯୋଡ଼ା ଖଣି ଯୁଗ୍ମ ନିର୍ଦ୍ଦେଶକ ଦିନେଶ ଅଗ୍ରଓାଲ ସୂଚନା ଦେଇଛନ୍ତି। ବୁଧବାର ମାତ୍ର ୧ ଲକ୍ଷ ୧୦ ହଜାର ମେଟ୍ରିକ୍ ଟନ୍ ଲୁହାପଥର ପରିବହନ ହୋଇ ପାରିଥିବା ସୂଚନା ମିଳିଛି।
ଯୋଡ଼ା ଅଞ୍ଚଳରେ ଥିବା ସେଲ୍ ଟାଟା ତଥା ଓଏମ୍ସିର ତିନୋଟି ଖଣିକୁ ରେଳପଥ ଯାଇଥିବାରୁ ସେଠାରୁ ସିଧାସଳଖ ଲୁହାପଥର ରେଳ ଯୋଗେ ପରିବହନ ହେଉଛି। ପ୍ରକାଶ ଯେ, ଦୈନିକ ହାରାହାରି ୨ ଲକ୍ଷ ୨୦ ମେଟ୍ରିକ ଟନ୍ରୁ ଅଧିକ ଲୁହାପଥର ଯୋଡ଼ା ଖଣି ମଣ୍ଡଳରୁ ଜିଲା, ରାଜ୍ୟ ତଥା ରାଜ୍ୟ ବାହାରକୁ ପରିବହନ ହୋଇଥାଏ। ସେ ବାବଦକୁ ଦୈନିକ ୫୦ କୋଟି ଟଙ୍କା ରାଜସ୍ବ ସରକାର ପାଇଥାନ୍ତି। ଏଭଳି ବନ୍ଦ ଯୋଗୁ ଦୁଇ ଦିନରେ ବହୁ କୋଟି ଟଙ୍କା କ୍ଷତି ହୋଇସାରିଥିବା ବେଳେ ଲୁହାପଥର ପରିବହନ ବନ୍ଦ ଯୋଗୁ ଶିଳ୍ପ ସଂସ୍ଥାଗୁଡ଼ିକ ମଧ୍ୟ କଞ୍ଚାମାଲ ପାଇପାରୁ ନ ଥିବାରୁ କ୍ଷତିଗ୍ରସ୍ତ ହେଉଛନ୍ତି ବୋଲି ଶିଳ୍ପ ବିଶେଷଜ୍ଞ ସରୋଜ ବିଶ୍ୱାଳ କହିଛନ୍ତି।
