ଭଞ୍ଜନଗର,୨୩।୫(ବାବୁଲା ପ୍ରଧାନ): ଗୋଟିଏ ପଟେ ବେକାରି ସମସ୍ୟା ବଢୁଛି। ଅନ୍ୟ ପଟେ ଅପରାଧ ମଧ୍ୟ ବଢୁଛି। ଏହିଭଳି ପରିସ୍ଥିତିରେ କିଛି ଲୋକ ବେନିୟମ ଭାବେ କମ ପରିଶ୍ରମ କରି ରାତାରାତି ବଡ଼ଲୋକ ହେବାର ସ୍ବପ୍ନ ଦେଖୁଛନ୍ତି, ପରେ ତାଙ୍କୁ ଅଧିକ ଲାଭ ଲୋଭ ଘାରୁଛି। ଏହିଭଳି ବେନିୟମ କାର୍ଯ୍ୟ ମଧ୍ୟରେ ଚୋରା ଗଞ୍ଜେଇ, ମଦ କାରବାର, ଖଣି ଖାଦାନ ଲୁଟିବା ଅନ୍ୟତମ। ଭଞ୍ଜନଗର ଅଞ୍ଚଳରେ ଲଘୁ ଖଣିଜ ଦ୍ରବ୍ୟ, ମଦ, ଗଞ୍ଜେଇ ଚୋରା କାରବାର ବଢ଼ୁଛି। ରାଜସ୍ବ, ପୋଲିସ ଏବଂ ଅବକାରୀ ବିଭାଗ ବିଭିନ୍ନ ସମୟରେ ଅଭିଯୁକ୍ତମାନଙ୍କୁ ଗିରଫ କରୁଛି। ତଥାପି ଏହିଭଳି ବେନିୟମ ଚୋରା କାରବାର ଥମିବାକୁ ନାହିଁ।
ଶୁକ୍ରବାର ମଧ୍ୟାହ୍ନରେ ଭଞ୍ଜନଗର ଥାନା ଏସ୍ଆଇ ଲକ୍ଷ୍ମୀଧର ମହାନ୍ତି ଏବଂ ଷ୍ଟାଫ ଭଞ୍ଜନଗର ଦୁର୍ଗାପ୍ରସାଦ ଜାତୀୟ ରାଜପଥରେ ପାଟ୍ରୋଲିଂ କରୁଥିଲେ। ଏହି ସମୟରେ ନିଧିଆପଲ୍ଲୀ ବସ ଷ୍ଟପ୍ ଠାରେ ଦୁଇଟି ବ୍ୟାଗ ସନ୍ଦେହ ଜନକ ଅବସ୍ଥାରେ ଥିବା ବେଳେ ସେଠାରେ ୩ ଜଣ ଠିଆ ହୋଇଥିଲେ । ପୋଲିସ ଦେଖି ପ୍ରଥମେ ଗଞ୍ଜେଇକୁ ଜବତ କରିଥିଲା। ପରେ ତଦନ୍ତ କରି ପୋଲିସ ଜଣେ ବସ ହେଲପର ସମେତ ପଶ୍ଚିମବଙ୍ଗର ଆଉ ୩ ଜଣକୁ ଗିରଫ କରିଥିଲା। ସେମାନେ ହେଲେ ପଶ୍ଚିମବଙ୍ଗର ରାଜୁ ଶଙ୍କର, ଉତ୍ତମ କୁମାର ସିଂ, ସମୀର କୁମାର ଦୁବେ ଓ ହେଲପର ଜଗନ୍ନାଥପ୍ରସାଦ ଅଞ୍ଚଳର ଧର୍ମେନ୍ଦ୍ର ପଟ୍ଟନାୟକ । ଗିରଫ ଅଭିଯୁକ୍ତ ମାନଙ୍କୁ ଶୁକ୍ରବାର ସାରେ କୋର୍ଟଚାଲାଣ କରାଯାଇଛି। ମାଜିଷ୍ଟ୍ରେଟ ଦାୟିତ୍ୱରେ ଭଞ୍ଜନଗର ତହସିଲଦାର ଅବିନାଶ ମହାର ଥିଲେ।
