କେନ୍ଦୁଝର,୧୧ା୧୨(ସ୍ବ.ପ୍ର.): ଦୈତାରୀ ଥାନା ଅନ୍ତର୍ଗତ ରାସୋଳ ଗ୍ରାମରେ ଶନିବାର ରାତିରେ ଦମ୍ପତିଙ୍କୁ ହାଣି ହତ୍ୟା କରାଯିବା ଘଟଣା ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି। ସେମାନେ ଘର ବାହାରେ ଶୋଇଥିବା ବେଳେ କେହି ଦୁର୍ବୃତ୍ତ ଧାରୁଆ ଅସ୍ତ୍ରରେ ମୁଣ୍ଡ ଓ ବେକକୁ ହାଣି ପଳାଇ ଯାଇଥିଲେ। ଚିତ୍କାର ଶୁଣି ଘରେ ଶୋଇଥିବା ତାଙ୍କ ଝିଅ ଆସି ରକ୍ତାକ୍ତ ଅବସ୍ଥାରେ ଦେଖି ପଡ଼ୋଶୀଙ୍କୁ ଜଣାଇଥିଲେ। ସେମାନଙ୍କ ନାମ ବାହାଡ ମୁର୍ମୁ (୪୩) ଓ ଧାନି ମୁର୍ମୁ (୩୭) ବୋଲି ଜଣାପଡ଼ିଛି। ସେ ଗ୍ରାମ ଶାଳରେ ପୂଜାର୍ଚ୍ଚନା କରନ୍ତି। ଏଣୁ ଗୁଣି ଗାରେଡ଼ି କିମ୍ବା ପୂର୍ବ ଶତ୍ରୁତା କାରଣରୁ ହତ୍ୟା କରାଯାଇଥିବା ଗ୍ରାମବାସୀ ସନ୍ଦେହ କରୁଛନ୍ତି। ଦୈତାରୀ ଥାନା ପୋଲିସ ଓ ଘଟଗାଁ ଏସ୍ଡିପିଓ ତଥା ବିଶେଷଜ୍ଞ ଦଳ ପହଞ୍ଚି ତଦନ୍ତ ଆରମ୍ଭ କରିଛନ୍ତି। ତଦନ୍ତ ପରେ ହତ୍ୟାର କାରଣ ଜଣାପଡ଼ିବ ଏବଂ ଅଭିଯୁକ୍ତ ଧରା ପଡ଼ିବେ ବୋଲି ଏସ୍ଡିପିଓ ସୁଶୀଲ ମିଶ୍ର କହିଛନ୍ତି।
