ବରଗଡ଼,୧।୫(ପ୍ରେମାନନ୍ଦ ଖମାରୀ): ବରଗଡ଼ ଜିଲା ଭେଡେନ ଥାନା ଅଧୀନ ବାଘପାଲି ଗ୍ରାମରେ ଗୁରୁବାର ଡବଲ ମର୍ଡର ହୋଇଛି। ଆକ୍ରମଣ, ପ୍ରତିଆକ୍ରମଣରେ ୨ଜଣଙ୍କ ମୃତ୍ୟୁ ଘଟିଛି। ମୃତକମାନେ ହେଲେ ବାଘପାଲି ଗ୍ରାମର ତରଣୀ ବାଗ ଏବଂ ମଘା ଭୁଏ। ମଘାଙ୍କ ଏକ ଘର କୋଠରୀରେ ଉଭୟଙ୍କ ଶବ ପଡିଛି। ହତ୍ୟାକାଣ୍ଡର କାରଣ ସ୍ପଷ୍ଟ ହୋଇ ନ ଥିବାବେଳେ ନିଶାସକ୍ତ ଅବସ୍ଥାରେ ବଚସାରୁ ଏହି ଘଟଣା ଘଟିଥିବା ଅନୁମାନ କରାଯାଉଛି।
ତରଣୀ ଜଣେ ପେଶାଦାର ଅପରାଧୀ ଏବଂ ସେ ଫେରାର୍ ଥିଲେ । ତାଙ୍କ ନାମରେ ୱାରେଣ୍ଟ ରହିଥିବା ସୂଚନା ମିଳିଥିବା ବେଳେ ବେଳେ ସେ ଆଜି ଗ୍ରାମକୁ ଆସିଥିବା ଲୋକେ କହିଛନ୍ତି। ମଘା ମଦ କାରବାର କରୁଥିଲେ ବୋଲି ଅଞ୍ଚଳରେ ଚର୍ଚ୍ଚା ଚାଲିଛି। ତେବେ ଉଭୟ ମୃତକଙ୍କ ମଧ୍ୟରେ ଆକ୍ରମଣ, ପ୍ରତି ଆକ୍ରମଣରେ ସେମାନଙ୍କ ମୃତ୍ୟୁ ହୋଇଛି ନା ଏଥିରେ ଆଉ କାହାରି ସମ୍ପୃକ୍ତି ରହିଛି ସେ ନେଇ ପୋଲିସ ତନାଘନା ଚଲାଇଛି। ପୋଲିସ ଅଧିକାରୀ ଘଟଣାସ୍ଥଳରେ ପହଞ୍ଚି ଘଟଣାର ଅନୁଧ୍ୟାନ କରି ତଦନ୍ତ ଆରମ୍ଭ କରିଛନ୍ତି।
