ପୁରୁଷୋତ୍ତମପୁର,୨୯।୪ (ସବିତା ମିଶ୍ର) : ଗଞ୍ଜାମ ଜିଲା ଦୌରା ଜଜ ଅଶାନ୍ତ କୁମାର ଦାଶ ବୁଧବାର ପୁରୁଷୋତ୍ତମପୁର କୋର୍ଟ ପରିଦର୍ଶନ କରିଛନ୍ତି । ଏହିଅବସରରେ ସେ ନୂତନ ଭାବରେ ନିର୍ମାଣାଧୀନ କୋର୍ଟ କୋଠାକୁ ପରିଦର୍ଶନ କରି କାର୍ଯ୍ୟମାନକୁ ପରଖିଥିଲେ। ଏହି ସମୟରେ ଓକିଲ ସଂଘ ଲାଗି ନିର୍ମାଣ କରାଯାଇଥିବା କୋଠାଟିରେ ଆବଶ୍ୟକୀୟ ବ୍ୟବସ୍ଥା ପରିଶ୍ରାଗାର,ଶୌଚାଳୟ ସହ ଓକିଲଙ୍କ ଫାଇଲପତ୍ର ରଖିବାଲାଗି ଲକର ଓ ବହିପତ୍ର ରଖିବାଲାଗି ମଧ୍ୟ କୌଣସି ସୁବିଧା କରାଯାଇନଥିବା ନେଇ ଓକିଲମାନେ ଜିଲାଜଜଙ୍କ ଦୃଷ୍ଟି ଆକର୍ଷଣ କରି ଏହାର ବ୍ୟବସ୍ଥା କରିବାକୁ ଅନୁରୋଧ କରିଥିଲେ। ଏହାସହ ସରକାରଙ୍କ ନୂତନ ଭାରତୀୟ ନ୍ୟାୟ ସଂହିତା (ବିଏନଏନଏସ)ଆଇନ ପ୍ରକାରେ ଆସିଷ୍ଟାଣ୍ଟ ସେସନ କ୍ଷମତା ନଥିବା ହେତୁ ଏହିକୋର୍ଟର କେସ ମାନ ଛତ୍ରପୁର ଅତିରିକ୍ତ ଜିଲାଜଜଙ୍କ କୋର୍ଟକୁ ଟ୍ରାନ୍ସଫର ହୋଇ ଚାଲିଯାଇଛି। ଫଳରେ ଏହି ଅଞ୍ଚଳର ଲୋକେ ନ୍ୟାୟ ପାଇବାକୁ ୩୫ କିଲୋମିଟର ସୁଦୂର ଛତ୍ରପୁରକୁ ଦୌଡି ଅଧିକ ଖର୍ଚ୍ଚାନ୍ତ ହୋଇ ହଇରାଣ ହରକତ ହେଉଥିବାବେଳେ ଓକିଲମାନେ ମଧ୍ୟ ହଇରାଣ ହେବାରେ ଲାଗିଛନ୍ତି । ଏଣୁ ଏଠାରେ ଅତିରିକ୍ତ ଜିଲା ଦୌରାଜଜ କୋର୍ଟ ଖୋଲିବା ଲାଗି ନିବେଦନ କରିବା ସହ କ୍ୟାମ୍ପ କୋର୍ଟର ବ୍ୟବସ୍ଥା କରିବା ଲାଗି ଅନୁରୋଧ କରିଥିଲେ । ଓକିଲ ଅଭିଯୋଗକୁ ନେଇ ଜିଲା ଜଜ ପୂର୍ତ୍ତବିଭାଗିୟ ଯନ୍ତ୍ରୀଙ୍କୁ ନୂତନ ଓକିଲସଂଘକୋଠାରେ ଆବଶ୍ୟକିୟ ସୁବିଧାକରିବା ଲାଗି ପରାମର୍ଶ ଦେଇଥିଲେ । ଜିଲାଜଜଙ୍କ ଏହି ପରିଦର୍ଶନ ସମୟରେ ସିନିୟର ସିଭିଲଜଜ ସୁମିତା ଆଚାର୍ଯ୍ୟ, ଜେମଏଫସି ଅନନ୍ୟା ଅପର୍ମିତା, ପୂର୍ତ୍ତବିଭାଗିୟ ସହକାରୀଯନ୍ତ୍ରୀ ସନ୍ତୋଷକୁମାର ପରିଡା, କନିଷ୍ଠଯନ୍ତ୍ରୀ ସୋନିଆ ପ୍ରଧାନ,ଓକିଲସଂଘ ସଭାପତି ପ୍ରକାଶଚନ୍ଦ୍ର ତ୍ରିପାଠୀ, ସମ୍ପାଦକ ରବିନ୍ଦ୍ରକୁମାର ସାହୁ, ବରିଷ୍ଠ ଓକିଲ ଗୌରୀଶଙ୍କର ରାଉଳ, ଉପେନ୍ଦ୍ର ପଣ୍ଡା,ସିମାଞ୍ଚଳ ମିଶ୍ର, କ୍ରୁଷ୍ଣଚନ୍ଦ୍ର ଗୌଡ,ପ୍ରଭାତକୁମାର ପଟ୍ଟନାୟକ, କେ. ଶଶାଙ୍କଶେଖର ରାଓଙ୍କ ସମେତ ବହୁ ଓକିଲ ଉପସ୍ଥିତଥିଲେ ।
