ଜୋର ଧରିଲାଣି ଆବାସ ତାତି

ସୋନପୁର,୨୩।୧(ନି.ପ୍ର.):ପ୍ରଧାନମନ୍ତ୍ରୀ ଆବାସ ଯୋଜନାର ତାଲିକାକୁ ନେଇ ସବୁଠି ଅସନ୍ତୋଷ ତେଜିବାରେ ଲାଗିଛି। କିଏ ବ୍ଲକ ଆଗରେ ତ କିଏ ଜିଲାପାଳଙ୍କ କାର୍ଯ୍ୟାଳୟରେ ଅଭିଯୋଗପତ୍ର ଧରି ପ୍ରତିବାଦ ଜଣାଉଛନ୍ତି। ସଦ୍ୟ ପ୍ରକାଶିତ ତାଲିକାରେ ବହୁଯୋଗ୍ୟ ହିତାଧିକାରୀ ବାଦ୍‌ ପଡିଥିବା ବେଳେ ଅଯୋଗ୍ୟ ହିତାଧିକାରୀଙ୍କ ନାମ ଦେଖି ଅନେକ ପ୍ରଶାସନିକ କଳର ନିଷ୍କ୍ରିୟତାକୁ ଦାୟୀ କରିଛନ୍ତି।
ଜାନୁୟାରୀ ୧୬ ତାରିଖ ସୋମବାର ପ୍ରକାଶିତ ସମ୍ଭାବ୍ୟ ହିତାଧିକାରୀଙ୍କ ନାମ ତାଲିକା ଜିଲାର ସମସ୍ତ ୧୦୯ ପଞ୍ଚାୟତ କାର୍ଯ୍ୟାଳୟ, ସ୍କୁଲ ଓ ଅଙ୍ଗନଓ୍ବାଡି କେନ୍ଦ୍ରରେ ଲଗାଯାଇଛି। ପ୍ରଧାନମନ୍ତ୍ରୀ ଆବାସ ଯୋଜନା(ଗ୍ରାମୀଣ)ରୁ ବାଦ୍‌ ପଡିଥିବା ବ୍ୟକ୍ତିମାନେ ଘର ପାଇବା ପାଇଁ ୨୦୧୭ ମେ ମାସରେ ଆବେଦନ କରିଥିଲେ। ଯାଞ୍ଚ ପରେ ବର୍ତ୍ତମାନ ସୁଦ୍ଧା ସୁବର୍ଣ୍ଣପୁର ଜିଲାର ୧୮ହଜାର ୮୧୩ ଜଣ ଯୋଗ୍ୟ ହିତାଧିକାରୀଙ୍କ ତାଲିକା ପ୍ରସ୍ତୁତ କରାଯାଇଛି। ଧାର୍ଯ୍ୟ ଲକ୍ଷ୍ୟ ଅନୁଯାୟୀ ସରକାର ଏହି ଜିଲାକୁ ନିକଟରେ ୧୫,୦୧୬ ସାଧାରଣ ପିଏମ୍‌ଏଓ୍ବାଇ(ଜି) ପ୍ରଦାନ କରିଛନ୍ତି। ତଦନୁଯାୟୀ ସୋନପୁର ବ୍ଲକରେ ୧୭୪୦, ତରଭାରେ ୨୫୨୫, ଡୁଙ୍ଗୁରିପାଲିରେ ୩୮୨୪, ବିନିକାରେ ୨୬୧୭, ଉଲୁଣ୍ଡାରେ ୨୬୨୧ ଓ ବୀରମହାରାଜପୁରରେ ୧୬୮୯ଜଣ ହିତାଧିକାରୀଙ୍କ ନାମ ପ୍ରକାଶିତ ସମ୍ଭାବ୍ୟ ତାଲିକାରେ ରହିଛି। ଏହି ତାଲିକାରୁ ବାଦ୍‌ ପଡିଥିବା ବହୁଯୋଗ୍ୟ ବ୍ୟକ୍ତି ଜିଲା ଓ ବ୍ଲକ ପ୍ରଶାସନର ଯାଞ୍ଚ ପ୍ରକ୍ରିୟାକୁ ନେଇ ପ୍ରଶ୍ନ ଉଠାଇଛନ୍ତି। ତାଲିକାରେ ନିଜ ନାମ ନ ଦେଖି ଉଲୁଣ୍ଡା ବ୍ଲକ ରକ୍ସା ପଞ୍ଚାୟତ ହିଙ୍ଗିମା ଗାଁର ଗରିବ ଲୋକ ଦୁଃଖ ପ୍ରକାଶ କରିଛନ୍ତି। ସେମାନେ ଆନ୍ଦୋଳନ କରିବାକୁ ପ୍ରସ୍ତୁତ ହେଉଛନ୍ତି। ବିରୋଧୀ ଦୁର୍ବଳ ଥିଲେ ହେଁ ଆବାସ ତାତି ଏବେ ଜିଲାରେ ଜୋର ଧରିଲାଣି। ତଦନ୍ତ ଠିକ୍‌ ଭାବେ ନ କଲେ ଜିଲାର ବିନିକା ବ୍ଲକ ଚରଦା ପଞ୍ଚାୟତର ଫୁଲମୁଠି ଓ ଭଣ୍ଡାର ପଞ୍ଚାୟତର ଭଣ୍ଡାର, ସୋନପୁର ବ୍ଲକର ମାଟିଆପାଲି, ଜନମୁରା, ତରଭା ବ୍ଲକର ପାଇକବାହାଲ ପଞ୍ଚାୟତ, ଡୁଙ୍ଗୁରିପାଲି ବ୍ଲକ ଓ ବୀରମହାରାଜପୁର ବ୍ଲକର ସଂଗ୍ରାମପୁର ଗାଁରେ ଅଯୋଗ୍ୟ ହିତାଧିକାରୀ ଆବାସ ଯୋଜନାରେ ସାମିଲ ହେଲା ଭଳି ଘଟଣାର ପୁନରାବୃତ୍ତି ହେବ। ଅନ୍ୟପକ୍ଷରେ ଜାନୁୟାରୀ ୨୪ ତାରିଖ ପର୍ଯ୍ୟନ୍ତ ଅଭିଯୋଗ କରିବାର ଯେଉଁ ସମୟସୀମା ଦିଆଯାଇଛି ତାକୁ ନେଇ ମଧ୍ୟ ପ୍ରଶ୍ନ ଉଠିଛି । ଏତେ କମ୍‌ ସମୟ ମଧ୍ୟରେ କେମିତି ଠିକ୍‌ ତଦନ୍ତ କରି ଅଯୋଗ୍ୟଙ୍କୁ ବାଦ୍‌ ଦିଆଯିବ ତାକୁ ନେଇ ସବୁ ମହଲରେ ସନ୍ଦେହ ପ୍ରକାଶ ପାଇଲାଣି।
ସୂଚନାଥାଉକି, କେତେକ ପଞ୍ଚାୟତ ନିର୍ବାହୀ ଅଧିକାରୀ ଓ ଗ୍ରାମ ରୋଜଗାର ସେବକଙ୍କ ସହାୟତାରେ ଜିଲାରେ ବହୁ ଅଯୋଗ୍ୟ ହିତାଧିକାରୀ ଆବାସ ଘର ହାତେଇଛନ୍ତି। ସରକାରଙ୍କ ଗାଇଡଲାଇନ୍‌ କହୁଛି, ଅଯୋଗ୍ୟ ହିତାଧିକାରୀ ହାତେଇଥିବା ଆବାସ ଘର ବାବଦରେ ତଦନ୍ତ କରାଯାଇ ସେ ବାବଦ ଟଙ୍କା ଆଦାୟ କରାଯିବ। ହେଲେ ତଦନ୍ତ କେବଳ ଧର୍ମକୁ ଅଖିଠାର। ତଥାପି ଯେତିକି ତଦନ୍ତ ହୋଇଛି ସେଥିରେ ବହୁ ଅଯୋଗ୍ୟ ହିତାଧିକାରୀ ଧରା ପଡିଛନ୍ତି। ପ୍ରାକ୍ତନ ଜିଲାପାଳ ମନୀଷା ବାନାର୍ଜୀ ଓ ବର୍ତ୍ତମାନର ଜିଲାପାଳ ଅବୋଲି ସୁନିଲ ନରଓ୍ବଣେଙ୍କ ସମୟରେ ଟ୍ୟାଗ୍‌ ଅଫିସର ଥିବା ସରକାରୀ କର୍ମଚାରୀ, କନିଷ୍ଠ ଯନ୍ତ୍ରୀ ଓ ପ୍ରାକ୍ତନ ବିନିକା ବିଡିଓଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିଲା। ତେବେ ଜିଲାର କୌଣସି ଜଣେ ଅଯୋଗ୍ୟ ହିତାଧିକାରୀଙ୍କ ନିକଟରୁ ଟଙ୍କା ଆଦାୟ ହୋଇପାରିନି। ଗତ ନଭେମ୍ବର ମାସରେ ବିନିକା ବ୍ଲକ ଫୁଲମୁଠି ଗାଁରେ ଆବାସ ଯୋଜନାରେ ଦୁର୍ନୀତି ଘଟଣାରେ ବିନିକା ଏବିଡିଓ ପ୍ରଜ୍ଞା ପାଣିଗ୍ରହୀ, ପିଏ ଦ୍ୱିତୀକୃଷ୍ଣ ପଣ୍ଡା ଓ ଚରଦା ପଞ୍ଚାୟତର ପ୍ରାକ୍ତନ ନିର୍ବାହୀ ଅଧିକାରୀ ମିତାଞ୍ଜଳୀ ରଥଙ୍କ ବିରୋଧରେ ଡ୍ରାଫ୍ଟଚାର୍ଜ କରିବାକୁ ଜିଲାପାଳ ଅବୋଲି ସୁନିଲ ନରଓ୍ବଣେ ନିର୍ଦ୍ଦେଶ ଦେଇଥିଲେ। ସେହିପରି ଚଞ୍ଚକତା କରି ହିତାଧିକାରୀ ସାଜି ଥିବା ଚରଦା ପଞ୍ଚାୟତ ଫୁଲମୁଠି ଗ୍ରାମର ନରସିଂହ ମିଶ୍ର ଓ ହାଡୁଚରଣ ମିଶ୍ରଙ୍କ ନିକଟରୁ ଆବାସ ବାବଦ ଅର୍ଥ ଅସୁଲି କରିବାକୁ ଜିଲାପାଳ ନିର୍ଦ୍ଦେଶ ଦେଇଛନ୍ତି। ତେବେ ସମ୍ପୃକ୍ତ ତିନି ଅଧିକାରୀଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନି କି ଅଯୋଗ୍ୟ ହିତାଧିକାରୀଙ୍କ ନିକଟରୁ ଆବାସ ବାବଦ ଅର୍ଥ ଅସୁଲ ହୋଇନି।
ଏ ସମ୍ପର୍କରେ ଜିଲା ମୁଖ୍ୟ ଉନ୍ନୟନ ଅଧିକାରୀ ନିହାର ରଞ୍ଜନ କହଁର କହିଛନ୍ତି, ପ୍ରକାଶିତ ତାଲିକାକୁ ଦେଖି କିଛି ଲୋକ ଅଯୋଗ୍ୟ ହିତାଧିକାରୀଙ୍କ ନାମରେ ଅଭିଯୋଗ କରୁଛନ୍ତି। ଜନସାଧାରଣଙ୍କୁ ସଚେତନ କରିବାକୁ ସମସ୍ତ ବିଡିଓଙ୍କୁ ନିର୍ଦ୍ଦେଶ ଦିଆଯାଇଛି। ଶନିବାର ସୁଦ୍ଧା ଜିଲାରୁ ୧୩୫ ଅଭିଯେଗ ଆସିଲାଣି। ସେଥିମଧ୍ୟରୁ ୮୯ ଅଭିଯୋଗର ତଦନ୍ତ ସରିଛି। ଆଉ ୩ ଦିନରେ ଯେତିକି ଅଭିଯୋଗ ଆସିବ, ସେହି ଅନୁସାରେ ତଦନ୍ତ କରାଯିବ। ଏଥିପାଇଁ ବ୍ଲକସ୍ତରରେ ଟିମ୍‌ ଗଠନ କରାଯାଇଛି। ରିପୋର୍ଟ ଆଧାରରେ ଅଯୋଗ୍ୟଙ୍କୁ କାଟି ଯୋଗ୍ୟଙ୍କୁ ତାଲିକାରେ ଅନ୍ତର୍ଭୁକ୍ତ କରାଯିବ। ୨୬ ତାରିଖରେ ଗ୍ରାମସଭାରେ ଅନୁମୋଦନ କରାଯିବ। ପ୍ରକ୍ରିୟା ସରି ନଥିଲେ ୩୦ ତାରିଖରେ ସମ୍ପୂର୍ଣ୍ଣ କରାଯିବ ବୋଲି କହିଛନ୍ତି।


Enter your email to get our daily news in your inbox.

All Right Reserved By Dharitri.Com

ମା’ପରି କିଏ ହେବ

ଜଣେ ମହିଳାଙ୍କ ପ୍ରେରଣା ପ୍ରତ୍ୟେକ ବ୍ୟକ୍ତିଙ୍କୁ ସଫଳତା ଆଣି ଦେଇଥାଏ। ମାତ୍ର ଜଣେ ମାଆ ପାଇଁ ଏହି ପ୍ରେରଣା ନିଜ ପିଲାଙ୍କ କ୍ଷେତ୍ରରେ ବହୁଗୁଣିତ ହୋଇଥାଏ।...

ମୁଖ୍ୟମନ୍ତ୍ରୀଙ୍କ ରିଲିଫ୍‌ ପାଣ୍ଠିକୁ ୨୧ସରପଞ୍ଚ ଦେଲେ ୩ ମାସର ଭତ୍ତା

ତରଭା,୨୦।୪(ଡି.ଏନ.ଏ): କରୋନା ଭୂତାଣୁ ସଂକ୍ରମଣ ପ୍ରତିରୋଧ ପାଇଁ ସୁବର୍ଣ୍ଣପୁର ଜିଲା ତରଭା ବ୍ଳକର ସମସ୍ତ ସରପଞ୍ଚ ମୁଖ୍ୟମନ୍ତ୍ରୀଙ୍କ ରିଲିଫ୍‌ ପାଣ୍ଠିକୁ ୧ଲକ୍ଷ ୨ହଜାର ଟଙ୍କା ପ୍ରଦାନ...

ଲଘୁଚାପ୍‌ ବରଷା ଦୂର କଲା ମର୍‌ଡି ଆଶଁକା:ଜୋର୍‌ଦାର ଚାଲିଛେ ରୁଆ ବିହିଡା

ବିଜେପୁର, ୧୭।୮ (ଡି.ଏନ୍‌.ଏ.): ଶରାବନ୍‌ ଯାଇ ଭୁଦୋ ଲାଗ୍‌ଲା। ଚଲତି ବଛର ବରଷା ପାଏନ୍‌ ଅଭାବୁ ବହୁତ ଜାଗାରେ ଚାଷ୍‌ବାସ ପଛେଇ ଯାଇଥିଲା। ହେଲେ ଶରାବନ୍‌...

ସ୍ବର୍ଗଦ୍ୱାର ପୁନରୁଦ୍ଧାର ପାଇଁ ତତ୍ପରତା

ପୁରୀ ଅଫିସ,୧୬ା୭: ନୂଆ ରୂପ ନେବ ସ୍ବର୍ଗଦ୍ୱାର। ବଦଳିବ ଏହାର ଚେହେରା। ପୁରୀ ପାଇଁ ଯେଉଁ ବିକାଶର ଚିତ୍ର ପରିକଳ୍ପନା କରାଯାଇଛି ସେଥିରେ ସ୍ବର୍ଗଦ୍ୱାରକୁ ସାମିଲ...

ଅର୍ଜୁନ ନାୟକ ପାଇବେ ‘କଳାହାଣ୍ଡି କ୍ରିଡାରତ୍ନ ସମ୍ମାନ’

ଭବାନୀପାଟଣା, ୧୫।୧୦ (ଡି.ଏନ୍‌.ଏ.): କଳାହାଣ୍ଡି ଜିଲା କ୍ରୀଡାର କାର୍ଯ୍ୟକାରିଣୀ କମିଟି ନିଷ୍ପତ୍ତିକ୍ରମେ ପୂର୍ବତନ ରାଜ୍ୟସ୍ତରୀୟ ଫୁଟବଲ ଖେଳାଳି ଅର୍ଜୁନ ନାୟକଙ୍କୁ ଜିଲାର ସର୍ବଶ୍ରେଷ୍ଠ କ୍ରୀଡା ସମ୍ମାନ...

ୱାର୍ଡ଼ ବୁଲି ସମସ୍ୟା ବୁଝିଲେ ବିଧାୟକ

ବାଲେଶ୍ୱର ଅଫିସ,୨୨।୬-ବାଲେଶ୍ୱର ସଦର ବିଧାୟକ ମଦନମୋହନ ଦତ୍ତ ଗୁରୁବାର ସନ୍ଧ୍ୟାରେ ପୌରାଞ୍ଚଳର ୫ ଓ ୭ନମ୍ବର ୱାର୍ଡ଼ ପରିଦର୍ଶନ କରିଥିଲେ। ଉକ୍ତ ୱାର୍ଡ଼ଗୁଡିକରେ ଥିବା ପାନୀୟଜଳ,...

ବିଶ୍ୱସ୍ତରୀୟ ହେଉଛି ଏସ୍‌ସିବି: ମୁଖ୍ୟମନ୍ତ୍ରୀ

କଟକ ଅଫିସ,୨୭।୧୧: ରାଜ୍ୟର ସ୍ବାସ୍ଥ୍ୟସେବାକୁ ଅନ୍ୟ ରାଜ୍ୟ ତୁଳନାରେ ଅଧିକ ସୁଦୃଢ଼ କରାଯାଇଛି। ଏଥିପାଇଁ ରାଜ୍ୟରେ ଆରମ୍ଭ କରାଯାଇଥିବା ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନାରେ ଲୋକଙ୍କୁ...

ଧରିତ୍ରୀରେ ପ୍ରକାଶିତ ଖବର ମୁଖ୍ୟମନ୍ତ୍ରୀଙ୍କୁ ଟୁଇଟ୍‌ କଲେ ସାମାଜିକ କର୍ମୀ

ବରଗଡ଼ ଅଫିସ୍‌,୫।୫-ଉତ୍ତରପ୍ରଦେଶର ନୋଇଡ଼ାସ୍ଥିତ ଆର୍ଷ ଗୁରୁକୁଳରେ ବରଗଡ଼ ଜିଲାର ୪୨ଜଣ ଛାତ୍ରୀଛାତ୍ର ଫସି ରହିଛନ୍ତି। ଏ ନେଇ ଅଭିଭାବକମାନେ ସ୍ଥାନୀୟ ପ୍ରଶାସନ ନିକଟରେ ଦୃଷ୍ଟି ଆକର୍ଷଣ...

Advertisement
Archives

Model This Week