ଭବାନୀପାଟଣା,୨୩।୧(ସ୍ବ.ପ୍ର.):କଳାହାଣ୍ଡି ଜିଲା ଇନ୍ଦ୍ରାବତୀ ବାମ କେନାଲରେ ରବିବାର ପୁଣି ଘାଇ ସୃଷ୍ଟି ହୋଇଛି। ଏହି ଘାଇ ଗୁନଗୁନିଆ ଡିଷ୍ଟ୍ରିବ୍ୟୁଟାରି କେନାଲର ରେଙ୍ଗାଲପାଲି ଗାଁ ନିକଟରେ ହୋଇଛି। ପ୍ରାୟ ୩୦ ଫୁଟର ଏହି ଘାଇ ଯୋଗୁ ବହୁ ଚାଷଜମି ଜଳମଗ୍ନ ହୋଇଛି। ଏହାକୁ ନେଇ ସ୍ଥାନୀୟ ଚାଷୀଙ୍କ ମୁଣ୍ଡରେ ଏବେ ଚଡକ ପଡିଛି। ଗୁନଗୁନିଆ ଡିଷ୍ଟ୍ରିବ୍ୟୁଟାରି କେନାଲ ଗତ ସପ୍ତାହକ ମଧ୍ୟରେ ୨ ଥର ଭୁଶୁଡ଼ିଲାଣି। ପ୍ରଥମେ ୨୫ଫୁଟ ଲମ୍ବା ଘାଇ ସୃଷ୍ଟି ହୋଇଥିବା ବେଳେ ରବିବାର ଏହାର ୧୦୦ ମିଟର ଦୂରରେ ପୁଣି ୩୦ଫୁଟ ଘାଇ ସୃଷ୍ଟି ହୋଇଛି। ତଳ ମୁଣ୍ଡର ଚାଷୀ ତଳି ପକାଇବା ପାଇଁ କେନାଲ ପାଣିକୁ ଅପେକ୍ଷା କରିଥିବା ବେଳେ କେନାଲର ଏପରିସ୍ଥିତି ଯୋଗୁ ଚାଷକାମ ସମ୍ପୂର୍ଣ୍ଣ ପ୍ରଭାବିତ ହୋଇଛି। ଗତ ୭ ଜାନୁୟାରୀରେ ରବି ଜଳ ସେଚନ ଆରମ୍ଭ ହୋଇଥିବା ବେଳେ ଅଦ୍ୟାବଧି ୧୫ ଦିନରୁ ଊର୍ଦ୍ଧ୍ୱ ବିତିଯାଇଥିଲେ ସୁଦ୍ଧା ଚାଷଜମିକୁ ଜଳ ପହଞ୍ଚତ୍ପାରିନାହିଁ। ଇନ୍ଦ୍ରାବତୀ ଜଳସେଚନ ପ୍ରକଳ୍ପ ବାମ ମୁଖ୍ୟ କେନାଲ ଗୁନଗୁନିଆ ଡିଷ୍ଟ୍ରିବ୍ୟୁଟାରି କେନାଲ ଦୁଇ ପାର୍ଶ୍ୱର ହୁଡା ଦୁର୍ବଳ ହୋଇଥିବା ବେଳେ ଉଇହୁଙ୍କାରେ ଭର୍ତ୍ତି ହେଲାଣି। ଫଳରେ ପାଣିର ସୁଅରେ ବଡ଼ବଡ଼ ଗର୍ତ୍ତ ହୋଇ ହୁଡା ଭୁଶୁଡି ପଡୁଛି। ଏହି କେନାଲ ପୂର୍ବରୁ ପ୍ରାୟ ୧ କୋଟି ଟଙ୍କା ବ୍ୟୟ ଅଟକଳରେ ମରାମତି କାର୍ଯ୍ୟ ହୋଇଥିବା ବେଳେ କେଉଁଠି କ’ଣ ମରାମତି କରାଯାଇଛି ତାହା ପ୍ରଶ୍ନବାଚୀ ସୃଷ୍ଟି କରିଛି। ରବି ଚାଷ କାର୍ଯ୍ୟ ଆରମ୍ଭରେ ଗୋଟିଏ ସପ୍ତାହ ମଧ୍ୟରେ କେନାଲର ଦୁଇଟି ସ୍ଥାନରେ ପ୍ରାୟ ୨୦ ଫୁଟ ଲମ୍ବର ଗର୍ତ୍ତ ସୃଷ୍ଟି ହେବା ଘଟଣା ଚାଷୀଙ୍କୁ ଚକିତ କରିଛି। ଚଳିତବର୍ଷ କିପରି ଜଳ ଯୋଗାଣ ହେବ ସେହି ଚିନ୍ତାରେ ଚାଷୀ ପଡ଼ିଥିବା ବେଳେ ଏଯାଏ ତଳି ମଧ୍ୟ ପକାଇ ପାରିନାହିଁ। ଇନ୍ଦ୍ରାବତୀ ଜଳସେଚନ ପ୍ରକଳ୍ପ ବାମ ମୁଖ୍ୟ କେନାଲ କୁସୁମଖୁଣ୍ଟି ଡିଭିଜନ ଅଧୀକ୍ଷଣ ଯନ୍ତ୍ରୀ, ଏସ୍ଡିଓ ତଥା କନିଷ୍ଠ ଯନ୍ତ୍ରୀ ପହଞ୍ଚତ୍ ସ୍ଥିତି ଅନୁଧ୍ୟାନ କରିବା ସହ ବାଲିବସ୍ତା ଦେଇ ମରାମତି କାର୍ଯ୍ୟ ଆରମ୍ଭ କରିଛନ୍ତି। ତେବେ ବାଲିବସ୍ତା ଭରସାରେ ଜଳସେଚନ ହେବ ନା ଆଗକୁ କଣ ବିକଳ୍ପ ପନ୍ଥା ଅବଲମ୍ବନ କରାଯିବ ତାହା ଦେଖିବାକୁ ବାକି ରହିଲା।
