କେନ୍ଦୁଝର,୨୭ା୧୧(ସ୍ବ.ପ୍ର.): କେନ୍ଦୁଝର ଜିଲା ମୁଖ୍ୟ ଡାକ୍ତରଖାନାରେ ଡିଏମ୍ଏଫ୍ ଅର୍ଥରେ ପ୍ରତିଷ୍ଠା କରାଯାଇଥିବା ଲକ୍ଷାଧିକ ଟଙ୍କା ବ୍ୟୟର ଡିଜିଟାଲ କିଓସ୍କ କାମରେ ଲାଗୁନି। ଦୀର୍ଘ ମାସ ହେଲା ଏହା ଅଚଳ ହୋଇ ପଡ଼ିଥିଲେ ହେଁ ମରାମତି କରାଯାଉ ନ ଥିବାରୁ ଆସୁଥିବା ରୋଗୀ ଓ ସେମାନଙ୍କ ସମ୍ପର୍କୀୟମାନେ କାୈଣସି ସୂଚନା ପାଇ ପାରୁନାହାନ୍ତି। ଯଦିଓ ସ୍ବାସ୍ଥ୍ୟ ସାଥୀମାନେ ଅଛନ୍ତି ତେବେ ଅନେକ ସୂଚନା ଯାହାକି ଉକ୍ତ ଡିଜିଟାଲ କିଓସ୍କରୁ ମିଳୁଥିଲା ତାହା ପାଇପାରୁ ନ ଥିବାରୁ ଅସନ୍ତୋଷ ପ୍ରକାଶ ପାଉଛି।
ଡାକ୍ତର ତଥା ନର୍ସମାନଙ୍କ ଡ୍ୟୁଟି, ବ୍ଲଡ୍ ବ୍ୟାଙ୍କରେ କେଉଁ ଗ୍ରୁପ୍ର ରକ୍ତ କେତେ ରହିଛି ତାହାର ସୂଚନା ଆଦି ଉକ୍ତ କିଓସ୍କରୁ ଲୋକମାନେ ଜାଣି ପାରୁଥିଲେ। ଏବେ ଏହା ଅଚଳ ହୋଇ ପଡ଼ିଛି। ଏହାକୁ ସଜଡ଼ା ଯିବ ବୋଲି ମେଡିକାଲ ପକ୍ଷରୁ ସବୁବେଳେ କୁହଯାଉଛି। ଦୀର୍ଘ ମାସ ହେଲା ସଜଡ଼ା ଯାଉ ନ ଥିବାରୁ ସେଠାରେ ଥିବା କମ୍ପ୍ୟୁଟର, ଟିଭି ଆଦି ନଷ୍ଟ ହେଉଛି। ଏ ନେଇ ଜିଲା ମୁଖ୍ୟ ଚିକିତ୍ସା ଅଧିକାରୀ ଡା. କୈଳାସଚନ୍ଦ୍ର ପୃଷ୍ଟି କହିଛନ୍ତି, କିଓସ୍କ ସଜାଡ଼ିବା ପାଇଁ ଦାୟିତ୍ୱରେ ଥିବା ଆଉଟ୍ସୋର୍ସିଂ ସଂସ୍ଥାକୁ କୁହାଯାଇଛି। ଶୀଘ୍ର ତାହା କାର୍ଯ୍ୟକ୍ଷମ କରାଯିବ। ତୁରନ୍ତ କିଓସ୍କ କାର୍ଯ୍ୟକ୍ଷମ କରିବାକୁ ସ୍ଥାନୀୟ ସାମାଜିକ କର୍ମୀ ଦିଲ୍ଲୀପ ସାହୁ ଦାବି କରିଛନ୍ତି।
