କୋଲକାତା,୭।୧୧: ପଶ୍ଚିମବଙ୍ଗର ନିକଟରେ ୪ଟିି ଆସନରେ ବିଧାନସଭା ଉପ-ନିର୍ବାଚନ ଅନୁଷ୍ଠିତ ହୋଇଥିଲା। ସେଥିରୁ ତିନୋଟି ଆସନରେ ଭାଜପା ପ୍ରାର୍ଥୀଙ୍କ ଅମାନତ ଉଡ଼ିଯାଇଛି। ବର୍ତ୍ତମାନ ଏହି ପରାଜୟକୁ ନେଇ ଦଳ ଭିତରେ ଏକ ଚର୍ଚ୍ଚା ଆରମ୍ଭ ହୋଇଛି। ସବୁଠୁ ବଡ କଥା ସାମ୍ନାକୁ ଆସିଛି ଯେ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ପାର୍ଟି ଟିଏମସି ଏକ ସ୍ଥିର ରଣନୀତି ଅନୁଯାୟୀ ବଙ୍ଗଳାରେ ସିପିଏମ ଏବଂ କଂଗ୍ରେସକୁ ମଜବୁତ କରୁଛି।
ଯାହାଦ୍ୱାରା ଟିଏମସି ବିରୋଧୀ ଭୋଟ ଭାଜପା, ସିପିଏମ ଏବଂ କଂଗ୍ରେସ ମଧ୍ୟରେ ବିଭାଜନ ହୋଇପାରିବ। ଏହାର ସିଧା ସଳଖ ଫାଇଦା ଟିଏମସିକୁ ଯିବ। ଉପ-ନିର୍ବାଚନର ଫଳାଫଳରେ ଏହା ମଧ୍ୟ ଦେଖାଯାଇଛି ଯେ ଚଳିତ ଥର ସିପିଏମର ଭୋଟ ବ୍ୟାଙ୍କ ବୃଦ୍ଧି ପାଇଛି।
ପୂର୍ବରୁ ୪ ପ୍ରତିଶତରେ ପହଞ୍ଚିଥିବା ଭୋଟ ବ୍ୟାଙ୍କ ପୁଣି ଥରେ ୧୬ ପ୍ରତିଶତରେ ପହଞ୍ଚିଛି। ଏଭଳି ପରିସ୍ଥିତିରେ ଏବେ ରାଜ୍ୟରେ ଭାଜପା ସମ୍ମୁଖରେ ଏକ ଦ୍ୱନ୍ଦ୍ୱ ସୃଷ୍ଟି ହୋଇଛି।
ପଶ୍ଚିମବଙ୍ଗରେ ଟିଏମସିର ନୀରବ ଆତଙ୍କ ଯୋଗୁ ଲୋକେ ଶାସକ ଦଳ ଭୟରେ ଭୋଟ ନ ଦେଇ ଘରେ ରହିବାକୁ ଶ୍ରେୟ ମଣୁଛନ୍ତି ବୋଲି ରାଜ୍ୟର ଭାଜପା ଉପାଧ୍ୟକ୍ଷ ଜୟପ୍ରକାଶ ମଜୁମଦାର କହିଛନ୍ତି। ତେବେ ଏବେ ଟିଏମସି ରାଜ୍ୟରେ ଯୋଜନାବଦ୍ଧ ଭାବେ ସିପିଏମ ଏବଂ କଂଗ୍ରେସକୁ ମଜବୁତ କରୁଛି। ଏହା କରି ଟିଏମସି ବିରୋଧୀ ଭୋଟ ବିଭାଜନ ହେବାରେ ଲାଗିଛି। ରାଜ୍ୟରେ ଭାଜପା ହେଉଛି ମୁଖ୍ୟ ବିରୋଧୀ ଦଳ। ତେଣୂ ଭୋଟ ବିଭାଜନ ଉପରେ ଗୁରୁତ୍ୱାରୋପ କରାଯାଉଛି।
ଚଳିତ ଉପନିର୍ବାଚନରେ ଭାଜପା କେନ୍ଦ୍ର ମନ୍ତ୍ରୀ ନିଶିଥ ପ୍ରେମାନିକଙ୍କ ଆସନ ଦିନହାଟା ମଧ୍ୟ ଶୋଚନୀୟ ଭାବେ ପରାଜିତ ହୋଇଛି। ବାକି ତିନିଟି ଆସନରେ ମଧ୍ୟ ପରାଜୟରେ ଭୋଟର ଏକ ବଡ଼ ବ୍ୟବଧାନ ରହିଥିଲା। ଏଭଳି ପରିସ୍ଥିତିରେ ରାଜ୍ୟରେ ଭାଜପାର ଆଶାକୁ ବଡ଼ ଝଟ୍କା ଲାଗିଥିବା ରାଜନୈତିକ ମହଲରେ ଚର୍ଚ୍ଚା ହେଉଛି।
ଭାଜପା ପକ୍ଷରୁ ଏବେ ୨୦୨୪ରେ ହେବାକୁ ଥିବା ଲୋକସଭା ନିର୍ବାଚନକୁ ଲକ୍ଷ୍ୟରେ ରଖି ଯୋଜନାବଦ୍ଧ ଭାବେ ପଦକ୍ଷେପ ଗ୍ରହଣ କରଯାଉଛି। ରାଜ୍ୟରେ ସଂଗଠନକୁ ମଜବୁତ କରିବା ପାଇଁ କାର୍ଯ୍ୟ ମଧ୍ୟ ଆରମ୍ଭ ହୋଇଛି।
