ବଣାଇଁ,୨୪।୪(ପ୍ରଦୀପ ତ୍ରିପାଠୀ): ଜଣେ ଅବସରପ୍ରାପ୍ତ କର୍ମଚାରୀ ପୁଅ ବାହାଘର ପାଇଁ ଟଙ୍କା ରଖିଥିଲେ। ଗୁରୁବାର ବ୍ୟାଙ୍କରେ ରଖିଥିବା ସଞ୍ଚିତ ଟଙ୍କା ବାହାରି କରି ଏକ ବାଇକ୍ ଡିକରେ ରଖିଥିଲେ। ହେଲେ ଦୁର୍ବୃତ୍ତମାନେ ସ୍ପଷ୍ଟ ଦିବା ଲୋକରେ ଡିକି ଭାଙ୍ଗି ସାଢେ ଲକ୍ଷ ଟଙ୍କା ଲୁଟି ନେଇଥିବା ଜଣାପଡିଛି। ଏହି ଘଟଣା ଘଟିଛି ବଣାଇଁ ଅଞ୍ଚଳରେ। ଅପରପକ୍ଷେ ବଣାଇଁରେ ସାପ୍ତାହିକ ବଜାର ବସୁଥିବା ସୋମବାର ଏବଂ ଗୁରୁବାରକୁ ଦୁର୍ବୃତ୍ତମାନେ ଟାର୍ଗେଟ କରି ବାରମ୍ବାର ଏଭଳି ଲୁଟ କରୁଛନ୍ତି। ହେଲେ ପୋଲିସ ଲୁଟେରାଙ୍କ ସମ୍ପର୍କରେ କୌଣସି ଟେର ପାଇ ନ ପାରିବା ଘଟଣା ଅଞ୍ଚଳରେ ଆଇନ ଶୃଙ୍ଖଳା ପରିସ୍ଥିତି ଭୂଶୁଢି ପଡିଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି।
ମିଳିଥିବା ସୂଚନା ମୁତାବକ, ଅବସରପ୍ରାପ୍ତ କର୍ମଚାରୀ ଟେକ ସୁନ୍ଦର ପ୍ରଧାନ ପୁଅ ବାହାଘର ପାଇଁ ରଖିଥିବା ସଞ୍ଚିତ ଅର୍ଥ ଭାରତୀୟ ଷ୍ଟେଟ ବ୍ୟାଙ୍କ ବଣାଇଁ ଶାଖାରୁ ଉଠାଇବାକୁ ଆସିଥିଲେ । ଟେକ ସୁନ୍ଦରଙ୍କ ଘର ବାରକୋଟ ଥାନା ଅନ୍ତର୍ଗତ ସାଲେଇ ଗ୍ରାମରେ। ଗୁରୁବାର ସେ ପୁଅ ସହ ବାଇକରେ ବଣାଇଁ ଆସିଥିଲେ । ବ୍ୟାଙ୍କରୁ ୪ ଲକ୍ଷ ଟଙ୍କା ଉଠାଇ ନିଜେ ପଚାଶ ହଜାର ରଖିବା ପରେ ବାଇକ୍ ଡିକିରେ ଅବଶିଷ୍ଟ ୩ଲକ୍ଷ ପଚାଶ ହଜାର ଟଙ୍କା ରଖିଥିଲେ । ପରେ ବ୍ୟାଙ୍କରୁ ଅନତି ଦୂରରେ ଥିବା ଏକ କପଡ଼ା ଦୋକାନ ସମ୍ମୁଖରେ ବାଇକ ରଖି ଭିତରକୁ ଯାଇଥିଲେ।
ସେତିକିବେଳେ ପୂର୍ବରୁ ଅନୁସରଣ କରୁଥିବା ଦୁର୍ବୃତ୍ତମାନେ ଡିକି ଭାଙ୍ଗି ସାଢେ ୩ଲକ୍ଷ ଟଙ୍କା ଲୁଟି ନେଇ ଏକ ବାଇକ୍ ଯୋଗେ ଫେରାର ହୋଇଯାଇଥିଲେ। ଏହି ସଂକ୍ରାନ୍ତରେ ଟେକ ସୁନ୍ଦର ବଣାଇଁ ଥାନାରେ ଅଭିଯୋଗ କରିଛନ୍ତି। ଅଭିଯୋଗକୁ ଭିତ୍ତି କରି ପୋଲିସ ଏକ ଚୋରି ମାମଲା (ନଂ.୧୦୧/୨୫) ରୁଜୁ କରି କପଡ଼ା ଦୋକାନର ସିସି ଟିଭି ଫୁଟେଜ ଆଧାରରେ ତଦନ୍ତ ଆରମ୍ଭ କରିଛି। ଜୀବନର ସଞ୍ଚିତ ଅର୍ଥ ହରାଇ ଟେକ ସୁନ୍ଦର ସମ୍ପୂର୍ଣ୍ଣ ଭାଙ୍ଗି ପଡିଛନ୍ତି। ପୋଲିସ ଘଟଣାର ତଦନ୍ତ କରି ତୁରନ୍ତ ଅଭିଯୁକ୍ତମାନଙ୍କୁ ଗିରଫ କରିବାକୁ ସେ ଦାବି କରିଛନ୍ତି।
