ଭଦ୍ରକ ଅଫିସ, ୧୯ା୪
ଭଦ୍ରକ ଜିଲା ଧାମନଗର ସେବା ସମବାୟ ସମିତିରେ ଅଚଳାବସ୍ଥାକୁ ନେଇ ସାଧାରଣରେ ଅସନ୍ତୋଷ ଦେଖାଦେଇଛି। ସମିତିରେ ସୃଷ୍ଟି ହୋଇଥିବା ବିବାଦୀୟ ପରିସ୍ଥିତି ଏବଂ ରାଜନୈତିକ ହସ୍ତକ୍ଷେପ ପ୍ରତିବାଦରେ ସୋମବାର ସଦସ୍ୟମାନେ ଜିଲାପାଳଙ୍କୁ ଭେଟି ଫେରାଦ ହୋଇଛନ୍ତି। ଏହି ସମିତି ଅଧୀନରେ ଧାମନଗର ଏନ୍ଏସି ସମେତ ରାଧାବଲ୍ଲଭପୁର ପଞ୍ଚାୟତ ରହିଛି। ସମିତିରେ ପାଞ୍ଚ ହଜାରରୁ ଅଧିକ ସଦସ୍ୟ ଏବଂ ଋଣୀ ସଭ୍ୟ ପଞ୍ଜୀକୃତ ଅଛନ୍ତି। ଗତ କିଛିଦିନ ଧରି ନିର୍ଦ୍ଦିଷ୍ଟ ଏକ ରାଜନୈତିକ ଦଳର ଜଣେ ନେତା ଏବଂ ସମିତି କର୍ମଚାରୀ ସଂଘର ଜଣେ ନେତା ଉଦ୍ଦେଶ୍ୟମୂଳକ ଭାବେ ବିଶୃଙ୍ଖଳା ସୃଷ୍ଟି କରୁଛନ୍ତି। ଦୁଇ ବ୍ୟକ୍ତି ପ୍ରତ୍ୟେକ୍ଷ ଏବଂ ପରୋକ୍ଷ ଭାବେ ସମିତିରୁ ଲକ୍ଷାଧିକ ଟଙ୍କାର ଋଣ ନେଇ ପରିଶୋଧ କରୁ ନ ଥିବାବେଳେ ସମ୍ପାଦକ ଏବଂ ଅନ୍ୟ କର୍ମଚାରୀଙ୍କୁ ଧମକ ଦେଇ ପୁନର୍ବାର ଋଣ ପାଇଁ ଚାପ ପକାଉଥିବା କୁହାଯାଇଛି। ସମିତି ସଦସ୍ୟମାନଙ୍କ ସହ ଲୋକପ୍ରତିନିଧି ଜିଲାପାଳ ତ୍ରିଲୋଚନ ମାଝିଙ୍କୁ ଭେଟି ଏ ସମ୍ପର୍କରେ ଅବଗତ କରାଇଛନ୍ତି। ଏଥିସହ ସମବାୟ ବିଭାଗର ଡିଆର୍ସିଏସ୍, ଏଆର୍ସିଏସ୍ ପ୍ରମୁଖଙ୍କୁ ଦାବିପତ୍ର ପ୍ରଦାନ କରିଛନ୍ତି। ସମସ୍ୟାର ସମାଧାନ ପାଇଁ ଜିଲାପାଳ ପ୍ରତିଶ୍ରୁତି ଦେଇଥିବା ଜଣାଯାଇଛି। ରାଧାବଲ୍ଲଭପୁର ସରପଞ୍ଚ ପ୍ରୀତମ ଦାସ, ଦାମୋଦର ଜେନା, ରଶ୍ମିରଞ୍ଜନ ସାମଲ, ଅଜୟ ବେହେରା, ଛବିନ୍ଦ୍ର ସାହୁ, ଗୋବିନ୍ଦ ମହାନ୍ତି, ବାବାଜୀ ପରିଡ଼ା, କାଉନ୍ସିଲର ସ୍ବାଧୀନ ସୁନ୍ଦର ଦାସ, ପ୍ରଶାନ୍ତ ପରିଡ଼ା, ଆଶିଷ ଦାସ, ଲକ୍ଷ୍ମଣ ବେହେରା, ବୈରାଗୀ ରାଉତ, ସୁଜିତ ମହାନ୍ତି ପ୍ରମୁଖ ଜିଲାପାଳଙ୍କୁ ସାକ୍ଷାତ କରିଥିଲେ।
