ଦାରିଙ୍ଗବାଡି,୧୪।୧୧(ଅରୁଣ ସାହୁ ): ରାଜଧାନୀ ଦିଲ୍ଲୀରେ ଗୁରୁବାରଠାରୁ ଆରମ୍ଭ ହୋଇଛି ବାଣିଜ୍ୟ ମେଳା। ମେଳାରେ ଓଡ଼ିଶାର ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡା ଯୋଗଦେଇ ଓଡ଼ିଶା ପାଇଁ ମେଳାକୁ ଉଦ୍ଘାଟନ କରିଥିଲେ।
ଏହି ଅବସରରେ ଉପମୁଖ୍ୟମନ୍ତ୍ରୀ ମେଳାର ବିଭିନ୍ନ ଷ୍ଟଲ ବୁଲିବା ସହ କନ୍ଧମାଳ ଜିଲା ଦାରିଙ୍ଗବାଡିରୁ ଯାଇଥିବା ମହିଳା ସ୍ବୟଂ ସହାୟକ ଗୋଷ୍ଠୀ ବିକ୍ରୟ କେନ୍ଦ୍ର ବୁଲି ଦେଖିଥିଲେ। ଦାରିଙ୍ଗବାଡିର ଲକ୍ଷପତି ଦିଦି ଝରଣା ସାହୁଙ୍କ ସହ କନ୍ଧମାଳ ହଳଦୀ ଗୁଣ୍ଡ ଓ ହଳଦୀ ସମ୍ପର୍କରେ ଆଲୋଚନା କରିଥିଲେ। ଲକ୍ଷ୍ୟପତି ଦିଦି ଝରଣା ଉପମୁଖ୍ୟମନ୍ତ୍ରୀଙ୍କୁ ହଳଦୀ ଓ ଅନ୍ୟ ସାମଗ୍ରୀ ସମ୍ପର୍କରେ ଅବଗତ କରାଇଥିଲେ।
ପ୍ରକାଶ ଯେ, ଦିଲ୍ଲୀର ପ୍ରଗତି ମୈଦାନରେ ଚାଲିଥିବା ଏହି ବାଣିଜ୍ୟ ମେଳାରେ ୧୧ଟି ଦେଶ ଓ ୩୩ଟି ରାଜ୍ୟ ଅଂଶ ଗ୍ରହଣ କରୁଥିବା ବେଳେ ଏହା ଆସନ୍ତା ୨୭ ପର୍ଯ୍ୟନ୍ତ ଚାଲିବ। ମେଳାରେ କନ୍ଧମାଳ ହଳଦୀର ଚାହିଦା ରହିଥିବା ଲକ୍ଷପତି ଦିଦି ଝରଣା କହିଛନ୍ତି।
