ମୁମ୍ବାଇ,୧୯।୭: ବିଭିନ୍ନ କଲେଜ ଓ ବିଶ୍ୱବିଦ୍ୟାଳୟରେ ଶେଷବର୍ଷର ପରୀକ୍ଷା ସେପ୍ଟେମ୍ବରରେ କରିବା ଲାଗି କେନ୍ଦ୍ର ସରକାର ନିଷ୍ପତ୍ତି ଗ୍ରହଣ କରିଥିବାବେଳେ ଏହାକୁ ଶିବସେନା ଯୁବମୋର୍ଚ୍ଚା ପକ୍ଷରୁ ବିରୋଧ କରାଯାଇଛି। ଶନିବାର ଏନେଇ ଯୁବମୋର୍ଚ୍ଚା ପକ୍ଷରୁ ସୁପ୍ରିମକୋର୍ଟରେ ରିଟ୍ ପିଟିଶନ ଦାଖଲ କରାଯାଇଛି। ଦେଶରେ ମହାମାରୀ କରୋନାର ପ୍ରାଦୁର୍ଭାବ ବଢ଼ି ଆକ୍ରାନ୍ତଙ୍କ ସଂଖ୍ୟା ୧୦ ଲକ୍ଷ ଟପିଥିବା ବେଳେ ଲକ୍ଷ ଲକ୍ଷ ଛାତ୍ରୀଛାତ୍ର, ଶିକ୍ଷକ, ଅଣଶିକ୍ଷକ କର୍ମଚାରୀ ଓ ସେମାନଙ୍କ ପରିବାରକୁ ସୁରକ୍ଷା ଦେବା ଲାଗି ସର୍ବୋଚ୍ଚ କୋର୍ଟ ପରୀକ୍ଷା ଲଦି ନ ଦେବାଲାଗି ୟୁଜିସିକୁ ନିର୍ଦ୍ଦେଶ ଦିଅନ୍ତୁ ବୋଲି ଅନୁରୋଧ କରାଯାଇଛି। ଯୁବମୋର୍ଚ୍ଚାର ଅଧ୍ୟକ୍ଷ ତଥା ମହାରାଷ୍ଟ୍ର ପରିବେଶ ମନ୍ତ୍ରୀ ଆଦିତ୍ୟ ଠାକ୍ରେ ଏନେଇ ଟୁଇଟରରେ ଉଲ୍ଲେଖ କରିଛନ୍ତି। ଏଭଳି ପରିସ୍ଥିତିରେ ସେମାନଙ୍କ ସୁରକ୍ଷାକୁ ଗୁରୁତ୍ୱ ଦିଆଯିବା ପରିବର୍ତ୍ତେ ୟୁଜିସି ଦ୍ୱାରା ପରୀକ୍ଷା ଲାଗି ଏକ ପ୍ରକାର ବାଧ୍ୟ କରାଯିବା ଠିକ୍ ନୁହେଁ ବୋଲି ସେ କହିଛନ୍ତି। ମହାମାରୀ ପରେ ପିଲାମାନେ ଆପେ ଆପେ ପରୀକ୍ଷା ଲାଗି ଆଗଭର ହେବେ।
ଅନ୍ୟପକ୍ଷରେ ଯୁବସେନା ସମ୍ପାଦକ ବରୁଣ ଦେଶାଇ ଏକ ଭିଡିଓ ରିଲିଜ୍ରେ କହିଛନ୍ତି, ୟୁଜିସି ଓ ମାନବ ସମ୍ବଳ ବିକାଶ ମନ୍ତ୍ରଣାଳୟକୁ ଚିଠି ଲେଖି ଏସମ୍ପର୍କରେ ଅବଗତ କରାଯାଇଥିଲେ ହେଁ କୌଣସି ଉତ୍ତର ମିଳିନାହିଁ। ମହାରାଷ୍ଟ୍ର ସରକାର ଶେଷବର୍ଷ ପରୀକ୍ଷା ବାତିଲ କରିଥିବାବେଳେ ସମଗ୍ର ଦେଶରେ ଅନୁରୂପ ପଦକ୍ଷେପ ଗ୍ରହଣ କରାଯିବା ଲାଗି ସେ ଦାବି କରିଛନ୍ତି। ଶିବସେନାର ଏଭଳି ନିଷ୍ପତ୍ତିକୁ ସହଯୋଗୀ କଂଗ୍ରେସ ମଧ୍ୟ ସମର୍ଥନ କରିଛି। ମହାମାରୀ କରୋନାର ପ୍ରାଦୁର୍ଭାବ ବଢ଼ୁଥିବାବେଳେ ପରୀକ୍ଷା କରାଯିବା ଅନୁଚିତ ବୋଲି ମହାରାଷ୍ଟ୍ର ପ୍ରଦେଶ ଯୁବ କଂଗ୍ରେସ ଅଧ୍ୟକ୍ଷ ସତ୍ୟଜିତ ତାମ୍ବେ କହିଛନ୍ତି।
