ମୁମ୍ବାଇ,୧୪ା୩: ନଭି ମୁମ୍ବାଇର ଡି ଓ୍ବାଇ ପାଟିଲ କ୍ରିକେଟ ଷ୍ଟାଡିୟମରେ ଅନୁଷ୍ଠିତ ଓମେନ୍ସ ପ୍ରିମିୟର ଲିଗ୍ର ୧୧ ତମ ମ୍ୟାଚ ଜିତିଛି ଦିଲ୍ଲୀ କ୍ୟାପିଟାଲ୍ସ। ବ୍ୟାଟିଂ ଆମନ୍ତ୍ରଣ ପାଇଥିବା ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର(ଆରସିବି) ଦଳ ୪ ଉଇକେଟ ବିନିମୟରେ ୧୫୦ ରନ୍ କରିଥିଲା। ଜବାବରେ ୨ ବଲ୍ ବାକି ଥାଇ ୪ ଉଇକେଟ ହରାଇ ମ୍ୟାଚ୍ ଜିତିଥିଲା କ୍ୟାପିଟାଲ୍ସ। ପ୍ରାରମ୍ଭିକ ବିପର୍ଯ୍ୟୟ ସହ ୧୩ ଓଭର ସୁଦ୍ଧା ଦଳ ମାତ୍ର ୬୩ ରନ୍ କରି ୩ ଉଇକେଟ ହରାଇଥିଲା ଆରସିବି। ତେବେ ରିଚା ଘୋଷଙ୍କ ୩୭ ଓ ଏଲିସ୍ ପେରୀଙ୍କ ୬୭* ରନ୍ ବଳରେ ଅନ୍ତିମ ୭ ଓଭରରୁ ୮୭ ରନ୍ କରିବାରେ ସମର୍ଥ ହୋଇଥିଲା। ପେରୀ ଓ ରିଚା ଚତୁର୍ଥ ଉଇକେଟରେ ୩୪ ବଲ୍ରୁ ୭୪ ରନ୍ ସଂଗ୍ରହ କରିଥିଲେ। କ୍ୟାପିଟାଲ୍ସ ପକ୍ଷରୁ ଭେଟେରାନ୍ ଶିଖା ପାଣ୍ଡେ ଚମତ୍କାର ବୋଲିଂ କରି ୩ ଉଇକେଟ ନେଇଥିଲେ। ୧୫୧ ରନ୍ର ପିଛା କରୁଥିବା କ୍ୟାପିଟାଲ୍ସ ପ୍ରଥମ ଓଭରେ ଶେଫାଳି ବର୍ମାଙ୍କ ଉଇକେଟ ହରାଇଥିଲା। ମେଗ୍ ଲାନିଙ୍ଗ(୧୫) ଓ ଆଲିସ୍ କାପ୍ସି(୩୮) ଦ୍ୱିତୟ ଉଇକେଟରେ ୪୪ ରନ୍ ଯୋଡିଥିଲେ। ପରେ ଜେମିମା ରୋଡ୍ରିଗୁଏଜ୍ ୩୨, ମାରିଜେନ୍ କାପ୍ ୩୨* ଓ ଜେସ୍ ଜୋନୋସେନ୍ ୨୯ରନ କରି ଦଳକୁ ବିଜୟୀ କରିଥିଲେ। ଆରସିବି ପକ୍ଷରୁ ଆଶା ଶୋବନା ସର୍ବାଧିକ ଦୁଇ ଉଇକେଟ ନେଇଥିବା ବେଳେ ପ୍ରୀତି ବୋଷ ଓ ମେଗାନ ଶୁଟ୍ ଗୋଟିଏ ଲେଖାଏ ଉଇକେଟ ନେଇଥିଲେ।
ସଂକ୍ଷିପ୍ତ ସ୍କୋର
ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ୨୦ ଓଭରରେ ୧୫୦/୪ (ଏଲିସ୍ ପେରୀ-୬୭*, ରିଚା ଘୋଷ-୩୭, ସୋଫି ଡିଭାଇନ୍-୨୧, ଶିଖା ପାଣ୍ଡେ- ୩/୨୩, ତାରା ନୋରିସ୍-୧/୨୫)। ଦିଲ୍ଲୀ କ୍ୟାପିଟାଲ୍ସ ୧୯.୪ ଓଭରରେ ୧୫୪/୪ (ଆଲିସ କାପ୍ସି-୩୮, ମାରିଜେନ୍ କାପ୍-୩୨*, ଜେମିମା ରୋଡ୍ରିଗୁଏଜ୍-୩୨, ଆଶା ଶୋବନା-୨/୨୭)।
