କେନ୍ଦୁଝର,୧୯ା୩(ସ୍ବ.ପ୍ର.): କେନ୍ଦୁଝର ଜିଲା ଦେଇ ଯାଇଥିବା ୪୯ନଂ ଜାତୀୟ ରାଜପଥ ଜଗମୋହନପୁରଠାରେ ପ୍ରସ୍ତାବିତ ଓଭରବ୍ରିଜ୍ (ଅଣ୍ଡରପାସ) ନିର୍ମାଣରେ ବିଳମ୍ବ ହେଉଥିବାରୁ ଅସନ୍ତୋଷ ପ୍ରକାଶ ପାଇଛି। ଏହି ସ୍ଥାନରେ ହାତୀଙ୍କ ବର୍ଷର ସବୁ ସମୟରେ ଯାତାୟାତ ରହୁଥିବାରୁ ପିୟୁପି ବା ପାସେଞ୍ଜର ଅଣ୍ଡରପାସ୍ ନ କରି ଏକ ବଡ଼ ବ୍ରିଜ କରିବାକୁ ବନ ବିଭାଗ ପ୍ରସ୍ତାବ ଦେଇଥିଲା। ହାତୀ ସୁରକ୍ଷା ସମନ୍ବୟ ବୈଠକରେ ନିଷ୍ପତ୍ତି ଅନୁଯାୟୀ, ୧ କିଲୋମିଟର ଦୀର୍ଘ ଓଭରବ୍ରିଜ୍ ମଧ୍ୟରୁ ହାତୀମାନଙ୍କ ପାଇଁ ୫୩୨ ମିଟର ଲମ୍ବ ଯାତାୟାତ ପଥ ରଖିବାକୁ ଏନ୍ଏଚ୍ଏଆଇ ସହମତି ପ୍ରକାଶ କରିଥିଲା। ତେବେ ଇତିମଧ୍ୟରେ ଜାତୀୟ ରାଜପଥ ୪୯ କାମ ଶେଷ ହେବାର ୨ ବର୍ଷ ପରେ ମଧ୍ୟ ବ୍ରିଜ୍ ପାଇଁ ଟେଣ୍ଡର ମଧ୍ୟ ହୋଇନାହିଁ। ଜଗମୋହନପୁରଠାରେ ବ୍ରିଜ୍ ହୋଇପାରୁ ନ ଥିବାରୁ ଲୋକଙ୍କ ଯାତାୟାତରେ ସମସ୍ୟା ଦେଖାଦେବା ସହ ଧୂଳି ଉଡୁଥିବାରୁ ବାୟୁ ପ୍ରଦୂଷଣ ଜନିତ ସମସ୍ୟା ଦେଖାଦେଉଛି। ଏନେଇ ମଧ୍ୟ ବନ ବିଭାଗ ଓ ଏନ୍ଏଚ୍ଏଆଇ ବିଭାଗ ମଧ୍ୟରେ ସମନ୍ବୟ ବୈଠକରେ ଆଲୋଚନା ହେଉଥିଲେ ହେଁ କାମ ହେଉ ନ ଥିବାରୁ ଅସନ୍ତୋଷ ପ୍ରକାଶ ପାଉଛି। ସେହିପରି ହାତୀମାନେ ଗୋଟିଏ ଜଙ୍ଗଲରୁ ଅନ୍ୟ ଜଙ୍ଗଲକୁ ରାସ୍ତା ପାର ହୋଇ ଚଳପ୍ରଚଳ କରିବାକୁ ଅସୁବିଧା ଭୋଗୁଛନ୍ତି ବୋଲି ସ୍ଥାନୀୟ ଲୋକମାନେ ମତବ୍ୟକ୍ତ କରୁଛନ୍ତି। ଏହି କାରଣରୁ ବାରମ୍ବାର ଦୁର୍ଘଟଣା ଘଟି ବହୁ ଧନଜୀବନ ହାନି ହେଉଥିବାରୁ ନିର୍ମାଣ ତୁରନ୍ତ କରା ନ ଗଲେ ଆଗାମୀ ଦିନରେ ସ୍ଥାନୀୟ ଲୋକ ଆନ୍ଦୋଳନ ଚେତାବନୀ ଦେଇଛନ୍ତି।
