ଉଦଳା,୯ା୫(ଡି.ଏନ.ଏ.): ମୟୂରଭଞ୍ଜ ଜିଲା ଉଦଳାରେ ରବିବାର ହାଜତ ମୃତ୍ୟୁ ଘଟିଥିବା ଅଭିଯୋଗ ହୋଇଛି। ପୋଲିସ ହେପାଜତରେ ଥିବା ଯୁବକ ପ୍ରଦୀପ ଦାସ(୩୫)ଙ୍କୁ ପିଟି ପିଟି ମାରି ଦିଆଯାଇଥିବା ତାଙ୍କ କକାପୁଅ ଭାଇ ରାଧାକାନ୍ତ ଦାସ କହିଛନ୍ତି। ଘଟଣାକୁ ନେଇ ଉଦଳା ଡାକ୍ତରଖାନାରେ ଉତ୍ତେଜନା ପ୍ରକାଶ ପାଇଛି। ପ୍ରଥମେ ଅତିରିକ୍ତ ଏସ୍ପି ସୁରେଶ ଚନ୍ଦ୍ର ପାତ୍ର ଓ ଏସ୍ଡିପିଓ ସାର୍ଥକ ରାୟ ଏବଂ ପରେ ଏସ୍ପି ଖିଲାରି ଋଷିକେଶ ଦ୍ୟାନଦେଓ ଥାନାରେ ପହଞ୍ଚି ଅଭିଯୋଗର ତଦନ୍ତ କରିଛନ୍ତି।
ଗତ ଜାନୁୟାରୀରେ ଉଦଳା ଏନ୍ଏସିର ୫ନଂ. ୱାର୍ଡରେ ରହୁଥିବା ଜଣେ ମହିଳାଙ୍କ ଘରୁ ସୁନା ଅଳଙ୍କାର ଲୁଟ୍ ହୋଇଥିଲା। ସଫା କରିବା ଆଳରେ ଦୁର୍ବୃତ୍ତ ଗହଣା ଲୁଟି ନେଇଥିଲେ। ଏନେଇ ଉଦଳା ଥାନା ପୋଲିସ ଏକ ମାମଲା ରୁଜୁ କରି ତଦନ୍ତ ଚଳାଇଥିଲା। ଏହି ଘଟଣାରେ ଉଦଳା ଓ ବଡ଼ସାହି ଥାନା ପୋଲିସ ବାଲେଶ୍ୱର ଜିଲା ମନ୍ଦାରପୁର ଅଞ୍ଚଳରୁ ପ୍ରଦୀପ ଦାସଙ୍କୁ ଶନିବାର ଗିରଫ କରିଥିଲା। ରାତିରେ ପ୍ରଦୀପଙ୍କୁ ଉଦଳା ଥାନାରେ ରଖି ପୋଲିସ ପଚରାଉଚରା କରିଥିଲା। ତେବେ ରବିବାର ଅପରାହ୍ନ ୧ଟା ୫୭ରେ ପୋଲିସ ତାଙ୍କୁ ଉଦଳା ଡାକ୍ତରଖାନାରେ ଭର୍ତ୍ତି କରିଥିଲା। ଅପରାହ୍ନ ୨ଟା ୩୫ରେ ତାଙ୍କର ମୃତ୍ୟୁ ଘଟିଥିଲା। ଚିକିତ୍ସା କରୁଥିବା ଡାକ୍ତର ପ୍ରଜ୍ଞା ପରମିତାଙ୍କ କହିବାନୁଯାୟୀ ପ୍ରଦୀପଙ୍କୁ ଅତି ଗୁରୁତର ଅବସ୍ଥାରେ ଭର୍ତ୍ତି କରାଯାଇଥିଲା। ସେତେବେଳକୁ ତାଙ୍କର ଚେତା ନ ଥିଲା। ତାଙ୍କ ଜୀବନ ବଞ୍ଚାଇବା ପାଇଁ ଆମେ ଯଥାସମ୍ଭବ ଚିକିତ୍ସା କରିଥିଲୁ। କିନ୍ତୁ ତାଙ୍କର ମୃତ୍ୟୁ ଘଟିଥିଲା ବୋଲି ଡାକ୍ତର ପରମିତା କହିଛନ୍ତି। ତେବେ ପ୍ରଦୀପ ଗୁରୁତର ଓ ଅଚେତ ହେବା ନେଇ ପୋଲିସ ଉପରେ ସନ୍ଦେହ ସୃଷ୍ଟି ହେଉଛି। ପ୍ରଦୀପଙ୍କ ପିଠିରେ ମାଡ଼ ଚିହ୍ନ ଥିବାରୁ ପୋଲିସ ତାଙ୍କୁ ପିଟି ପିଟି ମାରି ଦେଇଥିବା ତାଙ୍କ ଭାଇ ରାଧାକାନ୍ତ ଅଭିଯୋଗ କରିଛନ୍ତି। ଏହା ଜାଣିବା ପରେ ପ୍ରଦୀପଙ୍କ ଗ୍ରାମ ମନ୍ଦାରପୁରର ପ୍ରାୟ ୩୦୦ ଲୋକ ଡାକ୍ତରଖାନାରେ ପହଞ୍ଚତ୍ ହୋହଲ୍ଲା କରିଥିଲେ। ପ୍ରଦୀପ ବାଲେଶ୍ୱର ଗ୍ରାମ୍ୟ ଜଳଯୋଗାଣ ବିଭାଗରେ ରାତି ଜଗୁଆଳ ଭାବେ କାର୍ଯ୍ୟ କରୁଥିଲେ। ତାଙ୍କ ନାମରେ କୌଣସି ଅଭିଯୋଗ ନ ଥିଲା। ହେଲେ ପୋଲିସ ତାଙ୍କୁ ଉଠାଇ ନେଇ ହତ୍ୟା କରିଥିବା ଗ୍ରାମବାସୀ ଅଭିଯୋଗ କରିଛନ୍ତି।
ଅନ୍ୟପକ୍ଷରେ ହାଜତ ମୃତ୍ୟୁ ଅଭିଯୋଗକୁ ଉଦଳା ଥାନା ଅଧିକାରୀ ନିରଜ କୁମାର ସାମଲ ଖଣ୍ଡନ କରିଛନ୍ତି। ପ୍ରଦୀପଙ୍କୁ କୌଣସି ଶାରୀରିକ ନିର୍ଯାତନା ଦିଆଯାଇନାହିଁ। ସୁନା ଅଳଙ୍କାର ଲୁଟ୍ ମାମଲାରେ ତାଙ୍କୁ ଶନିବାର ରାତିରେ ଥାନାକୁ ଆଣି ପଚରାଉଚରା କରାଯାଇଥିଲା। ରବିବାର ସକାଳେ ମଧ୍ୟ ଜେରା କରାଯିବା ସହ ସୁନା ଅଳଙ୍କାର ଲୁଟ୍ ଅଭିଯୋଗ ଆଣିଥିବା ମହିଳା ଥାନାକୁ ଆସି ପ୍ରଦୀପଙ୍କୁ ଚିହ୍ନିଥିଲେ। ପୂର୍ବାହ୍ନରେ ତାଙ୍କୁ ଜଳଖିଆ ଏବଂ ମଧ୍ୟାହ୍ନରେ ଖାଇବାକୁ ଦିଆଯାଇଥିଲା, କିନ୍ତୁ ସେ ଖାଇ ନ ଥିଲେ। ଏହାପରେ ସେ ଅସୁସ୍ଥ ହୋଇପଡ଼ିବାରୁ ଆମେ ଡାକ୍ତରଖାନାରେ ଭର୍ତ୍ତି କରିଥିଲୁ ବୋଲି ଥାନା ଅଧିକାରୀ ସାମଲ କହିଛନ୍ତି।
ରବିବାର ରାତିରେ ମୃତଦେହ ବ୍ୟବଚ୍ଛେଦ ହୋଇଛି। ତାହାର ରିପୋର୍ଟ ଆସିବା ପରେ ପ୍ରଦୀପଙ୍କ ମୃତ୍ୟୁର କାରଣ ସ୍ପଷ୍ଟ ହେବ। ପ୍ରଦୀପଙ୍କ ଗୋଟିଏ ଝିଅ, ଗୋଟିଏ ପୁଅ ଏବଂ ସ୍ତ୍ରୀ ଅଛନ୍ତି। ସେମାନେ ଏବେ ଅସହାୟ ହୋଇପଡ଼ିଛନ୍ତି।
