ଦୁବାଇ, ୧୭।୧୦: ଚଳିତ ଆଇପିଏଲ୍ର ୩୩ତମ ତଥା ଶନିବାର ଖେଳାଯାଇଥିବା ପ୍ରଥମ ମୁକାବିଲାରେ ରାଜସ୍ଥାନ ରୟାଲ୍ସକୁ ୭ ଉଇକେଟ୍ରେ ରୟାଲ୍ ଚ୍ୟାଲେଞ୍ଜର୍ସ ବାଙ୍ଗାଲୋର (ଆର୍ସିବି) ହରାଇ ଦେଇଛି। ସ୍ଥାନୀୟ ଦୁବାଇ ଇଣ୍ଟର ନ୍ୟାଶନାଲ କ୍ରିକେଟ୍ ଷ୍ଟାଡିୟମରେ ଅନୁଷ୍ଠିତ ଏହି ମ୍ୟାଚ୍ରେ ପ୍ରଥମେ ବ୍ୟାଟିଂ କରି ରାଜସ୍ଥାନ ନିର୍ଦ୍ଧାରିତ ୨୦ ଓଭରରେ ୬ ଉଇକେଟ୍ ହରାଇ ୧୭୭ ରନ କରିଛି। ଦଳ ପକ୍ଷରୁ ଅଧିନାୟକ ଷ୍ଟିଭ ସ୍ମିଥ୍ ସର୍ବାଧିକ ୫୭ ରନ (୩୬ ବଲ୍) କରିଥିଲେ। ଅନ୍ୟମାନଙ୍କ ମଧ୍ୟରେ ରବିନ ଉଥପ୍ପା ୪୧, ବେନ୍ ଷ୍ଟୋକ୍ସ ୧୫, ଜୋଶ ବଟ୍ଲର ୨୪, ରାହୁଲ ତଓ୍ବୋତିଆ ୧୯* ରନ କରିଥିଲେ। ବାଙ୍ଗାଲୋର ପକ୍ଷରୁ କ୍ରିସ୍ ମୋରିସ ସଫଳ ବୋଲର ରହିଥିଲେ। ସେ ଏକାକୀ ୨୬ ରନ ବ୍ୟୟରେ ୪ ଉଇକେଟ୍ ହାସଲ କରିଥିଲେ। ସେହିଭଳି ୟୁଜବେନ୍ଦ୍ର ଚହଲଙ୍କୁ ୨ଟି ଉଇକେଟ୍ ମିଳିଥିଲା।
ବାଙ୍ଗାଲୋର ୧୯.୪ ଓଭରରେ ୩ ଉଇକେଟ୍ ହରାଇ ଲକ୍ଷ୍ୟ ହାସଲ କରିନେଇଥିଲା। ଦଳ ପକ୍ଷରୁ ଏବି ଡି ଭିଲର୍ସ ୨୨ ବଲରୁ ୫୫ ବିସ୍ଫୋରକ ଅପରାଜିତ ଅର୍ଦ୍ଧଶତକୀୟ ଇନିଂସ ଖେଳି ବିଜୟରେ ନାୟକ ସାଜିଥିଲେ। ସେ ଏହି ଇନିଂସ ମଧ୍ୟରେ ୬ ଛକା ମାରିଥିଲେ। ଅନ୍ୟମାନଙ୍କ ମଧ୍ୟରେ ଅଧିନାୟକ କୋହଲି ୩୨ ବଲରୁ ୪୩, ଦେବୀଦତ୍ତ ପଡିକ୍କଲ ୩୫, ଆରୋନ୍ ଫିଞ୍ଚ ୧୪ ଓ ଗୁରକୀରଟ ସିଂ ମନ୍ନ ୧୯* ରନ କରିଥିଲେ। ୯ ମ୍ୟାଚ୍ରୁ ୬ଷ୍ଠ ବିଜୟ ସହ ବାଙ୍ଗାଲୋର ୧୨ ପଏଣ୍ଟ ପାଇ ଟେବୁଲ ତାଲିକାର ୩ୟ ସ୍ଥାନରେ ରହିଛି।
