ବୁଲନ୍ଦସହର, ୪।୮: ଉତ୍ତରପ୍ରଦେଶ ଅପରାଧୀଙ୍କ ଚରାଭୂଇଁ ପାଲଟିଛି। ରାଜ୍ୟ ପୋଲିସ ଅପରାଧୀଙ୍କୁ ଦଣ୍ଡଦେବା ପରିବର୍ତ୍ତେ ସାଧାରଣ ଲୋକଙ୍କୁ ନିର୍ଯାତନା ଦେଉଥିବା ଅଭିଯୋଗ ହେଉଛି। ଏହାର ସଦ୍ୟତମ ଉଦାହରଣ ବୁଲନ୍ଦ ସହରର ଘଟିଛି। ଏଠାରେ ବରିଶା ନାମକ ଜଣେ ମହିଳାଙ୍କୁ ଯୋତୁକ ନିର୍ଯାତନ ପରେ ହତ୍ୟା କରାଯାଇଥିବା ଅଭିଯୋଗ ହୋଇଥିଲା। ମହିଳାଙ୍କ ମୃତଦେହ ମଧ୍ୟ ପୋଲିସ ଜବତ କରିଥିଲା। ପରେ ବରିଶାଙ୍କ ବାପ ଘର ସଦସ୍ୟଙ୍କ ଅଭିଯୋଗ ଅନୁସାରେ ସ୍ବାମୀ ଆମିର ଏବଂ ଶାଶୁ-ଶ୍ୱଶୁରଙ୍କୁ ଗିରଫ କରାଯାଇ ଜେଲରେ ଭର୍ତ୍ତି କରାଯାଇଥିଲା। ଆମିର ଏବଂ ତାଙ୍କ ମାତା ପିତା ବୋହୂଙ୍କୁ ସେମାନେ ହତ୍ୟା କରି ନ ଥିବା କହିଥିଲେ ମଧ୍ୟ ପୋଲିସ ବାବୁ ବିଶ୍ୱାସ କରି ନ ଥିଲେ। ଏବେ ଆଲିଗଡ଼ ପୋଲିସ ପକ୍ଷରୁ ଦାଖଲ ହୋଇଥିବା ରିପୋର୍ଟ ଅନୁସାରେ ବରିଶା ଜୀବିତ ଅଛନ୍ତି। ଏବେ ବୁଲନ୍ଦସହର ପୋଲିସ ବାବୁଙ୍କ ଅକଲ ଗୁଡୁମ୍ ହୋଇ ଯାଇଛି। ଅନ୍ୟ କୌଣସି ଅଜଣା ମହିଳାଙ୍କ ମୃତଦେହ ସଂସ୍କାର ବୁଲନ୍ଦସହର ପୋଲିସ କରିଥିବା ଜଣାପଡ଼ିଛି। ଆଲିଗଡ଼ ପୋଲିସ ବରିଶାଙ୍କୁ ତାଙ୍କ ମା’ଙ୍କ ସହିତ ବୁଲନ୍ଦ ସହର ପୋଲିସ ପାଖରେ ହାଜର କରିଛି। ମିଥ୍ୟା ହତ୍ୟା ଅଭିଯୋଗରେ ଜାଣିଶୁଣି ପୋଲିସ ଆମିର ଏବଂ ତାଙ୍କ ମାତା ପିତାଙ୍କୁ ଗିରଫ କରି ଜେଲ୍ରେ ରଖିଥିବା ଅଭିଯୋଗ ହୋଇଛି। ଏବେ ଏହି ଘଟଣା ସୋସିଆଲ୍ ମିଡ଼ିଆରେ ଭାଇରାଲ ହେବାରେ ଲାଗିଛି। ସଂସ୍କାର ପୂର୍ବରୁ ମୃତଦେହର ଯାଞ୍ଚ୍ ଭଲଭାବେ କାହିଁକି କରା ଗଲା ନାହିଁ ସେନେଇ ଏବେ ପ୍ରଶ୍ନ ଉଠିବାରେ ଲାଗିଛି। ଏନେଇ ସ୍ଥାନୀୟ ଏସ୍ପି ସନ୍ତୋଷ କୁମାର ସିଂ କହିଛନ୍ତି ଯେ, ବରିଶା ଜୁଲାଇ ୨୩ଠାରୁ ନିଖୋଜ ଥିଲେ। ଜୁଲାଇ ୨୭ରେ ଜଣେ ମହିଳାଙ୍କ କ୍ଷତବିକ୍ଷତ ମୃତଦେହ ଏକ ସୁଟକେସ୍ରୁ ଗାଜିଆବାଦ୍ର ସାହିବାବାଦ୍ରୁ ମିଳିଥିଲା। ଏହାକୁ ବରିଶାଙ୍କ ମୃତଦେହ ବୋଲି ପୋଲିସ ଧରିନେଇଥିଲା। ଏହାକୁ ବରିଶାଙ୍କ ପରିବାର ସଦସ୍ୟ ମଧ୍ୟ ଚିହ୍ନଟ କରିଥିଲେ।
