ଦାରିଙ୍ଗବାଡି,୮ା୧୧(ଅରୁଣ ସାହୁ): କନ୍ଧମାଳ ଜିଲାର ଦାରିଙ୍ଗବାଡି ଓଡ଼ିଶାର କଶ୍ମୀର ଭାବେ ପରିଚିତ। ଶୀତ ଋତୁରେ ଏଠାକୁ ପର୍ଯ୍ୟଟକଙ୍କ ଭିଡ ଲାଗିଥାଏ। ତେବେ ଦାରିଙ୍ଗବାଡ଼ି ବଜାର ସମେତ ପର୍ଯ୍ୟଟନକ୍ଷେତ୍ର ଆଦିରେ କୁଢ଼କୁଢ଼ ଅଳିଆ ଯୋଗୁ ଦାରିଙ୍ଗବାଡକୁ ଆସୁଥିବା ପର୍ଯ୍ୟଟକ ନାକ ଟେକୁଛନ୍ତି। ଏ ନେଇ ଧରିତ୍ରୀରେ ଖବର ପ୍ରକାଶ ପାଇଥିଲା।
ଏହି ଆବର୍ଜନା ପରିବେଶକୁ ଦୂଷିତ କରୁଥିବା ବେଳେ ପଞ୍ଚାୟତ ଓ ପଞ୍ଚାୟତ ସମିତି କାର୍ଯ୍ୟାଳୟର ଅବହେଳାକୁ ନେଇ ମଧ୍ୟ ଖବର ପ୍ରକାଶ ପାଇଥିଲା। ଏହି ଖବର ପ୍ରକାଶ ପରେ ଉଭୟ ପ୍ରଶାସନ ପକ୍ଷରୁ ତତ୍ପରତା ଦେଖାଯାଇଛି। ଶୁକ୍ରବାର ଦାରିଙ୍ଗବାଡି ରାଇକିଆ ରାସ୍ତାର ପଲେ ନିକଟ ଜଙ୍ଗଲରେ ବର୍ଜ୍ୟବସ୍ତୁ ପରିଚାଳନା ପାଇଁ ଅଳିଆ ପକାଯିବାକୁ କୁଣ୍ଡ ନିର୍ମାଣ କରାଯିବା ପାଇଁ ଭିତ୍ତିପ୍ରସ୍ତର ସ୍ତାପନ କରାଯାଇଛି।
ବିଡିଓ ପ୍ରୀତିରଞ୍ଜନ ରଥ, ବ୍ଲକ ଅଧ୍ୟକ୍ଷ ସୁଶାନ୍ତ କୁମାର ପ୍ରଧାନ, ସହକାରୀ ନିର୍ବାହୀ ଯନ୍ତ୍ରୀ ଶିଶିର ପାତ୍ର, କନିଷ୍ଠ ଯନ୍ତ୍ରୀ ଧିରେନ ସେଠି, ବିପିଏମ୍ ପିଣ୍ଟୁ ନାୟକ, ସରପଞ୍ଚ ସୁଶ୍ରୀ ଚନ୍ଦ୍ରିକା ମଲିକ ପ୍ରମୁଖ ପହଞ୍ଚି ଭିତ୍ତିପ୍ରସ୍ତର କରିଥିଲେ। ୧୦ ଲକ୍ଷ ଟଙ୍କା ବିନିମୟରେ ଏହି ବର୍ଜ୍ୟବସ୍ତୁ ପରିଚାଳନା କୁଣ୍ଡ ନର୍ମାଣ କରାଯିବ ବୋଲି ବିଡ଼ିଓ ରଥ କହିଛନ୍ତି। ଶୀଘ୍ର କାର୍ଯ୍ୟ ସମ୍ପୂର୍ଣ୍ଣ କରାଯାଇ କାର୍ଯ୍ୟରେ ବ୍ୟବହାର କରାଯିବ। ବଜାରରୁ ଅଳିଆ ବୋହିବା ପାଇଁ ସୋଲାର ଚାଳିତ ୨ଟି ଗାଡି ମଧ୍ୟ ଏଥିରେ ନିୟୋଜିତ କରାଯିବ। ପରିଚାଳନା ପାଇଁ ଲୋକଙ୍କୁ ନିଯୁକ୍ତି ଦିଆଯିବ ବୋଲି ବିଡ଼ିଓ କହିଛନ୍ତି।
ସୂଚନାଯୋଗ୍ୟ, ଦାରିଙ୍ଗବାଡକୁ ପର୍ଯ୍ୟଟକ ମାନେ ଆସୁଥିବା ବେଳେ ଦୈନିକ ଦୋକାନ, ହୋଟେଲ, ରେଷ୍ଟୁରାଣ୍ଟ ଆଦିରେ ଭିଡ଼ ଜମୁଛି ଅଇଁଠା ଖଲି ପତ୍ର ସହ ଚା କପ, ପ୍ଲାଷ୍ଟିକ, ପଲିଥିନ ବିଭିନ୍ନ ସ୍ଥାନରେ ପଡ଼ି ପରିବେଶ ଦୂଷିତ କରୁଛି। ବର୍ଜ୍ୟବସ୍ତୁ ପରିଚାଳନା କରିବାକୁ ଜମି ଯୋଗାଇଦେବାକୁ ପଞ୍ଚାୟତ ପକ୍ଷରୁ ଏକାଧିକ ଥର ଦାବି କରାଯାଇଥିବା ବେଳେ ବଣିକ ସଙ୍ଘ, ହୋଟେଲ ସଙ୍ଘ ମଧ୍ୟ ବର୍ଜ୍ୟବସ୍ତୁ ପରିଚାଳନା ପାଇଁ ପ୍ରଶାସନ ନିକଟରେ ଦାବି କରିଆସୁଥିଲା। ଏବେ ପ୍ରଶାସନର ପଦକ୍ଷେପ ନେବାପାରେ ହୋଟେଲ ସଙ୍ଘର ସଭାପତି ଗିରିଶ ଚନ୍ଦ୍ର ସାହୁ, ସମ୍ପାଦକ ଲଡ଼ୁ କିଶୋର ସାହୁ, ଦିଲୀପ କୁମାର ସାହଙ୍କ ସମେତ ସଙ୍ଘ ପକ୍ଷରୁ ପ୍ରଶାସନକୁ ସାଧୁବାଦ ଜଣାଇଛନ୍ତି।
