ଓ୍ବାର୍ସ (ପୋଲାଣ୍ଡ), ୭ା୮ (ଏପି)-ଡଚ୍ ସାଇକ୍ଲିଷ୍ଟ ଫାବିଓ ଜାକବସେନ୍ ଏବେ କୋମା ଅବସ୍ଥାରେ ଚିକିତ୍ସିତ ହେଉଛନ୍ତି। ପୋଲାଣ୍ଡରେ ଚାଲିଥିବା ଟୁର୍ ଡି’ ପୋଲୋନେ ରେସ୍ର ଫାଇନାଲ ଷ୍ଟ୍ରେଚ୍ରେ ଦୁଘର୍ଟଣା ଯୋଗୁ ତାଙ୍କ ମସ୍ତିଷ୍କରେ ଗଭୀର ଆଘାତ ଲାଗିଛି। ବୁଧବାର ଇଭେଣ୍ଟର ଓପନିଂ ଷ୍ଟେଜ୍ ଶେଷ ଭାଗରେ ବିଜୟୀ ହେବାଲାଗି ଉଦ୍ୟମ କରୁଥିବା ବେଳେ ନିଜ ଦେଶର ତଥା ଡଚ୍ ସାଇକ୍ଲିଷ୍ଟ ଡାଇଲାନ୍ ଗ୍ରୋଏନିଓ୍ବିଗେନ୍ଙ୍କ ସହିତ ଧକ୍କା ହେବାରୁ ସେ ରାସ୍ତାକଡ଼ ବାଡ଼ରେ ପିଟି ହୋଇ ତଳେ ପଡ଼ିଯାଇଥିଲେ। ଡେସଉନିକ୍ କ୍ୱିକ୍-ଷ୍ଟେପ୍ ଟିମ୍ ତରଫରୁ ରେସ୍ କରୁଥିବା ଜାକବସେନ୍ଙ୍କୁ ବିମାନ ଯୋଗେ ହସ୍ପିଟାଲ ନିଆଯାଇଥିଲା। ରେସ୍ ଡାଇରେକ୍ଟର ଜେସ୍ଲା ଲାଙ୍ଗ୍ ଏହି ଦୁର୍ଘଟଣା ପାଇଁ ଗ୍ରୋଏନିଓ୍ବିଗେନ୍ଙ୍କୁ ଦାୟୀ କରିଛନ୍ତି। ଏହି ରାଇଡରଙ୍କ ଆକ୍ସନ ଠିକ୍ ନ ଥିଲା ବୋଲି ସେ କହିଛନ୍ତି। ଗ୍ରୋଏନିଓ୍ବିଗେନ୍ ତାଙ୍କ ଟ୍ରାଜେକ୍ଟୋରି ବଦଳାଇଥିଲେ ଏବଂ ଜାକବସେନଙ୍କୁ ତାଙ୍କ ଡାହାଣପାର୍ଶ୍ୱକୁ ଯିବା ଲାଗି ଚାପ ସୃଷ୍ଟି କରିଥିଲେ। ଏହି ପରିସ୍ଥତିିରେ ତାଙ୍କ କହୁଣି ଜାକବସେନ୍ଙ୍କ ଦେହରେ ବାଜିବାରୁ ସେ ସନ୍ତୁଳନ ହରାଇଥିଲେ ବୋଲି କହିଛନ୍ତି। ସୂଚନାଯୋଗ୍ୟ, ପୂର୍ବତନ ସାଇକ୍ଲିଷ୍ଟ ଲାଙ୍ଗ୍ ୧୯୮୦ ଅଲିମ୍ପିକ ରୋଡ୍ ରେସ୍ରେ ପୋଲାଣ୍ଡ ପାଇଁ ରୌପ୍ୟ ଜିତିଥିଲେ। ଓପନିଂ ଷ୍ଟେଜ୍ରେ ଜାକବସେନଙ୍କୁ ବିଜେତା ଘୋଷଣା କରାଯାଇଥିଲା। ଦୁର୍ଘଟଣା ଘଟାଯାଇଥିବାରୁ ଗ୍ରୋଏନିଓ୍ବିଗେନ୍ଙ୍କୁ ଅଯୋଗ୍ୟ ଘୋଷଣା କରାଯାଇଥିଲା। ଏହି ରାଇଡର ଜାକବସେନ୍ଙ୍କ ବ୍ୟତୀତ ଜଣେ ରେଫରିଙ୍କ ସମେତ ଅନ୍ୟ କେତେଜଣ ସାଇକ୍ଲିଷ୍ଟଙ୍କୁ ଆହତ କରିଥିଲେ। ଦୁର୍ଘଟଣାଟି ଦକ୍ଷିଣାଞ୍ଚଳ ସହର କାଟୋଓ୍ବାଇସ୍ରେ ହୋଇଥିଲା। ବର୍ଷକ ପୂର୍ବେ ଏହି ସ୍ଥାନରେ ଅନ୍ୟଏକ ଦୁର୍ଘଟଣାରେ ବେଲଜିଆନ ସାଇକ୍ଲିଷ୍ଟ ବର୍ଗ ଲାମ୍ବ୍ରେଟ୍ ଗୁରୁତର ଭାବେ ଆହତ ହୋଇ ହସ୍ପିଟାଲରେ ଭର୍ତ୍ତି ହୋଇଥିଲେ। ସେଠାରେ ତାଙ୍କର ମୃତ୍ୟୁ ଘଟିଥିଲା। ଟୁର୍ ଡି’ ପୋଲୋନେର ୭୬ତମ ସଂସ୍କରଣ ରେସ୍ର ତୃତୀୟ ଷ୍ଟେଜ୍ରେ ବର୍ଗ ଏକ କଂକ୍ରିିଟ ବାଡ଼ରେ ପିଟି ହୋଇଯାଇଥିଲେ।
