ବେଙ୍ଗାଲୁରୁ,୨୦ା୧୧(ପି.ଟି.): ବିଶ୍ୱରେ ଘଟୁଥିବା ହାରାହାରି ସାଇବର ଅପରାଧ ତୁଳନାରେ ଭାରତରେ ଏହା ପାଖାପାଖି ୨ ଗୁଣ ବୋଲି ନ୍ୟାଶନାଲ ସାଇବରସିକ୍ୟୁରିଟି କୋଅର୍ଡିନେଟର ଏମ୍.ୟୁ. ନାୟାର ରବିବାର କହିଛନ୍ତି। ସିନର୍ଜିଆ କନ୍କ୍ଲେଭ୍ ୨୦୨୩ରେ ‘ଆଲାଇନିଂ ଟେକ୍ନୋଲୋଜିଜ୍ ଟୁ ଫ୍ୟୁଚର କନ୍ଫ୍ଲିକ୍ଟସ୍’ ଉପରେ ଉଦ୍ବୋଧନ ଦେଇ ନାୟାର କହିଛନ୍ତି, ଗତ ୧୦ ମାସରେ ହାରାହାରି ରାନ୍ସମ୍ଓ୍ବେର ଆଟାକ୍ ପାଖାପାଖି ୧.୫୪ ବିଲିୟନ ଡଲାର ଉପରେ ହୋଇଛି, ଯାହାକି ୨୦୨୨ ପରଠାରୁ ଦୁଇଗୁଣ। ଏଭଳି ଅପରାଧ ମଧ୍ୟରୁ ଅଧିକାଂଶର ରିପୋର୍ଟ ହେଉ ନ ଥିବାରୁ ଉଲ୍ଲେଖ ହୋଇଥିବା ପେମେଣ୍ଟ ପ୍ରକୃତ ସାଇବର ଠକେଇ ତୁଳନାରେ ଯଥେଷ୍ଟ କମ୍ ବୋଲି ସେ କହିଛନ୍ତି। ଗତ ୬ ମାସରେ ହାରାହାରି ୨,୧୨୭ ଥର ସାଇବର ଘଟଣା ଘଟିଥିବା ଭାରତୀୟ ସାଇବରସ୍ପେସ୍ ଦେଖିବାକୁ ପାଇଛି। ବିଶ୍ୱ ସ୍ତରରେ ଏହା ହାରାହାରି ୧,୧୦୮ ଥର।
ସାଇବରସ୍ପେସ୍ରେ ଏଭଳି କ୍ଷତିକାରକ କାର୍ଯ୍ୟକୁ ରୋକିବା ପାଇଁ ବାସ୍ତବରେ ସବୁ ଦେଶ ଏକାଠି ହେବାର ସମୟ ଆସିଥିବା ନାୟାର କହିଛନ୍ତି। ଜାତିସଂଘ ଏବଂ ଆଞ୍ଚଳିକ ଫୋରମ୍ଗୁଡ଼ିକ ଏ ଦିଗରେ ଅନେକ ପଦକ୍ଷେପ ନେଇଛନ୍ତି। ସାଇବରସ୍ପେସ୍ କୌଣସି ଦେଶ ମଧ୍ୟରେ ସୀମିତ ନ ଥିବାରୁ ଏହାର ସମାଧାନ ପାଇଁ ସମସ୍ତ ଦେଶର ମିଳିତ ଉଦ୍ୟମ ଆବଶ୍ୟକ। ସାଇବର ସୁରକ୍ଷା ସହ ସମ୍ପୃକ୍ତ ଚ୍ୟାଲେଞ୍ଜଗୁଡ଼ିକର ସମାଧାନ ପାଇଁ ଅନେକ ଅନ୍ତର୍ଜାତୀୟ ପଦକ୍ଷେପ ନିଆଗଲାଣି। ସେଥିରୁ ଉଲ୍ଲେଖନୀୟ ଉଦ୍ୟମ ହେଲା ଜାତିସଂଘର ସରକାରୀ ବିଶେଷଜ୍ଞମାନଙ୍କ ଗ୍ରୁପ୍ (ୟୁଏନ୍ ଜିଜିଇ)। ଜାତିସଂଘ ସାଧାରଣ ସଭା ଏହାକୁ ନିଯୁକ୍ତି ଦେଇଛି। ୨୦୨୧ରେ ୟୁଏନ୍ ଜିଜିଇ ଏକ ରିପୋର୍ଟ ଗ୍ରହଣ କରିଥିଲା, ଯାହାର ଅନ୍ତର୍ଜାତୀୟ ସାଇବର ସିକ୍ୟୁରିଟି ବିକାଶରେ ଗୁରୁତ୍ୱପୂର୍ଣ୍ଣ ଅବଦାନ ରହିଛି। ଏହା ଅନ୍ତର୍ଜାତୀୟ ନିୟମ ଓ ସିଦ୍ଧାନ୍ତର ବିକାଶ କରିବା, ଅନ୍ତର୍ଜାତୀୟ ସହଯୋଗ ବଢ଼ାଇବା, ଜାତୀୟ ସାଇବର ସୁରକ୍ଷା ସାମର୍ଥ୍ୟକୁ ବଢ଼ାଇବା ପାଇଁ ସୁପାରିସ କରିଥିଲା। ଆପରାଧିକ ଉଦ୍ଦେଶ୍ୟରେ ବ୍ୟବହୃତ ଆଇସିଟିର ମୁକାବିଲା ପାଇଁ ବିସ୍ତୃତ ଅନ୍ତର୍ଜାତୀୟ ସମ୍ମିଳନୀ ଆୟୋଜନ କରିବାରେ ଏକ ଅସ୍ଥାୟୀ କମିଟି ସହଯୋଗ କରୁଥିବା ନାୟାର କହିଛନ୍ତି।
