ଯୋଧପୁର,୩।୫: ଗତ କିଛି ଦିନରୁ ଦେଶରେ ସାମ୍ପ୍ରଦାୟିକ ହିଂସା ଦେଖିବାକୁ ମିଳିଛି। ଏହି କ୍ରମରେ ରାଜସ୍ଥାନ ମଧ୍ୟ ବାଦ୍ ପଡ଼ିନି। ରାଜସ୍ଥାନର ଯୋଧପୁରରେ ସୋମବାର ବିଳମ୍ବିତ ରାତିରେ ପତାକା ଓ ଲାଉଡସ୍ପିକରକୁ ନେଇ ହୋଇଥିବା ବିବାଦ ଥମିବାର ନା ନେଉନି। ମଙ୍ଗଳବାର ସକାଳେ ମଧ୍ୟ ଏହାର ପ୍ରଭାବ ଦେଖିବାକୁ ମିଳିଛି। ସକାଳେ ନମାଜ ପଢ଼ା ସରିବା ପରେ ଏଠାରେ ହିଂସାକାଣ୍ଡ ଘଟିବା ସହ ପଥରମାଡ଼ ହୋଇଥିଲା। ଏହାକୁ ରୋକିବା ପାଇଁ ପୋଲିସ ପକ୍ଷରୁ ଲାଠିଚାର୍ଜ କରାଯିବା ସହ ଲୁହ ବୁହା ଗ୍ୟାସ ପ୍ରଯୋଗ କରାଯାଇଥିଲା। ଏହି ହିଂସା ଏତେ ବଢ଼ିଯାଇଥିଲା ଯେ, ଏହା ସିଧାସଳଖ ଭାଜପା ବିଧାୟକଙ୍କ ଘରେ ପହଞ୍ଚିଥିଲା। ଭାଜପା ବିଧାୟକ ସୂର୍ଯ୍ୟକାନ୍ତ ବ୍ୟାସଙ୍କ ଘର ବାହାରେ ଦୁର୍ବୃତ୍ତମାନେ ବାଇକ୍ରେ ନିଆଁ ଲଗାଇଦେଇଥିବା ଜଣାପଡ଼ିଛି। ଏହି ସବୁ ଘଟଣାରେ ବର୍ତ୍ତମାନ ପର୍ଯ୍ୟନ୍ତ ପୋଲିସ ୩ଜଣଙ୍କୁ ଗିରଫ କରିଛି। ଏତଦ୍ ବ୍ୟତୀତ ସହରରେ ଶାନ୍ତି ରକ୍ଷା କରିବା ଲାଗି ଯୋଧପୁରର ୧୦ଟି ଥାନା ଅଞ୍ଚଳରେ କର୍ଫ୍ୟୁ ଲଗାଯାଇଛି। ଏହି କର୍ଫ୍ୟୁ ମେ’୪ ପର୍ଯ୍ୟନ୍ତ ଜାରି ରହିବ। ଏହି ହିଂସା ଘଟଣା ପରେ ରାଜସ୍ଥାନ ସରକାର ଏକ ଉଚ୍ଚସ୍ତରୀୟ ବୈଠକ ଡକାଇଛନ୍ତି। ଏଥିରେ ଡିଜିପି ଓ ଅନ୍ୟ ଅଧିକାରୀ ସାମିଲ ହୋଇଛନ୍ତି। ଅନ୍ୟପଟେ ଏହି ଘଟଣା ପରେ ମୁଖ୍ୟମନ୍ତ୍ରୀ ଅଶୋକ ଗେହଲଟ ଦୁଃଖ ପ୍ରକାଶ କରିଛନ୍ତି। ଏଥିସହ ନିଜ ଜନ୍ମିଦିନ ଅବସରରେ ଆୟୋଜିତ ହୋଇଥିବା ସମସ୍ତ କାର୍ଯ୍ୟକ୍ରମକୁ ସେ ସ୍ଥଗିତ ରଖିଦେଇଛନ୍ତି।
