ମୁମ୍ବାଇ, ୨୩।୮ : ଗୁଜରାଟରେ ୨୦୦୨ରେ ହୋଇଥିବା ଦଙ୍ଗା ସମୟରେ ବିଲ୍କିସ ବାନୋଙ୍କୁ ଗଣ ବଳାତ୍କାର କରିଥିବା ଅପରାଧୀଙ୍କୁୂ ଫୁଲମାଳ ପିନ୍ଧାଇ ସ୍ବାଗତ କରାଯିବା ଘଟଣାରେ ମହାରାଷ୍ଟ୍ର ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନଭିସ ମୁହଁ ଖୋଲିଛନ୍ତି। ସେ କହିଛନ୍ତି ଯେ ଗୁଜରାଟ ହାଇକୋର୍ଟଙ୍କ ନିର୍ଦ୍ଦେଶ ଅନୁସାରେ ଏସବୁ ୧୧ ଜଣ ଅପରାଧୀଙ୍କୁ ମୁକ୍ତ କରାଯାଇଛି। ମାତ୍ର କୌଣସି ଅପରାଧୀଙ୍କୁ ସ୍ବାଗତ କରାଯିବା ଦୁଃଖର ବିଷୟ। ଏଭଳି କେବେ ମଧ୍ୟ ଠିକ ନୁହେଁ।
ଫଡନଭିସଙ୍କ ଏଭଳି ମନ୍ତବ୍ୟ ନେଇ ଏବେ ରାଜନୈତିକ ମହଲରେ ଚର୍ଚ୍ଚା ଆରମ୍ଭ ହୋଇଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଅଗଷ୍ଟ ୧୫ରେ ମହୀଳା ସଶକ୍ତି କରଣ ଏବଂ ମହିଳାଙ୍କୁ ସମ୍ମାନ ବିଷୟରେ କହିବାର କିଛି ଘଣ୍ଟା ପରେ ଆଜୀବନ କାରାଦଣ୍ଡରେ ଦଣ୍ଡିତ ହୋଇଥିବା ଏହି ଅପରାଧୀଙ୍କୁ ମୁକ୍ତ କରାଯାଇଥିଲା। ଏନେଇ ଦେଶବ୍ୟାପି ବିରୋଧୀ ଦଳଙ୍କ ପକ୍ଷରୁ କଡ଼ା ସମାଲୋଚନା କରାଯାଇଥିଲା।
