ନୂଆଦିଲ୍ଲୀ,୨୩।୮: ଦୀର୍ଘଦିନ ଧରି ବ୍ୟାଟ୍ରେ କମାଲ ଦେଖାଇପାରୁନାହାନ୍ତି ବିଶ୍ୱର ଅନ୍ୟତମ ଶ୍ରେଷ୍ଠ ବ୍ୟାଟ୍ସମ୍ୟାନ୍ ଭାବେ ପରିଗଣିତ ବିରାଟ କୋହଲି। ନଭେମ୍ବର ୨୦୧୯ରେ ସେ ଶେଷ ଅନ୍ତର୍ଜାତୀୟ ମୁକାବିଲା ଖେଳିଥିଲେ। ଏହାପରଠାରୁ ସେ ସଂଘର୍ଷ କରିଆସୁଛନ୍ତି। ସେ ପୁଣିଥରେ ଫର୍ମକୁ ଫେରି ବଡ଼ ଇନିଂସ ଖେଳନ୍ତୁ ବୋଲି ପ୍ରଶଂସକ ଆଶା ବାନ୍ଧିଥିବା ବେଳେ ଏବେ ଏସିଆ କପ୍ ପୂର୍ବରୁ ଭାରତର ପୂର୍ବତନ କୋଚ୍ ରବି ଶାସ୍ତ୍ରୀ ବଡ଼ ବୟାନ ଦେଇଛନ୍ତି। କୋହଲି ମାତ୍ର ଗୋଟିଏ ଭଲ ଇନିଂସରେ ଫର୍ମକୁ ଫେରିଆସିବେ। ଯଦି ଏସିଆ କପ୍ ପୂର୍ବ ମ୍ୟାଚ୍ରେ ସେ ଅର୍ଦ୍ଧଶତକ କରିବାରେ ସଫଳ ହୁଅନ୍ତି ତେବେ ତାଙ୍କୁ ନେଇ ହେଉଥିବା ସମାଲୋଚନା ଆପେଆପେ ବନ୍ଦ ହୋଇଯିବ ବୋଲି ଶାସ୍ତ୍ରୀ କହିଛନ୍ତି।
ଷ୍ଟାର ସ୍ପୋଟ୍ସ ଦ୍ୱାରା ଆୟୋଜିତ ଖବରଦାତା ସମ୍ମିଳନୀରେ ଶାସ୍ତ୍ରୀ କହିଛନ୍ତି, ମୁଁ କୋହଲିଙ୍କ ସହ ବହୁତ ଦିନକରୁ କଥା ହୋଇନାହିଁ। ହେଲେ କିମ୍ବଦନ୍ତୀମାନେ ସର୍ବଦା ସଠିକ ସମୟରେ ହିଁ ନିଦରୁ ଉଠନ୍ତି। ଏସିଆ କପ୍ ପୂର୍ବଯାଏ ତାଙ୍କର ଖରାପ ସମୟ ଚାଲିଥିଲା। ତାଙ୍କୁ ଚମକିବା ଲାଗି ସଠିକ ସୁଯୋଗ ମିଳିଛି। ଯଦି ସେ ପାକିସ୍ତାନ ବିପକ୍ଷରେ ଅର୍ଦ୍ଧଶତକ କରିନିଅନ୍ତି ତେବେ ଲୋକଙ୍କ କହିବା ବନ୍ଦ ହୋଇଯିବ। ଗୋଟିଏ ଇନିଂସରୁ ହିଁ ଫରକ ସୃଷ୍ଟି ହେବ। ପ୍ରଥମରୁ ଯାହା ହୋଇଛି ତାହା ଇତିହାସ। ଲୋକମାନଙ୍କ ସ୍ମୃତି ବହୁତ ଛୋଟ। ଏମିତି କୌଣସି ଭାରତୀୟ କ୍ରିକେଟର ନାହିଁ ଯିଏ କୋହଲିଙ୍କଠାରୁ ଅଧିକ ଫିଟ୍। ସେ ମେଶିନ। ଯଦି ସେ ନିଜର ମୁଣ୍ଡକୁ ଠିକ୍ ସ୍ଥାନରେ ରଖନ୍ତି ତେବେ ଫର୍ମକୁ ଫେରିବାକୁ ଗୋଟିଏ ଇନିଂସ ଅଧିକ ହେବ ବୋଲି ସେ କହିଛନ୍ତି।
