ନୂଆଦିଲ୍ଲୀ, ୧୨।୧୦: ମଥୁରାର ବୃନ୍ଦାବନସ୍ଥିତ ରାଧା କୁଟୀ ଆଶ୍ରମରେ ସାଧୁସନ୍ଥମାନେ ଶ୍ରୀକୃଷ୍ଣ ଜନ୍ମଭୂମି ମାମଲାର ପକ୍ଷକାର ଦିନେଶ ଫଳାହାରୀଙ୍କୁ ‘ବ୍ରଜ ରତ୍ନ’ ସମ୍ମାନରେ ସମ୍ମାନିତ କରିଛନ୍ତି। ଭଗବାନ ଶ୍ରୀକୃଷ୍ଣଙ୍କ ଜନ୍ମଭୂମି ପାଇଁ ତାଙ୍କର ସଂଘର୍ଷ ଓ ତ୍ୟାଗକୁ ସମ୍ମାନ ଜଣାଇ ଏହି ପୁରସ୍କାର ପ୍ରଦାନ କରାଯାଇଛି। ଏହି ଅବସରରେ ଫଳାହାରୀ କହିଛନ୍ତି ଯେ ସେ କେବେ କୌଣସି ସାଧୁଙ୍କୁ ଅପମାନିତ କରିନାହାନ୍ତି।
ସମାରୋହର ଆରମ୍ଭ ଶ୍ରୀକୃଷ୍ଣଙ୍କ ରଜତ ଶିଳାର ପୂଜାର୍ଚ୍ଚନାରୁ ହୋଇଥିଲା। ସାଧୁସନ୍ଥମାନେ ଏକ ସ୍ବରରେ ଦିନେଶ ଫଳାହାରୀଙ୍କୁ ବ୍ରଜର ଗୌରବ ବୋଲି କହିଥିଲେ। ସେମାନେ କହିଥିଲେ ଯେ ଫଳାହାରୀ କେବଳ ଫଳାହାର କରି ଭଗବାନ ଶ୍ରୀକୃଷ୍ଣଙ୍କ ଜନ୍ମଭୂମି ମାମଲା ଲଢ଼ୁଛନ୍ତି। କିଛି ଲୋକ ଈର୍ଷା କାରଣରୁ ତାଙ୍କୁ ବଦନାମ କରିବା ପାଇଁ ଷଡ଼ଯନ୍ତ୍ର କରୁଥିବା ମଧ୍ୟ ସାଧୁସନ୍ଥମାନେ ଅଭିଯୋଗ କରିଥିଲେ।
ଦିନେଶ ଫଳାହାରୀ କହିଥିଲେ ଯେ ସେ କେବେ କୌଣସି ସାଧୁଙ୍କୁ ଅପମାନ କରିନାହାନ୍ତି। ତାଙ୍କ ବିଷୟରେ ଭ୍ରମାତ୍ମକ କଥା ପ୍ରଚାର କରୁଥିବା ଲୋକଙ୍କୁ ମଧ୍ୟ ସେ ଜବାବ ଦେଇଛନ୍ତି।
ଏହି କାର୍ଯ୍ୟକ୍ରମରେ ମହାମଣ୍ଡଳେଶ୍ୱର ରାମକୃଷ୍ଣ ମହାରାଜ ଏବଂ ଜୁନା ଆଖଡ଼ାର ପ୍ରଜ୍ଞାନନ୍ଦ ଗିରି ମଧ୍ୟ ନିଜ ମତ ରଖିଥିଲେ। ସେମାନେ କହିଥିଲେ ଯେ ଭଗବାନ ଶ୍ରୀକୃଷ୍ଣଙ୍କ ରଜତ ଶିଳାର ପୂଜା ଦେଶର ବିଭିନ୍ନ ସ୍ଥାନରେ ଚାଲିଛି। ଅଖାଡ଼ା ପରିଷଦ ମଧ୍ୟ ଏହି ପୂଜାକୁ ସମର୍ଥନ ଜଣାଇଛି। କିଛି ଲୋକ ଭକ୍ତିର ଶକ୍ତିକୁ ନେଇ ଅସହଜ ଅନୁଭବ କରୁଥିବା ସେମାନେ କହିଥିଲେ।
ଶିଳ୍ପପତି ରୂପ ସିଂହ ନାଗର ଓ ପ୍ରଶାନ୍ତ ତ୍ୟାଗୀ ଦିନେଶ ଫଳାହାରୀଙ୍କ ଉଦ୍ୟମକୁ ପ୍ରଶଂସା କରିଥିଲେ। ସେମାନଙ୍କ କହିବା ଅନୁସାରେ, ଫଳାହାରୀ ଶ୍ରୀକୃଷ୍ଣ ଜନ୍ମଭୂମି ଲଢ଼େଇକୁ ଜାତୀୟ ସ୍ତରରେ ପହଞ୍ଚାଇଛନ୍ତି। ଏହି ଲଢ଼େଇ ଏବେ ଅନ୍ତର୍ଜାତୀୟ ସ୍ତରରେ ମଧ୍ୟ ପହଞ୍ଚିଛି। ମଥୁରାରେ ଖୁବଶୀଘ୍ର ଭଗବାନ ଶ୍ରୀକୃଷ୍ଣଙ୍କ ଏକ ଭବ୍ୟ ମନ୍ଦିର ନିର୍ମାଣ ହେବ ବୋଲି ସେମାନେ ଆଶା ପ୍ରକାଶ କରିଥିଲେ।
ବିହାରୀ ଲାଲ ବଶିଷ୍ଠ ଏବଂ ମହାମଣ୍ଡଳେଶ୍ୱର ଆଦିତ୍ୟାନନ୍ଦ ମହାରାଜ ମଧ୍ୟ ନିଜ ମତ ରଖିଥିଲେ। ସେମାନେ କହିଥିଲେ ଯେ ବ୍ରଜବାସୀଙ୍କୁ ସମାଲୋଚନା କରି କେହି ନିଜକୁ ସନାତନୀ ବୋଲି କହିପାରିବେ ନାହିଁ। ସନ୍ଥ ପ୍ରେମାନନ୍ଦ ମହାରାଜ ଜଣେ ପୂଜନୀୟ ସନ୍ଥ। ଦିନେଶ ଫଳାହାରୀଙ୍କ ତ୍ୟାଗକୁ ମଧ୍ୟ ଭୁଲି ହେବ ନାହିଁ। ସମସ୍ତ ବିବାଦର ଅନ୍ତ ଘଟାଇ ସନାତନ ଧର୍ମକୁ ଦୃଢ଼ତାର ସହ ଶିଖରରେ ପହଞ୍ଚାଇବାକୁ ସେମାନେ ଆହୱାନ ଦେଇଥିଲେ। ସନ୍ଥ ପ୍ରେମାନନ୍ଦ ମହାରାଜଙ୍କ ଦରବାରକୁ କ୍ରିକେଟର ବିରାଟ କୋହଲି ଆସିବା ପାଇଁ ୫ କୋଟି ଟଙ୍କା ଦେଇଥିବା ଅଭିଯୋଗ କରିଥିବା ଦିନେଶ ଫଳାହାରୀ ଏବେ ଏହି ପ୍ରସଙ୍ଗରେ ନିଜ ମତ ରଖିଛନ୍ତି। ସେ କହିଛନ୍ତି, ଯଦି ପ୍ରେମାନନ୍ଦ ମହାରାଜ ନିଜେ ସ୍ପଷ୍ଟ କରନ୍ତି ଯେ ବିରାଟ କୋହଲି କୌଣସି ଟଙ୍କା ନେଇନାହାନ୍ତି, ତେବେ ସେ ମହାରାଜଙ୍କ ପାଦତଳେ ବସି କ୍ଷମା ମାଗିବେ।
ବିରାଟ କୋହଲିଙ୍କ ମୁଖପାତ୍ର ଫଳାହାରୀଙ୍କ ଅଭିଯୋଗକୁ ନିରାଧାର ବୋଲି କହିବା ପରେ ଗୁରୁବାର ତାଙ୍କର ଏହି ବୟାନ ସାମ୍ନାକୁ ଆସିଥିଲା।
ଦିନେଶ ଫଳାହାରୀ କହିଛନ୍ତି ଯେ ପ୍ରେମାନନ୍ଦ ମହାରାଜ କେବେ ମିଛ କୁହନ୍ତି ନାହିଁ ବୋଲି ତାଙ୍କର ବିଶ୍ୱାସ ରହିଛି। ପ୍ରେମାନନ୍ଦ ମହାରାଜ ଜଣେ ପରମ ଜ୍ଞାନୀ ଏବଂ ରାଧାରାଣୀଙ୍କ ଉପାସକ। ତେଣୁ ସେ ନିଜେ ଯଦି ସ୍ପଷ୍ଟ କରନ୍ତି ଯେ ବିରାଟ କୋହଲି କୌଣସି ଟଙ୍କା ନେଇନାହାନ୍ତି, ତେବେ ସେ ନିଜ ବୟାନ ଫେରାଇ ନେବା ସହ କ୍ଷମା ମାଗିବେ।
ଫଳାହାରୀ ନିଜ ବୟାନରେ ଏହା ମଧ୍ୟ ଦାବି କରିଛନ୍ତି ଯେ ବିରାଟ କୋହଲି ପରେ ଅନୁଭବ କରିଥିଲେ ଯେ ସେ ଯେଉଁଭଳି ଭାବରେ ସେଠାକୁ ଆସିଥିଲେ, ତାହା ଉଚିତ ନଥିଲା। ଏହାପରେ ସେ ଅନେକ ଗୁଣ ଅଧିକ ଟଙ୍କା ଫେରାଇଥିବା ମଧ୍ୟ ଫଳାହାରୀ ଦାବି କରିଛନ୍ତି।
ଦିନେଶ ଫଳାହାରୀ ଆହୁରି ଦାବି କରିଛନ୍ତି ଯେ ପ୍ରେମାନନ୍ଦ ମହାରାଜଙ୍କ ଆଶ୍ରମରେ ଚାଲୁଥିବା ଭଣ୍ଡାରା ବା ସାମୂହିକ ଭୋଜନ ବ୍ୟବସ୍ଥା ବିରାଟ କୋହଲିଙ୍କ ଦ୍ୱାରା ପରିଚାଳିତ ହେଉଛି। ତେବେ ଫଳାହାରୀ ବିରାଟ କୋହଲି ଓ ପ୍ରେମାନନ୍ଦ ମହାରାଜଙ୍କ ପ୍ରଶଂସା ମଧ୍ୟ କରିଛନ୍ତି।
ସେ କହିଛନ୍ତି ଯେ ତାଙ୍କର ଉଦ୍ଦେଶ୍ୟ କାହାକୁ ଅପମାନିତ କରିବା ନୁହେଁ। ବରଂ ଏହି ମାମଲାରେ ପ୍ରେମାନନ୍ଦ ମହାରାଜ ନିଜେ ସ୍ଥିତି ସ୍ପଷ୍ଟ କରନ୍ତୁ ବୋଲି ସେ ଚାହୁଁଛନ୍ତି। ତେବେ ଉଭୟ ପକ୍ଷର ବୟାନକୁ ନେଇ ବିବାଦ ତୀବ୍ର ହୋଇଛି।
