ନୂଆଦିଲ୍ଲୀ,୨୩।୩: ଡିଫେଣ୍ଡିଂ ଚାମ୍ପିୟନ ଚେନ୍ନାଇ ସୁପର କିଙ୍ଗ୍ସ (ସିଏସ୍କେ) ୧୬ ତାରିଖରେ ଗତ ଥରର ରନର୍ସଅପ୍ କୋଲକାତା ନାଇଟ୍ ରାଇଡର୍ସ (କେକେଆର୍)କୁ ଭେଟିବାକୁ ଯାଉଛି। ଏହି ମ୍ୟାଚ୍ରେ ସିଏସ୍କେକୁ ଇଂଲଣ୍ଡ ଅଲରାଉଣ୍ଡର ମୋଇନ ଅଲିଙ୍କ ବିନା ଖେଳିବାକୁ ପଡ଼ିବ। ଭିଜା ସମସ୍ୟା ଯୋଗୁ ସେ ଏ ପର୍ଯ୍ୟନ୍ତ ଭାରତରେ ପହଞ୍ଚି ପାରି ନାହାନ୍ତି। ଅଲି ଗୁରୁବାର ସୁଦ୍ଧା ଭାରତରେ ପହଞ୍ଚିଲେ ମଧ୍ୟ ସେ କ୍ୱାରେଣ୍ଟିନ ପ୍ରୋଟୋକଲ କାରଣରୁ ପ୍ରଥମ ମ୍ୟାଚ୍ରେ ଖେଳି ପାରିବେ ନାହିଁ। ତାଙ୍କୁ ୩ ଦିନ ପାଇଁ ବାଧ୍ୟତାମୂଳକ କ୍ୱାରେଣ୍ଟିନରେ ରହିବାକୁ ପଡ଼ିବ ବୋଲି ସ୍ପଷ୍ଟ କରିଛନ୍ତି ସିଏସ୍କେ ସିଇଓ କାସି ବିଶ୍ୱ ନାଥନ।
“ଏହା ନିଶ୍ଚିତ ଯେ, ମୋଇନ ଅଲି ପ୍ରଥମ ମ୍ୟାଚ୍ ଖେଳିପାରିବେ ନାହିଁ। ତାଙ୍କୁ ଏପର୍ଯ୍ୟନ୍ତ ଭିଜା ମିଳିନାହିଁ। ଏ ସମ୍ପର୍କରେ ଆମକୁ ବିସିସିଆଇ ସହଯୋଗ କରୁଛି। ଆସନ୍ତା ଦିନେ କି ଦୁଇ ଦିନ ମଧ୍ୟରେ ଏହାର ସମାଧାନ ହୋଇଯିବ ବୋଲି ଆଶା କରୁଛୁ। ଏହା ଦୁଃଖର ବିଷୟ ଯେ, ସେ ଏବେ ଆମ ସହିତ ଯୋଗ ଦେଇ ନାହାନ୍ତି। ପାକିସ୍ତାନ ବଂଶଦ୍ଭବଙ୍କ ପାଇଁ ଏକ ନିର୍ଦ୍ଧାରିତ ପ୍ରକ୍ରିୟା ରହିଛି। ଏହା ହିଁ ଭିଜା ନ ଆସିବାର କାରଣ ହୋଇଥାଇପାରେ” ବୋଲି ସିଏସ୍କେ ସିଇଓ କହିଛନ୍ତି। ଉଲ୍ଲେଖଯୋଗ୍ୟ, ମୋଇନଙ୍କ ଜେଜେବାପା ପାକିସ୍ତାନ ଅଧିକୃତ କଶ୍ମୀର (ପିଓକେ)ରୁ ଇଂଲଣ୍ଡ ଚାଲି ଯାଇଥିଲେ। ମୋଇନଙ୍କ ଜନ୍ମ ଇଂଲଣ୍ଡରେ ହୋଇଥିଲା। ସେ ବିଭିନ୍ନ ସମୟରେ ଭାରତ ଆସନ୍ତି।
