ଶାରଜା,୨୪।୯: ସ୍ଥାନୀୟ ଶାରଜା ଗ୍ରାଉଣ୍ଡରେ ଶୁକ୍ରବାର ଖେଳାଯାଇଥିବା ଆଇପିଏଲ ମ୍ୟାଚ୍ରେ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର (ଆର୍ସିବି)କୁ ୬ ଉଇକେଟରେ ହରାଇ ଦେଇଛି ଚେନ୍ନାଇ ସୁପର କିଙ୍ଗ୍ସ (ସିଏସ୍କେ)। ଏହି ବିଜୟ ସହ ମହେନ୍ଦ୍ର ସିଂ ଧୋନୀଙ୍କ ସିଏସ୍କେ ୧୪ ପଏଣ୍ଟ ସହ ପୁଣି ଥରେ ଶୀର୍ଷକୁ ଉଠିଛି। ସିଏସ୍କେ ଭଳି ଦିଲ୍ଲୀ କ୍ୟାପିଟାଲ୍ସ ପାଖରେ ମଧ୍ୟରେ ସମାନ ସଂଖ୍ୟକ ପଏଣ୍ଟ ରହିଛି। କିନ୍ତୁ ନେଟ୍ ରନ୍ ରେଟ୍ ଆଧାରରେ ଆଗରେ ରହିଛି ସିଏସ୍କେ। ଅନ୍ୟପକ୍ଷରେ ପରାଜୟ ସତ୍ତ୍ୱେ ତୃତୀୟ ସ୍ଥାନରେ ରହିଛି ବିରାଟ କୋହଲିଙ୍କ ଆରସିବି।
ଆମନ୍ତ୍ରଣ ପାଇ ପ୍ରଥମେ ବ୍ୟାଟିଂ କରିଥିବା ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର (ଆରସିବି)କୁ ଭଲ ଆରମ୍ଭ ଦେଇଥିଲେ ଅଧିନାୟକ ବିରାଟ କୋହଲି ଓ ଦେବଦତ୍ତ ପାଡିକଲ। ଦୁହେଁ ୧୩ ଓଭରରେ ୧୧୧ ରନ୍ କରିଥିଲେ। ଏହାପରେ ଆରସିବିର ମଧ୍ୟକ୍ରମର ଦୁର୍ବୃଳତା ପଦାରେ ପକାଇ ଦେଇଥିଲେ ଚେନ୍ନାଇ ସୁପର କିଙ୍ଗ୍ସ (ସିଏସ୍କେ)ର ବୋଲରମାନେ। ଅନ୍ତିମ ୪ ଓଭରରେ ୫ ଉଇକେଟ ହରାଇବାରୁ ଆରସିବି ଦଳୀୟ ସ୍କୋରରେ ମାତ୍ର ୨୫ ରନ୍ ଯୋଡ଼ିପାରିଥିଲା। ଫଳରେ ୨୦ ଓଭରରେ ୬ ଉଇକେଟ ହରାଇ ୧୫୬ ରନ୍ କରିବାକୁ ସକ୍ଷମ ହୋଇଥିଲା ବାଙ୍ଗାଲୋର। ସିଏସ୍କେ ପାଇଁ ଡ୍ବେନ ବ୍ରାଭୋ ୩ ଉଇକେଟ ନେଇଥିବାବେଳେ ଶାର୍ଦ୍ଦୁଳ ଠାକୁର ହାତେଇଥିଲେ ୨ ଉଇକେଟ।
୧୫୭ ରନ୍ର ଟାର୍ଗେଟ ନେଇ ଓହ୍ଲାଇଥିବା ସିଏସ୍କେ ପାଇଁ ମାପିଚୁପି ଇନିଂସ ଆରମ୍ଭ କରିଥିଲେ ରୁତୁରାଜ ଗାଏକ୍ୱାଡ (୩୮) ଓ ଫାଫ୍ ଡୁ’ ପ୍ଲେସି (୩୧)। ଦୁହେଁ ଆଉଟ୍ ହେବା ପରେ ମୋଇନ ଅଲି ଓ ଅମ୍ବାତି ରାୟୁଡୁ ୩ୟ ଉଇକେଟ ପାଇଁ ଦଳୀୟ ସ୍କୋରରେ ୪୭ ରନ୍ ଯୋଡ଼ିଥିଲେ। ଏହାପରେ ଅଧିନାୟକ ଧୋନୀ (୧୧) ଓ ସୁରେଶ ରାଇନା (୧୭) ଦଳକୁ ୧୯ତମ ଓଭରରେ ଦେଇଥିଲେ ବିଜୟ ଭେଟି। ସିଏସ୍କେ ୧୮.୧ ଓଭରରେ ୪ ଉଇକେଟ ହରାଇ ୧୫୭ ରନ୍ କରି ମ୍ୟାଚ୍ ଜିତି ନେଇଥିଲା। ଆର୍ସିବି ପାଇଁ ହର୍ଶଲ ପଟେଲ ୨ ଉଇକେଟ ହାତେଇଥିଲେ।
