ନୂଆଦିଲ୍ଲୀ,୨୬।୨ : ଚାରି ଦିନିଆ ଗସ୍ତରେ ଡେନମାର୍କର କ୍ରାଉନ ପ୍ରିନ୍ସ ଫ୍ରେଡେରିକ ଆଣ୍ଡ୍ରେ ହେନ୍ରିକ ଖ୍ରୀଷ୍ଟିଆନ ଏବଂ କ୍ରାଉନ ପ୍ରିନ୍ସେସ ମେରି ଏଲିଜାବେଥ ଭାରତରେ ପହଞ୍ଚିଛନ୍ତି। ସେମାନେ ଫେବୃଆରୀ ୨୬ ରୁ ମାର୍ଚ୍ଚ ୨ ପର୍ଯ୍ୟନ୍ତ ଭାରତ ଗସ୍ତରେ ରହିବେ। ଏହି ସୂଚନା ବୈଦେଶିକ ବ୍ୟାପାର ମନ୍ତ୍ରଣାଳୟର ମୁଖପାତ୍ର ଅରିନ୍ଦମ ବାଗଚି ପ୍ରଦାନ କରିଛନ୍ତି। ଦୁଇ ଦଶନ୍ଧି ମଧ୍ୟରେ ଏହା ଡେନମାର୍କ ରାଜ ଦମ୍ପତିଙ୍କ ଭାରତକୁ ପ୍ରଥମ ଗସ୍ତ ବୋଲି ସେ କହିଛନ୍ତି।
ଅରିନ୍ଦମ ବାଗଚିଙ୍କ ଏକ ଟୁଇଟରେ କୁହାଯାଇଛି ଯେ ଏହା ଦୁଇ ଦେଶ ମଧ୍ୟରେ ଘନିଷ୍ଠ ଏବଂ ବନ୍ଧୁତ୍ୱପୂର୍ଣ୍ଣ ସମ୍ପର୍କକୁ ଆହୁରି ମଜବୁତ କରିବ ।
କାର୍ଯ୍ୟସୂଚୀ ଅନୁଯାୟୀ ସେମାନେ ଉପରାଷ୍ଟ୍ରପତି ଜଗଦୀପ ଧନକରଙ୍କ ସହ ଏକ ବୈଠକ କରିବେ। ସେ ଭାରତ-ଡେନମାର୍କ: ପାର୍ଟନର ଫର ଗ୍ରୀନ ଏବଂ ସଷ୍ଟେନେବଲ ଡେଭଲପମେଣ୍ଟ ସିଆଇଆଇ ଦ୍ୱାରା ଆୟୋଜିତ ଉଦଘାଟନୀ ଅଧିବେଶନକୁ ସମ୍ବୋଧିତ କରିବେ। ଏହା ପରେ ସେମାନେ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ମଧ୍ୟ ଭେଟିବେ। ରାଜ ଦମ୍ପତି ଆଗ୍ରାକୁ ଯାଇ ସେଠାରୁ ଚେନ୍ନାଇ ଯିବେ। ଡେନମାର୍କର ବୈଦେଶିକ ମନ୍ତ୍ରୀ ଲାର୍ସ ଲୋକ ରାସମୁସେନ ଏବଂ ଅନ୍ୟ ଅଧିକାରୀମାନେ ମଧ୍ୟ ଭାରତରେ ପହଞ୍ଚିଛନ୍ତି।
ଏହାପୂର୍ବରୁ ୨୦୦୩ରେ କ୍ରାଉନ ପ୍ରିନ୍ସ ଭାରତ ଗସ୍ତ କରିଥିଲେ। ପ୍ରେସ ବିଜ୍ଞପ୍ତି ଅନୁଯାୟୀ, ରାଣୀ ମାର୍ଗାରେଟ ଦ୍ୱିତୀୟ ୨୦୦୩ ରେ କ୍ରାଉନ ପ୍ରିନ୍ସେସ ଭାବରେ ଭାରତ ଗସ୍ତ କରିଥିଲେ।
