ଭଞ୍ଜନଗର,୮।୫(ବାବୁଲା ପ୍ରଧାନ):ଗଞ୍ଜାମ ଜିଲା ଭଞ୍ଜନଗର ଠାକୁରାଣୀ ଯାତ୍ରା ଶୁକ୍ରବାର ୧୩ ଦିନରେ ପହଞ୍ଚିଛି। ଆସନ୍ତା ୨୦ ତାରିଖରେ ବାହୁଡ଼ା ଯାତ୍ରା ପରେ ଯାତ୍ରା ଉଦଯାପିତ ହେବ। ତେଣୁ ଯାତ୍ରାରେ ଦୈନନ୍ଦିନ ସନ୍ଧ୍ୟାରେ ଦେବୀଙ୍କ ଦର୍ଶନ ଏବଂ ସାଂସ୍କୃତିକ କାର୍ଯ୍ୟକ୍ରମ ଉପଭୋଗ କରିବା ପାଇଁ ଲୋକଙ୍କ ଅସମ୍ଭାଳ ଭିଡ ହେଉଛି।
ଶୁକ୍ରବାର ଦେବୀ ଅସ୍ଥାୟୀ ମଣ୍ଡପରୁ ପୂର୍ବ ମୁଖା ବାହାରିବା ପରେ ତହସିଲ ଅଫିସ ଛକ ପର୍ଯ୍ୟନ୍ତ ଯିବେ। ସେଠାରୁ ଉତ୍ତର ମୁଖ ହୋଇ ଜଳସମ୍ପଦ ବିଭାଗ କାର୍ଯ୍ୟାଳୟ ଛକ ପର୍ଯ୍ୟନ୍ତ ଆସିବେ। ସେଠାରୁ ମରାଠୀ ସାହି ହୋଇ ରେଡକ୍ରସ ରୋଡକୁ ବାହାରି ପାଳ କଲୋନୀ, ପାତ୍ର କଲୋନୀ ହୋଇ ମ୍ୟୁନିସିପାଲଟି କାର୍ଯ୍ୟାଳୟ ଛକକୁ ବାହାରିବେ। ସେଠାରୁ ପୂର୍ବ ମୁଖା ହୋଇ ଦେବୀ ଅସ୍ଥାୟୀ ମଣ୍ଡପରେ ପହଞ୍ଚି ବିଶ୍ରାମ ନେବାର କାର୍ଯ୍ୟକ୍ରମ ରହିଛି।
ଏହିଭଳି ପରିସ୍ଥିତିରେ ଗୁରୁବାର ରାତିରେ କବି ସମ୍ରାଟ ରଙ୍ଗମଞ୍ଚରେ ଅନୁଷ୍ଠିତ ସାଂସ୍କୃତିକ କାର୍ଯ୍ୟକ୍ରମରେ ବ୍ରହ୍ମପୁରର ମାଙ୍କେ ଆନ୍ନା କମେଡି, ଭୁବନେଶ୍ବର ଆରଡିଏକ୍ସ ନୃତ୍ୟ ଗ୍ରୁପ ଓ ଦିଗପହଣ୍ଡି ବିଚିତ୍ର ବର୍ଣାଳୀ କାର୍ଯ୍ୟକ୍ରମ ଦେଖିବା ପାଇଁ ହଜାର ହଜାର ଲୋକଙ୍କ ଭିଡ ହୋଇଥିଲା। ସାଂସ୍କୃତିକ ସନ୍ଧ୍ୟା କାର୍ଯ୍ୟକ୍ରମକୁ ଭଞ୍ଜନଗର ବିଧାୟକ ପ୍ରଦ୍ୟୁମ୍ନ କୁମାର ନାୟକ ମୁଖ୍ୟ ଅତିଥି ଭାବେ ଯୋଗଦେଇ ଉଦଘାଟନ କରିଥିଲେ।
ଅନ୍ୟମାନଙ୍କ ମଧ୍ୟରେ ଗଞ୍ଜାମ ଜିଲା ସ୍ବତନ୍ତ୍ର ଉନ୍ନୟନ ପରିଷଦ ଅଧକ୍ଷ ନୀଳମାଧବ ପାତ୍ର,ଉପ ଜିଲ୍ଲାପାଳ ଉମା ଶଙ୍କର ବେହେରା, ମ୍ୟୁନିସିପାଲଟି ଅଧକ୍ଷ ଗୋପବନ୍ଧୁ ମହାପାତ୍ର, ଯାତ୍ରା କମିଟି ସଭାପତି ରାଜେନ୍ଦ୍ର କୁମାର ବିଷୋୟୀ, କାର୍ଯ୍ୟକାରୀ ସଭାପତି ବିଷ୍ଠୁ ପ୍ରସାଦ ପ୍ରଧାନ, ଉପ ସଭାପତି ବିନୟ କୁମାର ରଥ, ବୁଲୁ ଦାସ,
ମୁରଲୀ ପଣ୍ଡା,ସଂପାଦକ ସୁଶାନ୍ତ ମହାପାତ୍ର,ସୁଧୀର ରଞ୍ଜନ ବେହେରା, ଏମପି ପ୍ରତିନିଧି ସନ୍ତୋଷ ତିଆଡି, ଅବସରପ୍ରାପ୍ତ ତହସିଲଦାର ପ୍ରମୋଦ ଦଳବେହେରା, ଇଶ୍ୱର ଆଚାରୀ, ଲୋକନାଥ କର, ଜଗଦୀଶ ପାଣିଗ୍ରାହୀ, ରାମ ପ୍ରସାଦ ପଣ୍ଡା, ଟୁକୁନା ପଟ୍ଟନାୟକ, ମହେଶ୍ୱର ପାତ୍ର, ବୁବୁନି ମହାନ୍ତି, ସୁବାସ ବରାଡ ପ୍ରମୁଖ ଅତିଥି ଭାବେ ମଞ୍ଚାସୀନ ଥିଲେ।
ଅପରପକ୍ଷେ ଯାତ୍ରାରେ ଭିଡକୁ ଦେଖି କିଛି ଅଘଟଣ ଘଟିବା ଆଶଙ୍କାରେ ଟାଟା ପାୱାର ଅଧିକାରୀ, ଯାତ୍ରା କମିଟି କର୍ମକର୍ତ୍ତା ଏବଂ ମୀନାବଜାର, ଅପେରା ଆଣିଥିବା କମିଟି ମିଳିତ ଭାବେ ବିଦ୍ୟୁତ୍ ସୁରକ୍ଷା ବ୍ୟବସ୍ଥା ଉପରେ ଯାଞ୍ଚ କରିଥିଲେ।
ସୂଚନାଯୋଗ୍ୟ ଯେ, ତିନିଦିନ ପୂର୍ବେ ହଠାତ୍ ମୀନାବଜାରରେ ମିଟର ନିକଟରେ ସଟ ସର୍କିଟ ହେବାରୁ ଲୋକଙ୍କ ମଧ୍ୟରେ ଆତଙ୍କ ଖେଳିଯାଇଥିଲା। କିନ୍ତୁ ସଟ ସର୍କିଟ ଦ୍ୱାରା କୌଣସି କ୍ଷୟକ୍ଷତି ହୋଇ ନ ଥିଲା । ଏହା ଏକ ସାମାନ୍ୟ ଘଟଣା ଥିଲା ବୋଲି ଥାନା ଅଧିକାରୀ ଜୀବନାନନ୍ଦ ଜେନା ପକ୍ଷରୁ ସୂଚନା ଦିଆଯାଇଥିଲା। ଏହାପରେ ପରିସ୍ଥିତି ସ୍ବାଭାବିକ ହୋଇଥିଲା।
Dharitri – Odisha’s No.1 Odia Daily
