କେନ୍ଦୁଝର/ହାଟଡିହୀ/ଛେନାପଦୀ,୩୦।୧(ନରେଶ ଚନ୍ଦ୍ର ପଟ୍ଟନାୟକ/ଶୁଭକାନ୍ତ ନାୟକ/ନିରାକାର ପରିଡା): କେନ୍ଦୁଝର ଜିଲାପାଳ ତଥା କେନ୍ଦୁଝର ଡିଏମ୍ଏଫ୍ ଅଧ୍ୟକ୍ଷ ବିଶାଲ ସିଂଙ୍କ ନାମରେ ୨୬ ମାର୍ଚ୍ଚ ୨୦୨୬ ରେ ଓଡିଶା ହାଇକୋର୍ଟଙ୍କ ନିକଟରେ ହୋଇଥିବା ଅଦାଲତ ଅବମାନନା ମାମଲା(କେସ ନଂ ସିଓଏନଟିସି – ୧୮୭୦/୨୦୨୬ )ରେ ପୂର୍ବରୁ ଜାରି ହୋଇଥିବା ଆଦେଶ ପାଳନ ପାଇଁ ହାଇକୋର୍ଟ ଆଉ ୧ ମାସ ଅତିରିକ୍ତ ସମୟ ପ୍ରଦାନ କରିଛନ୍ତି। ମାମଲାର ତଥ୍ୟ ଏବଂ ପରିସ୍ଥିତିକୁ ବିଚାର କରି ଏବଂ ଉଭୟ ପକ୍ଷଙ୍କ ଓକିଲ ମାନଙ୍କ ଶୁଣାଣି କରି, ୧୦ ଡିସେମ୍ବର ୨୦୨୫ ତାରିଖରେ ପାରିତ ହୋଇଥିବା ଆଦେଶ ଯଦି ବର୍ଦ୍ଧିତ ୧ ମାସ ସମୟ ମଧ୍ୟରେ ପାଳନ କରା ନ ଯାଏ, ତେବେ ଏହାକୁ ଅଦାଲତଙ୍କ ଆଦେଶର ଜାଣିଶୁଣି ଉଲ୍ଲଂଘନ ବୋଲି ବିବେଚନା କରାଯିବ । ଏ ନେଇ ହାଇକୋର୍ଟଙ୍କ ତରଫରୁ ଗତ ୨୧ ଏପ୍ରିଲ ୨୦୨୬ ରେ ପ୍ରକାଶିତ ଆଦେଶରେ ଦର୍ଶାଯାଇଛି ।
ସୂଚନାଯୋଗ୍ୟ, ବର୍ଦ୍ଧିତ ଦରମା ମାଗିବାରୁ ଡ଼ିଏମଏଫ ରେ କାର୍ଯ୍ୟରତ ଜଣେ କର୍ମଚାରୀଙ୍କୁ ବେନିୟମ ଏବଂ ମୌଖିକ ଭାବେ ଚାକିରୀରୁ ବିଦା କରି ଦେଇଥିଲେ । ଏ ନେଇ ହାଇକୋର୍ଟଙ୍କ ଠାରେ ଏକ ମାମଲା( ଡବ୍ଲ୍ୟୁପିସି ନଂ -୩୫୧୭୭/୨୦୨୫) ଦାୟର ହୋଇଥିଲା । ୪ ସପ୍ତାହ ମଧ୍ୟରେ ଅଭିଯୋଗର ବିଚାର କରିବାକୁ ହାଇକୋର୍ଟ ଗତ ୧୦ ଡିସେମ୍ବର ୨୦୨୫ ରେ ଜିଲାପାଳଙ୍କୁ ନିର୍ଦ୍ଦେଶ ଦେଇଥିଲେ। ଫଳରେ ଜିଲାପାଳ ଅଭିଯୋଗ ଶୁଣାଣି ପାଇଁ ଚିଠି ନଂ ୮୪/୧୩ ଜାନୁୟାରୀ ୨୦୨୬ରେ ନୋଟିସ ଜାରି କରି ୧୭ ଜାନୁଆରୀ ୨୦୨୬କୁ ଶୁଣାଣି ତାରିଖ ଧାର୍ଯ୍ୟ କରିଥିଲେ । ମାତ୍ର ଶୁଣାଣି ତାରିଖ ପରେ ୨ ମାସରୁ ଅଧିକ ଦିନ ବିତି ସାରିଥିଲେ ମଧ୍ୟ ଅଭିଯୋଗ ବିଚାରର ଫଳାଫଳ ପ୍ରକାଶ ପାଇ ନ ଥିଲା। ଫଳରେ ଅଦାଲତ ଅବମାନନା ମାମଲା ଦାୟର ହୋଇଥିଲା । ଅପରପକ୍ଷେ ଚାକିରୀରୁ ବିଦା କରିବା ପ୍ରସଙ୍ଗରେ ଦାୟର ହୋଇଥିବା ଅନ୍ୟ ଏକ ମାମଲାର ଶୁଣାଣି କରି ହାଇକୋର୍ଟ ଜିଲାପାଳଙ୍କୁ ଗତ ୨୨ ଏପ୍ରିଲ ୨୦୨୬ ରେ ନୋଟିସ ଜାରି କରିଥିଲେ। ଏଥିସହ କର୍ମଚାରୀ ଜଣକ ନିଜର ଚାକିରୀ କାର୍ଯ୍ୟ ଜାରି ରଖିବା ପାଇଁ ଲିଖିତ ଆବେଦନ କଲେ ଜିଲାପାଳ ତାହା ଆଇନ ଅନୁଯାୟୀ ବିଚାର କରିବାକୁ ମଧ୍ୟ ନିର୍ଦ୍ଦେଶ ଦେଇଥିଲେ ।
