ଆନନ୍ଦପୁର,୧୧।୪(ସ୍ବ.ପ୍ର.): କୋଟିଏରୁ ଊର୍ଦ୍ଧ୍ୱ ଟଙ୍କା ଠକେଇ ଅଭିଯୋଗରେ କେନ୍ଦୁଝର ଜିଲା ଘସିପୁରା ଥାନା ଅଧୀନ ଆନନ୍ଦପୁର ପୌରପରିଷଦ ୧୩ ନମ୍ବର ଓ୍ବାର୍ଡରୁ ପୋଲିସ ଦମ୍ପତିଙ୍କୁ ସୋମବାର ଗିରଫ କରିଛି।
ଭୁବନେଶ୍ୱରର ଚନ୍ଦ୍ରଶେଖରପୁର ଥାନା ଅଞ୍ଚଳରେ କୋଟିଏ ଟଙ୍କା ଠକେଇ ହୋଇଥିବା ନେଇ ଅଭିଯୋଗ ହୋଇଥିଲା। ଏନେଇ ପୋଲିସ ଏକ ମାମଲା (ନଂ.୪୩୯/୨୧) ରୁଜୁ କରି ଥିଲା। କମିଶନରେଟ୍ ପୋଲିସ ସୋମବାର ଘସିପୁରା ପୋଲିସର ସହାୟତାରେ ଆନନ୍ଦପୁରରେ ଚଡାଉ କରିଥିଲା। ପୌରପରିଷଦର ୧୩ ନମ୍ବର ଓ୍ବାର୍ଡର ଏକ ଭଡ଼ା ଘରେ ରହୁଥିବା ୬ନମ୍ବର ଓ୍ବାର୍ଡର ବାସୀନ୍ଦା ଉମେଶ ପାଢୀଙ୍କୁ ଗିରଫ କରିଛି।
ଚଢାଉ ବେଳେ ଅଭିଯୁକ୍ତଙ୍କ ସ୍ତ୍ରୀ ଶର୍ମିଳା ପାଢୀ ପୋଲିସକୁ ଦୁର୍ବ୍ୟବହାର କରିବା, ସହ ଗାଳିଗୁଲଜ କରିଥିଲେ। ଏପରି କି ପୋଲିସଙ୍କୁ ଧକ୍କା ମାରିଥିବା ନେଇ ଅଭିଯୋଗ ହୋଇଛି। ଘସିପୁରା ଥାନା ପୋଲିସ ଏକ ମାମଲା (ନଂ.୬୮/୨୦୨୨) ରୁଜୁ କରି ଶର୍ମିଳାଙ୍କୁ ଗିରଫ କରାଯାଇଥିବା ଥାନା ଅଧିକାରୀ ଶ୍ୟାମଘନ ବେହେରା ସୂଚନା ଦେଇଛନ୍ତି।
ପୋଲିସ ଅଭିଯୁକ୍ତଙ୍କ ଠାରୁ ଏକ କାର ଜବତ କରିଛି। ପୋଲିସ ସୂଚନା ମୁତାବକ, ଅଭିଯୁକ୍ତ ଉମେଶ ଭୁବନେଶ୍ୱରର ବିଭିନ୍ନ ଲୋକଙ୍କଠାରୁ କୋଟିଏରୁ ଊର୍ଦ୍ଧ୍ୱ ଟଙ୍କା ଠକି ନେଇଥିଲେ। ଏପରିକି ଜଣେ ଡାକ୍ତରଙ୍କ ୨୫ ଲକ୍ଷ ଟଙ୍କା ମଧ୍ୟ ଠକେଇ କରିଥିବା ନେଇ ଅଭିଯୋଗ ହୋଇଥିଲା।
