ଉମରକୋଟ, ୧୬।୯(ସନ୍ତୋଷ ଶତପଥୀ): ସୋନଗ୍ରାଫିରେ ଯାଆଁଳା ଛୁଆ ଥିବା ନେଇ ରିପୋର୍ଟ ପ୍ରକାଶ ପାଇଥିଲା। କିନ୍ତୁ ଡାକ୍ତରଖାନାରେ ପ୍ରସବ ପରେ ଗୋଟିଏ ଛୁଆ ଦିଆଗଲା। ଡାକ୍ତରଖାନାରୁ ଛୁଆ ଚୋରି କିମ୍ବା ପିଲାକୁ ବିକ୍ରି କରାଯାଇଥିବା ନେଇ ସୋମବାର ଉମରକୋଟ ଥାନାରେ ନବରଙ୍ଗପୁର ଜିଲା ରାଇଘର ବ୍ଲକ କୋଷକୋଙ୍ଗା ପଞ୍ଚାୟତ ଆଦିପାରା ଗ୍ରାମର ରାକେଶ ଗଣ୍ଡ ଓ ତାଙ୍କ ସ୍ତ୍ରୀ କୁନ୍ତୀ ଅଭିଯୋଗ କରିଛନ୍ତି। ଏବେଯାଏ ପୋଲିସ ପକ୍ଷରୁ କୌଣସି ମାମଲା ରୁଜୁ କରାଯାଇନାହିଁ।
କୁନ୍ତୀ ଗର୍ଭବତୀ ହେବାପରେ ଉମରକୋଟ ଉପଖଣ୍ଡ ସ୍ବାସ୍ଥ୍ୟକେନ୍ଦ୍ରରେ ଡାକ୍ତର ସାଗରିକା ସ୍ବାଇଁଙ୍କ ନିକଟରେ ଚିକିତ୍ସିତ ହେଉଥିଲେ। ୫ ଜୁନ୍ ୨୦୨୫ରେ ହୋଇଥିବା ସୋନଗ୍ରାଫିରେ କୁନ୍ତୀଙ୍କ ଗର୍ଭରେ ଯାଆଁଳା ଛୁଆ ଥିବା ଜଣାପଡ଼ିଥିଲା। ଏହାପରେ ଚିକିତ୍ସାଳୟ ପକ୍ଷରୁ କୁନ୍ତୀଙ୍କୁ ରେଡ୍କାର୍ଡ ସହ ସ୍ବତନ୍ତ୍ର ଚିକିତ୍ସା ବ୍ୟବସ୍ଥା କରାଯାଇଥିଲା। ଚଳିତମାସ ୩ ତାରିଖରେ ଗର୍ଭ ଯନ୍ତ୍ରଣା ହେବାରୁ କୁନ୍ତୀଙ୍କୁ ହାଟଭରଣ୍ଡୀ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା। ରେଡ୍କାର୍ଡ ଓ ଯାଆଁଳା ଛୁଆ ଥିବା ଯୋଗୁ ତାଙ୍କୁ ଉମରକୋଟ ଉପଖଣ୍ଡ ସ୍ବାସ୍ଥ୍ୟକେନ୍ଦ୍ରକୁ ପଠାଯାଇଥିଲା। ସେଠାରେ କୁନ୍ତୀଙ୍କ ପ୍ରସବ କରାଯାଇଥିଲା। ପ୍ରସବ କରାଇଥିବା ଡାକ୍ତର ଏବଂ ମେଡିକାଲ କର୍ତ୍ତୃପକ୍ଷ କୁନ୍ତୀଙ୍କର ଗୋଟିଏ ସନ୍ତାନ ହୋଇଥିବା ସୂଚନା ଦେଇଥିଲେ। ପରିବାର ଲୋକ ଏହା ଶୁଣିବା ପରେ ଆଉ ଏକ ଛୁଆ କୁଆଡ଼େ ଗଲା ବୋଲି ପ୍ରଶ୍ନ କରିବା ସହ ହୋହଲ୍ଲା କରିଥିଲେ। କିନ୍ତୁ ମେଡିକାଲ କର୍ତ୍ତୃପକ୍ଷ କୁନ୍ତୀ ଓ ତାଙ୍କ ପରିବାରକୁ ବୁଝାଇବା ସହ ଗୋଟିଏ ଛୁଆ ଦେଇ ଘରକୁ ପଠାଇ ଦେଇଥିଲେ। ସୋନଗ୍ରାଫି ରିପୋର୍ଟରେ ଦୁଇଟି ଛୁଆ ଥିବାବେଳେ ପ୍ରସବ ସମୟରେ କିପରି ଗୋଟିଏ ଛୁଆ ଜନ୍ମ ହେଲା, ଅନ୍ୟ ଛୁଆକୁ ଚିକିତ୍ସାଳୟ କର୍ତ୍ତୃପକ୍ଷ ଚୋରି କରି ନେଇଛନ୍ତି କିମ୍ବା କାହାକୁ ବିକ୍ରି କରିଦେଇଛନ୍ତି ବୋଲି ସନ୍ଦେହ କରିଥିଲେ। ସୋମବାର ଏ ନେଇ ସେମାନେ ଉମରକୋଟ ଥାନାରେ ଅଭିଯୋଗ କରିଥିଲେ।
