ଭୁବନେଶ୍ୱର,୨୮।୫(ବ୍ୟୁରୋ): ରାଜଧାନୀ ଭୁବନେଶ୍ୱରରେ କୋଭିଡ୍ ଟିକାକରଣକୁ ନେଇ ବିଭିନ୍ନ ସମୟରେ ନାନା ଅଭିଯୋଗ ହେଉଛି। କେତେବେଳେ ଟୋକନ୍ ବଣ୍ଟାକୁ ନେଇ ତ ଆଉ କେତେବେଳେ ଗାଡ଼ିରେ ଟିକାକରଣ (ଡ୍ରାଇଭ୍ ଇନ୍ ଭାକ୍ସିନେଶନ)କୁ ନେଇ ଚର୍ଚ୍ଚାକୁ ଆସିଛି ଭୁବନେଶ୍ୱର ମହାନଗର ନିଗମ (ବିଏମ୍ସି)। ଟୋକନ୍ ବଣ୍ଟାରେ ବିବାଦ ଉପୁଜିବାରୁ ଗତ ୫ତାରିଖରୁ ବିଭିନ୍ନ ପର୍ଯ୍ୟାୟରେ ଅନ୍ଲାଇନ୍ରେ ସ୍ଲଟ୍ ବୁକିଂ ଆରମ୍ଭ ହୋଇଛି। ଲୋକମାନେ ସ୍ଲଟ୍ ବୁକିଂ କରିବା ପରେ ଦିଆଯାଉଥିବା ସମୟ ଅନୁସାରେ ଟିକାକରଣ କେନ୍ଦ୍ରକୁ ଯାଇ ଟିକା ନେଉଛନ୍ତି। ହେଲେ ଅଧିକାଶ ସ୍ଥାନରେ ବୁକିଂ ପୂର୍ବରୁ ସ୍ଲଟ୍ ସରିଯାଉଥିବା ନେଇ ଅଭିଯୋଗ ଆସୁଛି। ପଞ୍ଜୀକରଣ ସତ୍ତ୍ୱେ ସ୍ଲଟ ମିଳୁ ନ ଥିବାରୁ ଲୋକଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଛି।
ଗୁରୁବାର ବିଏମ୍ସି ପକ୍ଷରୁ ୧୮ରୁ ୪୪ବର୍ଷୀୟଙ୍କ ପାଇଁ ୨୮ ଓ ୨୯,୩୧ ଓ ଜୁନ୍ ୧ ଏବଂ ୪୫ ରୁ ଊର୍ଦ୍ଧ୍ୱ ବୟସ୍କଙ୍କ ପାଇଁ ୩୧ ଓ ଜୁନ୍ ୧ ପାଇଁ ନୂଆ ସ୍ଲଟ୍ ଆରମ୍ଭ କରାଯାଇଛି। ଗୁରୁବାର ସନ୍ଧ୍ୟା ୭ଟାରୁ ଏହି ସ୍ଲଟ୍ ବୁକିଂ ଆରମ୍ଭ ହେବ ବୋଲି ବିଏମ୍ସି ପକ୍ଷରୁ ଟୁଇଟର ମାଧ୍ୟମରେ ସୂଚନା ଦିଆଯାଇଥିଲା। ଭୁବନେଶ୍ୱରର ୧୩ଟି କେନ୍ଦ୍ର ପାଇଁ ପ୍ରାୟ ୧୨ଶହ ସ୍ଲଟ ବୁକିଂ ପାଇଁ ବ୍ୟବସ୍ଥା କରାଯାଇଥିଲା। ସେହି ଅନୁସାରେ ଲୋକମାନେ କୋଓ୍ବିନ୍ ଜରିଆରେ ନାମ ପଞ୍ଜୀକରଣ ସହ ସ୍ଲଟ ବୁକିଂ ପାଇଁ ଚେଷ୍ଟା କରିଥିଲେ। ହେଲେ ସ୍ଲଟ ବୁକିଂ ଆରମ୍ଭ ହେବାର କିଛି ସମୟ ପରେ ସ୍ଲଟ ଶେଷ ହୋଇଯାଇଥିବା ଅଧିକାଂଶ ଲୋକ ଜାଣିବାକୁ ପାଇଥିଲେ। ହାତଗଣତି କେତେଟା ସେଣ୍ଟରକୁ ଛାଡ଼ି ଦେଲେ ଅନ୍ୟ ସବୁଗୁଡ଼ିକରେ ବୁକିଂ ଶେଷ ହୋଇଥିବା ଦେଖିବାକୁ ମିଳିଥିଲା। ସେହିପରି ୪୫ରୁ ଊର୍ଦ୍ଧ୍ୱ ବର୍ଗର ହିତାଧିକାରୀଙ୍କ ପାଇଁ ଅଧିକାଂଶ ସ୍ଥାନରେ ସ୍ଲଟ୍ ବୁକ୍ ହୋଇ ସାରିଥିବାବେଳେ ଅନ୍ୟ କେତେକ ସ୍ଥାନରେ ସ୍ଲଟ୍ ଉପଲବ୍ଧ ନ ଥିବା ଦର୍ଶାଇଥିଲା।
ସ୍ଲଟ ବୁକିଂ କରିବାକୁ ଚେଷ୍ଟା କରି ବିଫଳ ହୋଇଥିବା ପଟିଆ ଅଞ୍ଚଳର ଡାକ୍ତର ମାନସ ଦାସ କହିଛନ୍ତି ଯେ, ଟିକା ପାଇଁ ସରକାରଙ୍କ ପକ୍ଷରୁ ଦିଆଯାଇଥିବା ଓ୍ବେବସାଇଟ ସବୁ ସମୟରେ ସର୍ଭର ଡାଉନ ରହୁଛି। ଏପରି କି ବିଏମ୍ସି ପକ୍ଷରୁ ବିଭିନ୍ନ ସମୟରେ ଦିଆଯାଉଥିବା ସ୍ବତନ୍ତ୍ର ଲିଙ୍କ୍ରେ ମଧ୍ୟ ସ୍ଲଟ ବୁକିଂ ହୋଇପାରୁ ନାହିଁ। ଫଳରେ ଟିକା ନେବା ବର୍ତ୍ତମାନ ସମୟରେ ଏକ ଜରୁରୀକାଳୀନ ପରିସ୍ଥିତି ସୃଷ୍ଟି ହୋଇଛି। ସେହିପରି ଋତୁପର୍ଣ୍ଣା ଭୋଇ ନାମ୍ନୀ ଜଣେ ଛାତ୍ରୀଙ୍କ କହିବା ହେଲା ୧୮ ବର୍ଷରୁ ଊର୍ଦ୍ଧ୍ୱ ଟିକା ପାଇଁ ସ୍ଲଟ ବୁକିଂ ବାଧ୍ୟତାମୂଳକ ହୋଇଥିବାବେଳେ ପ୍ରତିଦିନ ସ୍ଲଟ ପାଇଁ ଅନ୍ଲାଇନରେ ଫାଙ୍କ ସ୍ଥାନ ଖୋଜି ଖୋଜି ସମୟ ଯାଉଛି। ହେଲେ ସ୍ଲଟ ମିଳୁନାହିଁ। ଟିକାକରଣ ପାଇଁ ସଫଳତାର ସହ ରେଜ୍ରିଷ୍ଟେଶନ ହୋଇଯାଇଥିବା ଉକ୍ତ ମେସଜକୁ ମଧ୍ୟ କୌଣସି ସ୍ଥାନରେ ଗ୍ରହଣ କରାଯାଉ ନାହିଁ। ସ୍ଲଟ ନ ମିଳିବା ସମ୍ପର୍କରେ ବିଏମ୍ସିର ଅତିରିକ୍ତ ଜନସ୍ବାସ୍ଥ୍ୟ ଅଧିକାରୀ ଅନ୍ତର୍ଯ୍ୟାମୀ ମିଶ୍ରଙ୍କୁ ଯୋଗାଯୋଗ କରାଯାଇଥିଲେ ସୁଦ୍ଧା ଶାରୀରିକ ଅସୁସ୍ଥତା ଦର୍ଶାଇ ସେ କୌଣସି ମତାମତ ଦେବାକୁ ମନା କରିଦେଇଛନ୍ତି।
