ବ୍ରହ୍ମପୁର ଅଫିସ,୧।୮: ଗଞ୍ଜାମ ଜିଲାରେ ଜୁଲାଇ ମାସ ଶେଷ ବେଳକୁ କରୋନା ସଂକ୍ରମଣ ଓ ମୃତ୍ୟୁ ହାର ଭୟାଭୟ ସ୍ଥିତିରେ ରହିଛି। ଜିଲା ପାଇଁ ଜୁଲାଇ ମାସ ସବୁଠୁ ପ୍ରାଣଘାତୀ ସାବ୍ୟସ୍ତ ହୋଇଛି । ଲକ୍ଡାଉନ, ସଟ୍ଡାଉନ ଏବଂ ସୀମା ସିଲ୍ ଭଳି ପଦକ୍ଷେପ ଆଉ କାମ ଦେଉନି। ଏହାର ପ୍ରଭାବ ଗଞ୍ଜାମ ଜିଲ୍ଲାର ବ୍ରହ୍ମପୁର ସହରରେ ମଧ୍ୟ ଦେଖିବାକୁ ମିଳୁଛି। ବ୍ରହ୍ମପୁରର ସ୍ବତନ୍ତ୍ର ଆବାସ ଗୃହରେ ପଶିଛି କରୋନା । ଏହି ଜୁଭେନାଇଲ ହୋମ୍ରେ ଥିବା ୪୫ ଜଣ ବାଳ ଅପରାଧି ସଂକ୍ରମିତ ହୋଇଥିବା ସୂଚନା ମିଳିଛି । ତେବେ ବ୍ୟାପକ ସୁରକ୍ଷା ମଧ୍ୟରେ ରହୁଥିବା ସତ୍ତ୍ୱେ ଏଠାରେ ସଂକ୍ରମଣ କିପରି ହେଲା ତାକୁ ନେଇ ସାଧାରଣରେ ପ୍ରଶ୍ନ ଉଠୁଛି । ବର୍ତ୍ତମାନ ଏଠାରେ ୧୦୦ ଜଣ ନାବାଳକ ରହୁଛନ୍ତି । ହେଲେ ସେମାନଙ୍କ ଭିତରୁ କିଛି ଜଣଙ୍କ ଠାରେ କରୋନା ଲକ୍ଷଣ ଦେଖା ଦେଇଥିଲା। ସେଥିରୁ ୭୨ ଜଣକ ସ୍ବାବ ଟେଷ୍ଟ ଶୁକ୍ରବାର କରାଯାଇଥିଲା । ସେଥିରୁ ୪୫ ଜଣଙ୍କ ପଜିଟିଭ ଆସିଥିବା ବ୍ରହ୍ମପୁର ମହାନଗର କମିଶନର (ବିଏମ୍ସି )ଚକ୍ରବର୍ତ୍ତୀ ସିଂ ରାଠୋର କହିଛନ୍ତି । ତେବେ ସେମାନଙ୍କ ଚିକିତ୍ସା ପାଇଁ ଏକ ସ୍ବତନ୍ତ୍ର ସ୍ବାସ୍ଥ୍ୟ ଟିମ୍ ପଠାଇବାକୁ ପ୍ରଶାସନକୁ ଅନୁରୋଧ କରାଯାଇଛି ବୋଲି ଆବାସ ଗୃହର ଅଧିକ୍ଷକ ପି.କେ ହାରା ସୂଚନା ଦେଇଛନ୍ତି । କରୋନାରେ ଆକ୍ରାନ୍ତ ଅନ୍ତେବାସୀ ଙ୍କୁ ଏବେ ସ୍ବତନ୍ତ୍ର ଭାବେ ରଖାଯାଇ ସେମାନଙ୍କ ଚିକିତ୍ସା ଆରମ୍ଭ କରାଯାଉଛି। ଅନ୍ୟପଟେ ଆକ୍ରାନ୍ତ ଅନ୍ତେବାସୀମାନେ ଏବେ ସୁସ୍ଥ ଅନୁଭବ କରୁଥିବା ମଧ୍ୟ ସେ କହିଛନ୍ତି ।
ସୂଚନା ଯୋଗ୍ୟ, ପୂର୍ବରୁ ବ୍ରହ୍ମପୁର ମଣ୍ଡଳକାରାଗାରର ଜେଲର ସମେତ ୯ ଜଣ କର୍ମଚାରୀ ଓ ୩୫ ଜଣ ବିଚାରାଧୀନ ବନ୍ଦୀଙ୍କ କରୋନା ପଜିଟିଭ ଚିହ୍ନଟ ହୋଇଥିଲା । ସେହିପରି ବ୍ରହ୍ମପୁରରେ ଥିବା ଏହି ସ୍ବତନ୍ତ୍ର ଆବାସ ଗୃହରେ ରାଜ୍ୟର ୧୨ଟି ଜିଲାର ବାଳ ଅପରାଧୀ ସ୍ଥାନାନ୍ତର ହୋଇ ଏଠାରେ ରହିଥାନ୍ତି । ଆଜିର ଏହି ଘଟଣା ପରେ ଜେଲରେ ତଥା ସ୍ବତନ୍ତ୍ର ଆବାସ ଗୃହରେ ରହୁଥିବା ଅପରାଧୀମାନେ ଅସୁରକ୍ଷିତ ଥିବା ସ୍ପଷ୍ଟ ହୋଇଛି ।
