ଧାମନଗର, ୭ା୩(ସନ୍ତୋଷ କୁମାର ମହାପାତ୍ର)ଧାମନଗର ବ୍ଲକ ମୁସ୍ତଫାପୁର ମହାନ୍ତିସାହିରେ ଥିବା ଦୋବଲ ସେବା ସମବାୟ ସମିତିର କାର୍ଯ୍ୟାଳୟ ବିପଦସଙ୍କୁଳ ଅବସ୍ଥାରେ ରହିଛି। ଯେକୌଣସି ମୂହୂର୍ତ୍ତରେ ଘରର ଆଜବେଷ୍ଟସ ଛପର ଓ ଇଟାକାନ୍ଥ ଭୁଶୁଡ଼ି ପଡ଼ିବାର ଆଶଙ୍କା ରହିଛି। ବର୍ଷା ପାଣି ପଡ଼ିବା କ୍ଷଣି କାମ ବନ୍ଦ କରି କର୍ମଚାରୀ କମ୍ପ୍ୟୁଟର, ରେଜିଷ୍ଟର ଆଦି କାଗଜପତ୍ର ଉପରେ ପଲିଥିନ ଢାଙ୍କି ଦେଇ ବାରଣ୍ଡାରେ ଛିଡ଼ା ହୁଅନ୍ତି। ଭଙ୍ଗା ଆଜବେଷ୍ଟସ ଉପରେ ପଲିଥିନ ଟଙ୍ଗା ଯାଇଥିବା ବେଳେ କାର୍ଯ୍ୟାଳୟ ଭିତରେ ଅସୁରକ୍ଷିତ ଭାବେ କର୍ମଚାରୀମାନେ କାମ କରୁଛନ୍ତି।
୧୯୬୪ରେ ପ୍ରତିଷ୍ଠିତ ଏହି ସେବା ସମବାୟ ସମିତିର କାର୍ଯ୍ୟାଳୟ ପ୍ରାୟ ୪୦ବର୍ଷ ତଳେ ଦୋବଲ ମହାନ୍ତିସାହି ପାଖରେ ଇଟା ସିମେଣ୍ଟର କାନ୍ଥ ଉପରେ ଆଜବେଷ୍ଟସ ପଡ଼ି ଗୃହ ନିର୍ମିତ ହୋଇଥିଲା। ପରେ ଅଧିକାରୀଙ୍କ ଅବହେଳା ଯୋଗୁ ଘର ମରାମତି ହୋଇନାହିଁ କି ଆଜବେଷ୍ଟସ ବଦଳାଯାଇ ନାହିଁ। ଦୀର୍ଘବର୍ଷ ଏମିତି ଅବସ୍ଥାରେ ରହିବା ପରେ ଛପରରୁ ଆଜବେଷ୍ଟସ ଭାଙ୍ଗି ଗଳି ପଡ଼ିଲାଣି। ଅନେକ ଜାଗାରେ ବଡ଼ ବଡ଼ ଫାଟ ହୋଇଛି। ଦୋବଲ ସେବା ସମବାୟ ସମିତି ଅଧୀନରେ ମୁସ୍ତଫାପୁର, ଦୋବଲ, ଖଡ଼ିପଦା, ଆନନ୍ଦପୁର ଓ ସୋହଡ଼ା ପଞ୍ଚାୟତର କେତୋଟି ଗଁାର ୪ ହଜାର ଚାଷୀ ଅନୁବନ୍ଧିତ ଅଛନ୍ତି। ପ୍ରତିବର୍ଷ ଚାଷୀଙ୍କ ଅନୁଦାନ, ସରକାରୀ ଅନୁଦାନ ଓ କାର୍ଯ୍ୟାଳୟ ଖର୍ଚ୍ଚ ବାବଦରେ ଆସୁଥିବା ଟଙ୍କାକୁ ମିଶାଇ ପ୍ରାୟ ୨୦ ଲକ୍ଷ ଟଙ୍କା ଏବେ ସୋସାଇଟିର ନିଜ ଫଣ୍ଡରେ ରହିଛି। ଏହି ଟଙ୍କାରେ ଘର କରିବା ଲାଗି ୟୁନାନୀ ମେଡିକାଲ ପାଖରେ ଜାଗା ମଧ୍ୟ ଠିକ୍ ହୋଇଥିଲା। ହେଲେ ସୋସାଇଟିର ସମ୍ପାଦକଙ୍କ ଖାମଖିଆଲି ମନୋଭାବ ଯୋଗୁ ଗୃହ ତିଆରି ହୋଇପାରିଲା ନାହିଁ ବୋଲି ଅଭିଯୋଗ ହୋଇଛି। ଅଫିସ ଗୃହ ଲାଗି ବାରମ୍ବାର ଦାବି କରୁଥିଲେ ମଧ୍ୟ କେହି ଶୁଣୁନାହାନ୍ତି। ଆଗାମୀ ଦିନରେ ସରକାରଙ୍କ ପକ୍ଷରୁ କୌଣସି ପଦକ୍ଷେପ ନିଆ ନ ଗଲେ ଆନ୍ଦୋଳନାତ୍ମକ ପନ୍ଥା ଗ୍ରହଣ କରିବେ ଚାଷୀମାନେ କହିଛନ୍ତି। ସ୍ଥାୟୀ ଗୋଦାମ ନ ଥିବାରୁ ସରକାରଙ୍କ ପକ୍ଷରୁ ଯୋଗାଇ ଦିଆଯାଉଥିବା ବିହନ, ସାର, କୀଟନାଶକ ଦ୍ରବ୍ୟ ସବୁ ଭଡ଼ା ଘରେ ରଖାଯାଉଛି। ଏ ସମ୍ପର୍କରେ ସମିତି ପରିଚାଳନା ପରିଷଦର ସଭାପତି ବଟକୃଷ୍ଣ ନାୟକ କହିଛନ୍ତି, ସେ ନିର୍ବାଚିତ ହେବାର ୫ ମାସ ଭିତରେ ସଭା ଡାକି ନୂତନ ଗୃହ ନିର୍ମାଣ ପାଇଁ ନିଷ୍ପତ୍ତି ନିଆଯାଇଥିଲା। ୨୪ ଡିସିମିଲ ନୂତନ ଜାଗାରେ ଦୁଇ ମହଲା ବିଶିଷ୍ଟ କୋଠାଘର ନିର୍ମାଣ ଲାଗି ବିଭାଗୀୟ ଯନ୍ତ୍ରୀଙ୍କ ମାଧ୍ୟମରେ ୫୦ ଲକ୍ଷ ଟଙ୍କାର ଅଟ୍ଟକଳ କରାଯାଇଥିଲା। କିନ୍ତୁ ସମ୍ପାଦକ କାଗଜ ପତ୍ରରେ ସହଯୋଗ ନ କରିବାରୁ ପ୍ରସ୍ତାବିତ ଜାଗା ଠିକ୍ ହୋଇପାରିଲା ନାହିଁ। ଅନେକ ଥର ପାଟିତୁଣ୍ଡ କରିବା ପରେ ସମିତିର ନିଜସ୍ବ ନାମରେ ୮ ଡିସିମିଲ ଜାଗାର କାଗଜପତ୍ରକୁ ଦେବା ପରେ ଜିଲାପାଳ, ଏଆର୍ସିଏସ୍ ଏବଂ ବାଲେଶ୍ୱର ଡିଆର୍ସିଏସ୍ଙ୍କୁ ପଠାଯାଇଛି। ଅନୁମୋଦନ ପରେ ଗୃହ କାର୍ଯ୍ୟ ଆରମ୍ଭ ହେବ। ଏନେଇ ସମ୍ପାଦକ ବିଦ୍ୟାଧର ପଣ୍ଡାଙ୍କୁ ପଚାରିବାରୁ ୪ ମାସ ପୂର୍ବରୁ ସେ କାଗଜପତ୍ର ଦେଇସାରିଥିବା କହିଛନ୍ତି।
