ବ୍ରହ୍ମପୁର ଅଫିସ,୧୪।୪: ପଞ୍ଚାୟତ ଓ ପୌର ନିର୍ବାଚନ ସରିବା ପରେ ସମବାୟ ନିର୍ବାଚନ ପାଇଁ ସରକାରୀ ବିଗୁଲ ବାଜିଛି। ଫଳରେ ଅଧିକ ସଂଖ୍ୟକ ସମବାୟ ସଂସ୍ଥା ଥିବା ଗଞ୍ଜାମ ଜିଲାରେ ସମବାୟ ରାଜନୀତି ଚଳଚଞ୍ଚଳ ହୋଇଛି। ସମ୍ପୃକ୍ତ ବିଭାଗ ପକ୍ଷରୁ ପ୍ରସ୍ତୁତି ଆରମ୍ଭ ହୋଇଯାଇଛି। ନିର୍ବାଚନ ଲଢ଼ିବା ନିମନ୍ତେ ଆଶାୟୀଙ୍କ ମଧ୍ୟରେ ତତ୍ପରତା ପ୍ରକାଶ ପାଇଛି। ଅପରପକ୍ଷରେ ଶାସକ ଓ ବିରୋଧୀ ଦଳ ପକ୍ଷରୁ ସମର୍ଥିତ ପ୍ରାର୍ଥୀ ଦିଆଯିବାର ଆଭାସ ମିଳିଛି। ସୂଚନାଯୋଗ୍ୟ, ୨୦୧୫ରେ ଜିଲାରେ ସମବାୟ ନିର୍ବାଚନ ହୋଇଥିଲା ଏବଂ ୫ ବର୍ଷିଆ କାର୍ଯ୍ୟକାଳ ୨୦୨୦ରେ ସରିଥିଲା। ତେଣୁ ପର୍ଯ୍ୟାୟକ୍ରମେ ସେହି ବର୍ଷ ମେ’ରୁ ପ୍ରାଥମିକଠାରୁ ଆରମ୍ଭ କରି କେନ୍ଦ୍ରୀୟ ସଂସ୍ଥାଗୁଡ଼ିକର ପରିଚାଳନା ସରକାରଙ୍କ ନିୟନ୍ତ୍ରଣକୁ ଯାଇଥିଲା। ଦୁଇ ବର୍ଷ ପରେ ନିର୍ବାଚନ ହେବାକୁ ଯାଉଛି। ଆସନ୍ତା ଜୁନରେ ଦୁଇ ପର୍ଯ୍ୟାୟରେ ପ୍ରାଥମିକ ସୋସାଇଟିଗୁଡ଼ିକରେ ନିର୍ବାଚନ ହେବା ସମବାୟ ନିର୍ବାଚନ କମିଶନଙ୍କ ପକ୍ଷରୁ ସୂଚନା ଦିଆଯାଇଛି।
ସୂଚନାଯୋଗ୍ୟ, ଅତୀତରେ ସମବାୟ ଆନ୍ଦୋଳନ କ୍ଷେତ୍ରରେ ଏହି ଜିଲା ଅଗ୍ରଣୀ ଥିଲା। ଗୁରୁତ୍ୱପୂର୍ଣ୍ଣ ସଂସ୍ଥା ଥିବାରୁ ଆସିକାକୁ ସମବାୟ ନଗରୀ କୁହାଯାଉଥିଲା। ସେଠାର ସମବାୟ ଚିନି ଶିଳ୍ପ ଏବଂ ଏମ୍ପିସିଏସ୍ (ବହୁମୁଖୀ ସମବାୟ ସଂସ୍ଥା) ସର୍ବତ୍ର ପରିଚିତ ଥିଲା। ଆସିକା ସମବାୟ କେନ୍ଦ୍ର ବ୍ୟାଙ୍କ ଚାଷୀଙ୍କ ଅର୍ଥନୈତିକ ଅଭିବୃଦ୍ଧି ନିମନ୍ତେ ଶହ ଶହ ଚାଷୀଙ୍କୁ କୃଷି ଋଣ ଯୋଗାଇବାରେ ପ୍ରମୁଖ ଭୂମିକା ନେଉଛି। ୨୦୨୧-୨୨ ବର୍ଷରେ ରବି ଫସଲ ନିମନ୍ତେ ୨୩୭ କୋଟିରୁ ଅଧିକ ଟଙ୍କା କୃଷି ଋଣ ଦେଇଥିବା ଜଣାପଡ଼ିଛି। ଏମ୍ପିସିଏସ୍ ପୂର୍ବଭଳି ବ୍ୟବସାୟ କରୁ ନ ଥିଲେ ବହୁ କୋଟିର ସମ୍ପତ୍ତି ଥିବାରୁ ସଂସ୍ଥା ବଞ୍ଚତ୍ ରହିଛି। ସମବାୟ ଚିନି ଶିଳ୍ପର ଉନ୍ନତି ନିମନ୍ତେ ପଦକ୍ଷେପ ନିଆଯାଇଛି।
ବ୍ରହ୍ମପୁର ସମବାୟ କେନ୍ଦ୍ର ବ୍ୟାଙ୍କର ଗଞ୍ଜାମ ଓ ଗଜପତି ଜିଲାରେ ୨୫୭ ପ୍ରାଥମିକ କୃଷି ସେବା ସମବାୟ ସମିତି ରହିଛି। ଶତାଧିକ ବର୍ଷର ଏହି ଅନୁଷ୍ଠାନର ଉନ୍ନତମାନର ସେବା ପାଇଁ ଏକାଧିକ ଜାତୀୟ ପୁରସ୍କାର ପାଇଥିବା ନଜିର ଅଛି। ଆସିକା ଓ ବ୍ରହ୍ମପୁର ସମବାୟ ବ୍ୟାଙ୍କ ଅଧୀନ ୪୪୮ ଏଗ୍ରିକଲଚର ପ୍ରାଇମେରୀ ସୋସାଇଟିର ନିର୍ବାଚନ ଜୁନରେ ହେବ ଏବଂ ପର୍ଯ୍ୟାୟକ୍ରମେ ବ୍ୟାଙ୍କ, ଚିନିଶିଳ୍ପ ଓ ଅନ୍ୟ ସଂସ୍ଥାରେ ନିର୍ବାଚନ ହେବ। ଗତବର୍ଷ ମେ’ରୁ ସରକାରୀ ପରିଚାଳନାଧୀନ ହେବାର ୨ ବର୍ଷରେ ବ୍ରହ୍ମପୁର ଅର୍ବାନ ବ୍ୟାଙ୍କର ବ୍ୟବସାୟ ହ୍ରାସ ପାଇଛି। ବିସିସି ବ୍ୟାଙ୍କରେ ଶତାଧିକ କର୍ମଚାରୀ ପଦ ଖାଲି ପଡ଼ିଛି। ବ୍ରହ୍ମପୁର ଆଞ୍ଚଳିକ ବାଣିଜ୍ୟ ସମବାୟ ସଂସ୍ଥା ରୁଗ୍ଣ ହୋଇଯାଇଛି। ସମବାୟ ପାଇକାରୀ ଭଣ୍ଡାରକୁ ବନ୍ଦ କରି ଦିଆଯାଇଛି। ଏଭଳି ଅନେକ ସମସ୍ୟା ଉପୁଜିଛି। ଏଭଳି ସ୍ଥିତିରେ ସମବାୟ ନିର୍ବାଚନ କରାଯିବାର ସରକାରୀ ପଦକ୍ଷେପ ନିଆଯାଇଛି।
