କେନ୍ଦୁଝର,୨୪ା୧୨(ସ୍ବ.ପ୍ର.): କେନ୍ଦୁଝରଗଡ଼ ରେଳ ଷ୍ଟେଶନ ନିକଟରେ ବେଆଇନ ଭାବରେ ଗଚ୍ଛିତଥିବା ଲୁହାପଥର ଗୁଣ୍ଡର ପରିବହନକୁ ନେଇ ବିବାଦ ଦେଖାଯାଇଛି। ଓଡ଼ିଶା ଖଣି ନିଗମ(ଓଏମ୍ସି)ପକ୍ଷରୁ ହୋଇଥିବା ନିଲାମ ପରେ ଏକ ସଂସ୍ଥା ଶୁକ୍ରବାର ପରିବହନ ଆରମ୍ଭ କରିଥିଲା। ଉକ୍ତ ଲୁହାଗୁଣ୍ଡ ବହୁ ବର୍ଷ ଧରି ପଡ଼ି ରହିଥିବାରୁ ଜମିର ଉର୍ବରତା ନଷ୍ଟ ହୋଇଯାଇଛି। ଏନେଇ ଭଡ଼ା ଦାବିରେ ଜମି ମାଲିକ ପରିବହନ ବନ୍ଦ କରିବାକୁ ଉଦ୍ୟମ କରିବାରୁ ବିବାଦ ଦେଖାଦେଇଥିଲା। ଏହାକୁ ନେଇ ହାତାହାତି ପରିସ୍ଥିତି ଉପୁଜିବାରୁ ପୋଲିସ ଉପସ୍ଥିତିରେ ପରିବହନ କରାଯାଇଥିଲା।
ଯେ, ୨୦୦୪ ରେ ଉକ୍ତ ସ୍ଥାନରେ ଲୁହାପଥର ସାଇଡିଂ କରାଯାଇ ଲୁହାପଥର ପରିବହନ ହେଉଥିଲା। ଏହାକୁ ୨୦୦୮ରେ ବନ୍ଦ କରିଦିଆଯାଇଥିଲା। ଉକ୍ତ ସ୍ଥାନରେ ୧୨୭୪ ମେଟ୍ରିକ ଟନ୍ର ଲୁହାପଥର ଗୁଣ୍ଡ ମାସିକ ଭଡ଼ାରେ ରଖିବା ପାଇଁ ଜମି ମାଲିକଙ୍କ ସହିତ ବ୍ୟବସାୟୀ କଥା ହୋଇଥିଲେ। ଉକ୍ତ ବ୍ୟବସାୟୀ ଭାଜପାର ନେତା ହୋଇଥିବାରୁ ବିଶ୍ୱାସ କରି ଲୋକେ ମାସିକ ଭଡ଼ାରେ ସେହି ଜାଗା ଛାଡ଼ିଥିଲେ ବୋଲି ଜଣେ ଜମି ମାଲିକ ଚଗଲୁ ନାଏକ କହିଛନ୍ତି। ପାଖାପାଖି ୮ ଲୋକଙ୍କ ୫ ଏକର ଜମିରେ ଏହି ଲୁହାପଥର ଗୁଣ୍ଡ ଜମା ହୋଇଥିଲା। ପରବର୍ତ୍ତୀ ସମୟରେ ଲୁହାପଥର ଗୁଣ୍ଡକୁ ଖଣି ବିଭାଗ ଜବତ କରିଥିଲା। ଏହାର ଦାବିଦାର କେହି ନ ଆସିବାରୁ ନିୟମାନୁଯାୟୀ ଓଡ଼ିଶା ଖଣି ନିଗମ ନିଲାମ କରିଥିଲେ ବୋଲି ଖଣି ଉପନିର୍ଦ୍ଦେଶକ ସଲିଲ ବେହେରା କହିଛନ୍ତି। ନିଲାମ ଧରିଥିବା ସଂସ୍ଥା ଲୁହାପଥର ନେବାକୁ ଉଦ୍ୟମ କରିବା ବେଳେ ଜମି ମାଲିକମାନେ ଭଡ଼ା ଦାବି କରିଥିଲେ। ଫଳରେ ବିବାଦ ଉପୁଜିଥିଲା। ପରେ ପୋଲିସ ମୁତୟନ କରାଯାଇ ପରିବହନ ଚାଲିଥିବା ବେଳେ ନ୍ୟାୟ ପାଇଁ ଜମି ମାଲିକମାନେ ଥାନାର ଦ୍ୱାରସ୍ଥ ହୋଇଛନ୍ତି। ଏନେଇ ଟାଉନ ଥାନା ଅଧିକାରିଣୀ ପ୍ରମୋଦିନୀ ସାହୁ କହିଛନ୍ତି, ଉଭୟ ପକ୍ଷଙ୍କୁ ଡକାଯାଇଛି। ଆଲୋଚନା ଓ କାଗଜପତ୍ର ଯାଞ୍ଚ ପରେ ପଦକ୍ଷେପ ନିଆଯିବ।
