Advertisement

ବାକି ରହିଗଲେ ଅନେକ

ଭୁବନେଶ୍ବର,୧୭ା୧୦(ବ୍ୟୁରୋ): ଓଡ଼ିଶା ରାଜ୍ୟ ସରକାର ଶନିବାର ରାଜ୍ୟରୁ ଚୁକ୍ତିଭିତ୍ତିକ ନିଯୁକ୍ତି ବ୍ୟବସ୍ଥା ଉଚ୍ଛେଦ କରାଯାଇଥିବା ନେଇ ଘୋଷଣା କରିବା ପରେ ରବିବାର ଏନେଇ ବିଧିବଦ୍ଧ ବିଜ୍ଞପ୍ତି ପ୍ରକାଶ ପାଇଛି। ଏହାଦ୍ୱାରା ପ୍ରାୟ ୫୭ ହଜାର ଚୁକ୍ତିଭିତ୍ତିକ କର୍ମଚାରୀ ଯେଉଁମାନେ ୬ ବର୍ଷ ପୂର୍ବରୁ ଆଶାବାନ୍ଧି ବସିଥିଲେ ସେମାନେ ଏବେ ସ୍ଥାୟୀ ହେବେ। ଫଳରେ ଉକ୍ତ କର୍ମଚାରୀମାନଙ୍କ ମଧ୍ୟରେ ଖୁସିର ବାତାବରଣ ଦେଖିବାକୁ ମିଳିଛି। ହେଲେ ସରକାରଙ୍କ ଏଭଳି ନିଷ୍ପତ୍ତିରେ ଅନେକ କର୍ମଚାରୀ ନିରାଶ ହେବା ସାଙ୍ଗକୁ ଏବେ ଭାଙ୍ଗିପଡ଼ିଛନ୍ତି। ଏହାକୁ ଐତିହାସିକ ନିଷ୍ପତ୍ତି କୁହାଯାଉଥିଲେ ମଧ୍ୟ ଏହାଦ୍ୱାରା ରାଜ୍ୟର ସମସ୍ତ ପ୍ରକାର ଚୁକ୍ତିଭିତ୍ତିକ କର୍ମଚାରୀଙ୍କୁ ସାମିଲ କରାଯାଇନାହିଁ। କେବଳ ଯେଉଁମାନେ ଆଗକୁ ସ୍ଥାୟୀ ହୋଇଥାଆନ୍ତେ ସେମାନେ କିଛିଦିନ ପୂର୍ବରୁ ଏହି ସୁବିଧା ପାଇଯିବେ। ଯେଉଁ କର୍ମଚାରୀମାନେ ଦୀର୍ଘବର୍ଷ ହେଲା (ପ୍ରାୟ ୧୦ରୁ ୨୫ ବର୍ଷ) ସରକାରଙ୍କ ପାଇଁ ଅସ୍ଥାୟୀ ଭାବେ ବିଭିନ୍ନ ଯୋଜନା ଲାଗି କାର୍ଯ୍ୟ କରିଆସୁଛନ୍ତି ସେମାନଙ୍କୁ ଏକ ପ୍ରକାର ଅଣଦେଖା କରାଯାଇଛି। କେବଳ ସେତିକି ନୁହେଁ ଆଉଟ ସୋର୍ସିଂ ମାଧ୍ୟମରେ ସରକାରଙ୍କ ଏକାଧିକ କାର୍ଯ୍ୟ କରୁଥିବା ରାଜ୍ୟର ଲକ୍ଷାଧିକ କର୍ମଚାରୀ ମଧ୍ୟ ଏଭଳି ନିଷ୍ପତ୍ତିରେ ନିରାଶ ହୋଇଛନ୍ତି।
ନଗର ଉନ୍ନୟନ ବିଭାଗ ଅଧୀନରେ କାର୍ଯ୍ୟ କରୁଥିବା ଜଣେ ଆଉଟସୋର୍ସିଂ କର୍ମଚାରୀ ନିଜ ନାମ ଗୋପନ ରଖିବା ସର୍ତ୍ତରେ କହିଛନ୍ତି, ଲୋକସେବା ଭବନଠାରୁ ଆରମ୍ଭକରି ଜିଲା ଏବଂ ବ୍ଲକସ୍ତର ପର୍ଯ୍ୟନ୍ତ ଅନୁଧ୍ୟାନ କଲେ ଦେଖିବେ ସବୁଠି ଆଉଟସୋର୍ସିଂ ପିଲାମାନେ ହିଁ କାର୍ଯ୍ୟ କରୁଛନ୍ତି। କେନ୍ଦ୍ର ଓ ରାଜ୍ୟ ସରକାରଙ୍କ ସହଭାଗିତାରେ କାର୍ଯ୍ୟକାରୀ ହେଉଥିବା ପ୍ରାୟ ସମସ୍ତ ଯୋଜନାରେ ଆଉଟସୋର୍ସିଂ ପିଲାମାନେ କାମ କରୁଛନ୍ତି। କେନ୍ଦ୍ର ସରକାରଙ୍କ ଗାଇଡ୍‌ଲାଇନ ଅନୁଯାୟୀ ଏହି ଯୋଜନାଗୁଡ଼ିକ ଲାଗି ରାଜ୍ୟ ସରକାର ଏକ ପିଏମ୍‌ୟୁ(ପ୍ରୋଜେକ୍ଟ ମ୍ୟାନେଜମେଣ୍ଟ ୟୁନିଟ୍‌) ଗଠନ କରିବେ। ଏଥିରେ ଚୁକ୍ତିଭିତ୍ତିକ କର୍ମଚାରୀଙ୍କୁ ନିଯୁକ୍ତି ଦେବେ, ଯେଉଁମାନେ ଯୋଜନାଗୁଡ଼ିକ କିପରି ଠିକ୍‌ଭାବେ କାର୍ଯ୍ୟକାରୀ ହେବ ସେଥିପାଇଁ କାମ କରିବେ। ହେଲେ ସରକାର ଜାଣିଶୁଣି ପିଲାଙ୍କୁ ଠିକାରେ ନିଯୁକ୍ତି ଦେବା ପରିବର୍ତ୍ତେ ଆଉଟସୋର୍ସିଂ ସଂସ୍ଥା ହାତରେ ଏହି ଦାୟିତ୍ୱ ଧରାଇ ଦେଇଛନ୍ତି। ଏହିଭଳି ବିଭିନ୍ନ ଯୋଜନାର କାର୍ଯ୍ୟ ଆଉଟସୋର୍ସିଂ ଜରିଆରେ ପ୍ରାୟ ୧୦ ବର୍ଷରୁ ଅଧିକ ଦିନ ହେଲା କର୍ମଚାରୀମାନେ କରୁଛନ୍ତି। ଏହି କର୍ମଚାରୀମାନେ ସରକାରୀ କାର୍ଯ୍ୟ ପାଇଁ ଦୀର୍ଘ ସମୟ ଦିନକୁ ଦେଉଛନ୍ତି। ହେଲେ ସରକାର ଯେଉଁମାନଙ୍କୁ ସ୍ଥାୟୀ ନିଯୁକ୍ତି ଦେଉଛନ୍ତି ସେମାନେ କ’ଣ କାମ କରୁଛନ୍ତି ସେକଥା ଅଫିସ୍‌କୁ ଗଲେ ଜଣାପଡ଼ିଯିବ। ଏହି ଆଉଟସୋର୍ସିଂ ଜରିଆରେ କାର୍ଯ୍ୟ କରୁଥିବା ଅନେକ କର୍ମଚାରୀଙ୍କ ଯୁବା ବୟସ ମଧ୍ୟ ଚାଲିଗଲାଣି। ଫଳରେ ଉକ୍ତ କର୍ମଚାରୀମାନଙ୍କ ଭବିଷ୍ୟତ ପ୍ରତି ପ୍ରଶ୍ନବାଚୀ ସୃଷ୍ଟି ହୋଇଛି। ଯଦି ସରକାର କହୁଛନ୍ତି ରାଜ୍ୟରେ ଆର୍ଥିକ ସ୍ଥିତିରେ ସୁଧାର ଆସିଛି ତେବେ ଯେଉଁମାନେ ପାଖାପାଖି ୨୦ ବର୍ଷ ହେବ ଠିକା କର୍ମଚାରୀ ଭାବେ କାର୍ଯ୍ୟ କଲେଣି ସେମାନଙ୍କ ନିମନ୍ତେ ସ୍ଥାୟୀ ନିଯୁକ୍ତି ସମ୍ପର୍କିତ ଘୋଷଣା କାହିଁକି କଲେନାହିଁ ବୋଲି ସେ କହିଛନ୍ତି।
ସେହିପରି ରାଜ୍ୟରେ ଡିଏଲ୍‌ଆର ଏବଂ ଏନ୍‌ଏମ୍‌ଆର୍‌ ଭାବେ ୧୯୯୬ ମସିହାରୁ ବହୁ କର୍ମଚାରୀ କାମ କରିଆସୁଛନ୍ତି। ସେମାନଙ୍କ ଚାକିରି ସ୍ଥାୟୀ ହେବା ନେଇ ୧୯ ମେ ୧୯୯୭ ମସିହାରେ ରାଜ୍ୟ ସରକାରଙ୍କ ଅର୍ବାନ ବିଭାଗ ପକ୍ଷରୁ ଏକ ଚିଠି ପ୍ରକାଶ ପାଇଥିଲା। ଯେଉଁମାନଙ୍କ ଚାକିରି ୧୦ ବର୍ଷ ହୋଇଥିବ ସେମାନେ ସ୍ଥାୟୀ ହେବେ ବୋଲି ସେଥିରେ ଉଲ୍ଲେଖ ଥିଲା। ହେଲେ ଉକ୍ତ ନିର୍ଦ୍ଦେଶ ଏ ପର୍ଯ୍ୟନ୍ତ କାର୍ଯ୍ୟକାରୀ ହୋଇପାରିଲା ନାହିଁ। ରାଜ୍ୟରେ ଡିଏଲ୍‌ଆର ଏବଂ ଏନ୍‌ଏମ୍‌ଆର୍‌ ଭାବେ ମୋଟ ୩୮୦୦ କର୍ମଚାରୀ କାମ କରୁଛନ୍ତି। ତେବେ ପୌର ଅସ୍ଥାୟୀ କର୍ମଚାରୀ ମହାସଂଘ ସାଧାରଣ ସମ୍ପାଦକ ରଶ୍ମୀ ରଞ୍ଜନ ଗୁରୁ କହିଛନ୍ତି, ସରକାର ମନଇଚ୍ଛା ୬ ବର୍ଷ ଠିକା କର୍ମଚାରୀଙ୍କୁ ସ୍ଥାୟୀ ନିଯୁକ୍ତି ଦେଲେ କିନ୍ତୁ ୨୫ ବର୍ଷ ହେଲା ସେମାନେ କାମ କରିବା ସତ୍ତ୍ୱେ ତାଙ୍କ କଥା ଚିନ୍ତା କଲେ ନାହିଁ। ସେମାନଙ୍କ ମଧ୍ୟରୁ ଅଧିକାଂଶ ଅଳ୍ପ କିଛିଦିନ ମଧ୍ୟରେ ଅବସର ନେବେ। ସେମାନଙ୍କ ପରିବାର ଆଗକୁ କେମିତି ଚଳିବେ ସେନେଇ ସେମାନେ ପ୍ରଶ୍ନ ଉଠାଇଛନ୍ତି। ରାତି, ଦିନ ଏକ କରି ସରକାରଙ୍କ ପାଇଁ କାମ କରିବା ସତ୍ତ୍ୱେ କାହିଁକି ସେମାନଙ୍କ କଥାକୁ ସରକାର ଗୁରୁତ୍ୱ ଦେଉନାହାନ୍ତି ବୋଲି ଗୁରୁ ପ୍ରଶ୍ନ କରିଛନ୍ତି।
ସେହିପରି ଏନ୍‌୍‌୍‌ଆର୍‌ଏଚ୍‌ଏମ୍‌(ନ୍ୟାଶନାଲ ରୁରାଲ ହେଲ୍‌ଥ ମିଶନ), ସର୍ବଶିକ୍ଷା ଅଭିଯାନ ଏବଂ ଏମ୍‌ଜିଏନ୍‌ଆର୍‌ଇଜିଏସ୍‌ ଯୋଜନାକୁ କାର୍ଯ୍ୟକାରୀ କରିବାକୁ ଯେଉଁମାନଙ୍କୁ ରାଜ୍ୟ ସରକାର ଠିକା ନିଯୁକ୍ତି ଦେଇଛନ୍ତି ପ୍ରତିବର୍ଷ ସେମାନଙ୍କ କାର୍ଯ୍ୟକାଳ ରିନ୍ୟୁ କରାଯାଉଛି। ଏହି ଯୋଜନାଗୁଡ଼ିକ ଦୀର୍ଘବର୍ଷ ହେଲା ଆରମ୍ଭ ହୋଇଥିବା ବେଳେ ଆଗକୁ ମଧ୍ୟ ଏହି ଯୋଜନା ଚାଲିବ। ହେଲେ ସରକାର ସେଥିରେ କାର୍ଯ୍ୟ କରୁଥିବା କର୍ମଚାରୀଙ୍କ ପାଇଁ ମଧ୍ୟ କିଛି ନିଷ୍ପତ୍ତି ନେଇନାହାନ୍ତି। ଏହିଭଳି କାର୍ଯ୍ୟ କରୁଥିବା କର୍ମଚାରୀଙ୍କ ସଂଖ୍ୟା ମଧ୍ୟ ରାଜ୍ୟରେ ପ୍ରାୟ ୪୦ ହଜାରରୁ ଅଧିକ ହେବ। ତେବେ ସରକାରଙ୍କ ଏହି ନିଷ୍ପତ୍ତିକୁ ବିରୋଧୀ ଏବଂ ପୂର୍ବତନ ପ୍ରଶାସନିକ ଅଧିକାରୀମାନେ କଡ଼ା ଭାଷାରେ ସମାଲୋଚନା କରିଛନ୍ତି। ସେହିପରି ରାଜ୍ୟରେ ଶତାଧିକ ସଂଖ୍ୟାରେ ଗ୍ରାମରକ୍ଷୀ, ହୋମ୍‌ଗାର୍ଡ, ଜିଆର୍‌ଏସ୍‌ ଏବଂ ବ୍ଲକଗ୍ରାଣ୍ଟ ଶିକ୍ଷକ କାର୍ଯ୍ୟ କରୁଛନ୍ତି। ସେମାନଙ୍କ କଥାକୁ ମଧ୍ୟ ସରକାର ଧ୍ୟାନ ଦେଇନାହାନ୍ତି।
ପୂର୍ବତନ ମୁଖ୍ୟ ଶାସନ ସଚିବ ସହଦେବ ସାହୁ କହିଛନ୍ତି, ସରକାରଙ୍କ ଏହି ନିଷ୍ପତ୍ତି ଦ୍ୱାରା ବହୁ ଯୁବକଙ୍କ ଭବିଷ୍ୟତ ଅନ୍ଧାରକୁ ଚାଲିଯାଇଛି। ସରକାର ଯଦି ଚୁକ୍ତିଭିତ୍ତିକ ନିଯୁକ୍ତି ଉଚ୍ଛେଦ କଲେ ତେବେ ସରକାରଙ୍କ ପାଇଁ କାର୍ଯ୍ୟ କରୁଥିବା ସମସ୍ତଙ୍କ ଲାଗି ଚିନ୍ତା କରିବାର ଆବଶ୍ୟକତା ଥିଲା। ଏଭଳି କରି ସରକାର ଏକପାଖିଆ ନିଷତ୍ତି ନେଇଛନ୍ତି ବୋଲି ସେ କହିଛନ୍ତି। ଏସବୁ ସତ୍ତ୍ୱେ ଭୁବନେଶ୍ୱର ସ୍ଥିତ ଜଣେ ବରିଷ୍ଠ ଖବରଦାତା କହିଛନ୍ତି, ଠିକା କର୍ମଚାରୀମାନେ ସ୍ଥାୟୀ ହୋଇଗଲେ ସେମାନଙ୍କ ପୂର୍ବ ଦକ୍ଷତା ବାଧାପ୍ରାପ୍ତ ହେବ ଏବଂ ସରକାରୀ ସେବାରେ ତା’ର କୁପ୍ରଭାବ ପଡ଼ିବ।


Enter your email to get our daily news in your inbox.

All Right Reserved By Dharitri.Com

ଅଣସର ଦର୍ଶନ ୧୧ ଦିନରେ: ନଟବର ବେଶରେ ଦର୍ଶନ ଦେଲେ ମହାପ୍ରଭୁ

ବ୍ରହ୍ମଗିରି, ୩୦ା୬(ଡି.ଏନ୍‌.ଏ.): ଦେବ ସ୍ନାନ ପୂର୍ଣ୍ଣମୀରେ ଶ୍ରୀଜୀଉମାନେ ମହାସ୍ନାନ ପରେ ଅଣସର ପିଣ୍ଡିରେ ଗୁପ୍ତ ସେବା ପାଉଛନ୍ତି। ଏପଟେ ମହାପ୍ରଭୁ ଅଲାରନାଥଙ୍କ ନିକଟରେ ଚାଲିଛି ଅଣସର...

ଶିଶୁଙ୍କୁ ମିଳିଲା ପୋକ ସାଲୁବାଲୁ ଛତୁଆ

ଆଳି,୧୩।୭(ଡି.ଏନ.ଏ.): ରାଜ୍ୟ ସରକାର ୬ ମାସରୁ ୩ ବର୍ଷ ପର୍ଯ୍ୟନ୍ତ ଶିଶୁମାନଙ୍କ ସ୍ବାସ୍ଥ୍ୟ ଗଠନରେ ସହାୟକ ହେବା ନିମନ୍ତେ ପୁଷ୍ଟିକର ଛତୁଆ ଯୋଗାଇ ଦେଉଛନ୍ତି। ଏହି...

୭ ଜିଲାରେ ଘନକୁହୁଡ଼ି: ୧୫ ଡିଗ୍ରୀ ତଳେ ୧୪ ସହର

ଭୁବନେଶ୍ୱର,୧୭ା୧(ବ୍ୟୁରୋ): ରାଜ୍ୟରେ ସାମାନ୍ୟ ଶୀତ ବଢିଛି। ୧୪ଟି ସ୍ଥାନରେ ସର୍ବନିମ୍ନ ତାପମାତ୍ରା ୧୫ ଡିଗ୍ରୀ ତଳେ ରହିଛି। ଆଞ୍ଚଳିକ ପାଣିପାଗ କାର୍ଯ୍ୟାଳୟ ସୂତ୍ରରୁ ମିଳିଥିବା ସୂଚନା...

ଚାଲିଛି ବିଦ୍ୟୁତ ମରାମତି : ରେଳ ଚଳାଚଳ ବନ୍ଦ

ନିରାକାରପୁର,୯ା୬(ଡି.ଏନ୍‌.ଏ.) : ଖୋର୍ଦ୍ଧା ରେଳ ଡିଭିଜନ ଅଧୀନରେ ଥିବା କାଇପଦର ଷ୍ଟେଶନ ନିକଟରେ ୩୨ କେଭି ବିଦ୍ୟୁତ ମରାମତି କାର୍ଯ୍ୟ ଚାଲିଥିବାରୁ ରବିବାର ପୁରୀ-ଗୁଣପୁର ପାସେଞ୍ଜର,ଭୁବନେଶ୍ୱର-ବ୍ରହ୍ମପୁରପାସେଞ୍ଜର,ଭୁବନେଶ୍ୱର-ବିଶାଖାପାଟଣା...

ଶିତଳାପଲିରେ କୋଭିଡ ହସ୍ପିଟାଲ କାର୍ଯ୍ୟକ୍ଷମ ନେଇ ଗଞ୍ଜାମ ପ୍ରଶାସନକୁ ପ୍ରଶଂସା କଲେ ମୁଖ୍ୟମନ୍ତ୍ରୀ

ଛତ୍ରପୁର, ୧୧।୪(ଡି.ଏନ୍‌.ଏ.): ଗଞ୍ଜାମ ଜିଲା ଶିତଳାପଲିଠାରେ ଥିବା ଟାଟା ହସ୍ପିଟାଲକୁ କୋଭିଡ ହସ୍ପିଟାଲରେ ପରିଣତ କରାଯାଇଛି। ଗତ ଶୁକ୍ରବାରଠାରୁ ଏହା କାର୍ଯ୍ୟକ୍ଷମ ହୋଇଛି। ଏ ନେଇ...

ରଜସଂକ୍ରାନ୍ତିରେ ମା’ ମଙ୍ଗଳାଙ୍କ ପୀଠ ଉତ୍ସବମୁଖର

କାକଟପୁର,୧୫ା୬(ଡି.ଏନ୍‌.ଏ.) : ପୁରୀ ଜିଲା କାକଟପୁର ମା’ ମଙ୍ଗଳାଙ୍କ ପୀଠ ରଜସଂକ୍ରାନ୍ତି ଅବସରରେ ଉତ୍ସବ ମୁଖର ହୋଇଉଠିଛି। ବିଶେଷକରି ଝିଅବୋହୂମାନେ ନୂଆ ବସ୍ତ୍ର ପିନ୍ଧି ମା’ଙ୍କ...

ଆଜି ଖୋର୍ଦ୍ଧାକୁ ଟପିଲା କଟକ, ରେକର୍ଡ ସଂଖ୍ୟକ କରୋନା ଆକ୍ରାନ୍ତ ଚିହ୍ନଟ

ଭୁବନେଶ୍ୱର,୨୪ା୮(ବ୍ୟୁରୋ): ରାଜ୍ୟରେ ଦିନକୁ ଦିନ କରୋନା ଆକ୍ରାନ୍ତଙ୍କ ସଂଖ୍ୟା ବଢ଼ିବଢ଼ି ଚାଲିଛି। କିଛିଦିନ ଧରି ଗଞ୍ଜାମରେ ସର୍ବାଧିକ ଆକ୍ରାନ୍ତ ଚିହ୍ନଟ ହେଉଥିବା ବେଳେ ଖୋର୍ଦ୍ଧା ଦ୍ୱିତୀୟ...

ଅରୁଣା ମହାନ୍ତି ସଙ୍ଗୀତ ନାଟକ ଏକାଡେମୀ ସଭାପତି

ଭୁବନେଶ୍ୱର,୨୧ା୫(ବ୍ୟୁରୋ): ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ଅଧୀନରେ କାର୍ଯ୍ୟରତ ବିଭିନ୍ନ ଏକାଡେମୀ ପାଇଁ ଗୁରୁବାର ନୂତନ ସଭାପତି, ଉପସଭାପତି ଓ ସଚିବଙ୍କୁ ମନୋନୀତ...

Advertisement
Archives

Model This Week