ନୂଆଦିଲ୍ଲୀ,୨୮ ।୮: କଂଗ୍ରେସର କାର୍ଯ୍ୟକାରିଣୀ ବୈଠକ(ସିଡବ୍ଲୁସି) ରବିବାର ବସିବ । ଏହି ବୈଠକରେ ପାର୍ଟି ଅଧ୍ୟକ୍ଷ ନିର୍ବାଚନ ସହ ଜଡିତ କାର୍ଯ୍ୟକ୍ରମକୁ ମଞ୍ଜୁରି ମିଳିବ । ଏହାସହ ରାହୁଲ ଗାନ୍ଧୀ କଂଗ୍ରେସ ଅଧ୍ୟକ୍ଷ ପଦ ସମ୍ଭାଳିବେ କି ନାହିଁ ସେ ନେଇ ବି ଚର୍ଚ୍ଚା ହେବ । ଗୁଲାମ ନବି ଆଜାଦଙ୍କ ଇସ୍ତଫା ପରେ ଏହି ବୈଠକ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବୋଲି କୁହାଯାଉଛି ।
ମିଳିଥିବା ବିଶେଷ ସୂଚନା ଅନୁଯାୟୀ, ଅନଲାଇନ ବୈଠକରେ ଅଧ୍ୟକ୍ଷ ନିର୍ବାଚନର ବିସ୍ତୃତ କାର୍ଯ୍ୟକ୍ରମକୁ ସ୍ୱୀକୃତି ଦେବା ସହ ସୋନିଆ ଗାନ୍ଧୀ ଓ ରାହଲ ଗାନ୍ଧୀଙ୍କ ନେତୃତ୍ୱରେ ବିଶ୍ୱାସ ପ୍ରକଟ କରାଯିବ । କଂଗ୍ରେସର ସୂଚନା ଅନୁଯାୟୀ, ଅଧ୍ୟକ୍ଷ ନିର୍ବାଚନ ପ୍ରକ୍ରିୟାରେ କିଛି ସପ୍ତାହ ବିଳମ୍ବ ହୋଇପାରେ । କୁହାଯାଇଛି କି ଦଳର ଅଧ୍ୟକ୍ଷ ଏବେ ‘ଭାରତ ଯୋଡୋ ଯାତ୍ରା’କୁ ନେଇ ବ୍ୟସ୍ତ ଅଛନ୍ତି, କଛି ରାଜ୍ୟରେ ଦଳର ଔପଚାରିକତା ପୂରଣ ହୋଇ ପାରି ନାହିଁ ।
ସୂଚନାଯୋଗ୍ୟ, ଗତବର୍ଷ ହୋଇଥିବା ସିଡବ୍ଲୁସି ଯେଉଁ କାର୍ଯ୍ୟକ୍ରମକୁ ମଞ୍ଜୁରୀ ଦେଇଥିଲା, ସେହି ହିସାବରେ ଅଧ୍ୟକ୍ଷ ନିର୍ବାଚନ ପ୍ରକ୍ରିୟା ୨୧ ଅଗଷ୍ଟରୁ ୨୦ ସେପ୍ଟେମ୍ବର ମଧ୍ୟରେ ଶେଷ ହେବାର ଥିଲା । ସିଡବ୍ଲୁସି ଗତବର୍ଷ ନିଷ୍ପତ୍ତି ନେଇଥିଲା କି ବ୍ଲକ କମିଟି ପାଇଁ ୧୬ ଏପ୍ରିଲରୁ ୩୧ ମେ ମଧ୍ୟରେ ନିର୍ବାଚନ ହେବ । ସେହିପରି ଜିଲା କମିଟି ଅଧ୍ୟକ୍ଷ ନିର୍ବାଚନ ୧ ଜୁନରୁ ୨୦ ଜୁଲାଇ ମଧ୍ୟରେ କରାଯିବ ।
ସୂଚନାଯୋଗ୍ୟ, ରବିବାର ଅନୁଷ୍ଠିତ ସିଡବ୍ଲୁସି ବୈଠକରେ ସୋନିଆ ଗାନ୍ଧୀ, ରାହୁଲ ଗାନ୍ଧୀ ଓ ପ୍ରିୟଙ୍କା ଗାନ୍ଧୀ ଭଦ୍ରା ଅନଲାଇନରେ ଯୋଗଦେବେ । କାରଣ ସୋନିଆ ଚିକିତ୍ସା ଲାଗି ବିଦେଶ ଯାଇଥିବା ବେଳେ ରାହୁଲ ଓ ପ୍ରିୟଙ୍କା ତାଙ୍କ ସହ ବିଦେଶରେ ଅଛନ୍ତି ।
