ଇନ୍ଦୋର,୨୮।୧୧(ପି.ଟି.): ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲଟ୍ ଏବଂ ପୂର୍ବତନ ଉପମୁଖ୍ୟମନ୍ତ୍ରୀ ସଚିନ ପାଇଲଟ୍ଙ୍କ ମଧ୍ୟରେ କ୍ଷମତା କନ୍ଦଳ ଲାଗିରହିଥିବାବେଳେ ସଂଗଠନକୁ ସୁଦୃଢ଼ କରିବା ଲାଗି ଆବଶ୍ୟକ ହେଲେ କଠୋର ନିଷ୍ପତ୍ତି ନେବାରୁ କଂଗ୍ରେସ ପଛାଇବ ନାହିଁ ବୋଲି ବରିଷ୍ଠ ନେତା ଜୟରାମ ରମେଶ ରବିବାର କହିଛନ୍ତି। ରାଜସ୍ଥାନରେ କଂଗ୍ରେସ ପାଇଁ ସଂଗଠନ ସବୁଠୁ ଗୁରୁତ୍ୱପୂର୍ଣ୍ଣ ବୋଲି ଇନ୍ଦୋରରେ ଭାରତ ଯୋଡ଼ୋ ଯାତ୍ରା ଅବସରରେ ଦଳର ସାଧାରଣ ସମ୍ପାଦକ ରମେଶ କହିଛନ୍ତି। ସୂଚନାଯୋଗ୍ୟ, ପାଇଲଟ୍ ଜଣେ ଗଦ୍ଦାର ଏବଂ ତାଙ୍କୁ କଦାପି ମୁଖ୍ୟମନ୍ତ୍ରୀ କରାଇ ଦିଆଯିବ ନାହିଁ ବୋଲି ଗେହଲଟ୍ ଗତ ଗୁରୁବାର ଏକ ଟିଭି ଚ୍ୟାନେଲ୍କୁ କହିଥିଲେ। ଏହାକୁ ନେଇ ପାଇଲଟ୍ ତୀବ୍ର ପ୍ରତିକ୍ରିୟା ପ୍ରକାଶ କରିଥିଲେ। ତେବେ ପରସ୍ପରକୁ କାଦୁଅଫିଙ୍ଗାରୁ କୌଣସି ଫାଇଦା ମିଳିବ ନାହିଁ। ଆସନ୍ତା ମାସରେ ରାହୁଲ ଗାନ୍ଧୀଙ୍କ ଭାରତ ଯୋଡ଼ୋ ଯାତ୍ରା ରାଜସ୍ଥାନରେ ପ୍ରବେଶ କରିବାକୁ ଥିବାବେଳେ ଦୁଇ ନେତାଙ୍କ ମଧ୍ୟରେ ଫାଟ ବଢ଼ିବାରେ ଲାଗିଛି। ରାଜସ୍ଥାନ ଘଟଣାରେ ସଂଗଠନକୁ ସୁଦୃଢ଼ କରିବା ଭଳି ସମାଧାନ ପଦକ୍ଷେପ ନିଆଯିବ ବୋଲି ରମେଶ ଗଣମାଧ୍ୟମକୁ କହିଛନ୍ତି। ଏଥିପାଇଁ କଠୋର ନିଷ୍ପତ୍ତି ନେବାକୁ ପଡ଼ିଲେ ବି ଦଳ ପଛାଇବ ନାହିଁ ବୋଲି ସେ କହିଛନ୍ତି।
