ନୂଆଦିଲ୍ଲୀ,୩୦ ।୯: କଂଗ୍ରେସ ଅଧ୍ୟକ୍ଷ ପଦ ରେସରେ ବରିଷ୍ଠ ନେତା ମଲ୍ଲିକାର୍ଜୁନ ଖଡଗେ ବି ସାମିଲ ହୋଇପାରନ୍ତି ବୋଲି ଜଣାପଡିଛି । ଏହା ଜଣାପଡିବା ପରେ ଏବେ କଂଗ୍ରେସ ଅଧ୍ୟକ୍ଷ ପଦ ନିର୍ବାଚନ ଆହୁରି ରୋମାଞ୍ଚକର ପରିସ୍ଥିତିରେ ପହଞ୍ଚିଛି । ଦଳର ଜଣେ ବରିଷ୍ଠ ନେତା ବିଶେଷ ସୂତ୍ରର ସୂଚନା ଅନୁଯାୟୀ ମଲ୍ଲିକାର୍ଜୁନ ଏହି ନିର୍ବାଚନ ଲଢି ପାରନ୍ତି ବୋଲି ସୂଚନା ଦେଇଥିଲେ ।
ଗାନ୍ଧୀ ପରିବାରରୁ ସମର୍ଥନ ମିଳିବା ପରେ ମଲ୍ଲିକାର୍ଜୁନ ଶୁକ୍ରବାର ଅର୍ଥାତ୍ ୩୦ ସେପ୍ଟେମ୍ବରରେ ଅଧ୍ୟକ୍ଷ ପଦ ପାଇଁ ପ୍ରାର୍ଥିପତ୍ର ଦାଖଲ କରିପାରନ୍ତି । ମଧ୍ୟପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ଦିଗବିଜୟ ସିଂ ଓ କଂଗ୍ରେସ ଏମ୍ପି ଶଶି ଥରୁର ବି ଶୁକ୍ରବାର ସେମାନଙ୍କ ପ୍ରାର୍ଥିପତ୍ର ଦାଖଲ କରିବେ ।
ଶଶି ଥରୁର ଓ ଦିଗବିଜୟ ସିଂଙ୍କ ପରେ କଂଗ୍ରେସର ଅସନ୍ତୁଷ୍ଟ ନେତାମାନଙ୍କ ଜି-୨୩ ଗ୍ରୁପର ଗୁରୁବାର ଏକ ବୈଠକ ଅନୁଷ୍ଠିତ ହୋଇଯାଇଛି । ଏହା ଆନନ୍ଦ ଶର୍ମାଙ୍କ ଘରେ ଅନୁଷ୍ଠିତ ହୋଇଥିଲା । ଏହି ବୈଠକରେ ମନିଷ ତିୱାରୀ, ପୃଥ୍ୱିରାଜ ଚୌହାନ, ଭୁପେନ୍ଦ୍ର ହୁଡ୍ଡା ସମେତ ପ୍ରାୟ ସମସ୍ତ ନେତା ସାମିଲ ହୋଇଥିଲେ । ମିଳିଥିବା ସୂଚନା ଅନୁଯାୟୀ, ଜି-୨୩ ଗ୍ରୁପର ବି କେତେଜଣ ନେତା କଂଗ୍ରେସ ଅଧ୍ୟକ୍ଷ ପଦ ନିର୍ବାଚନ ପାଇଁ ପ୍ରାର୍ଥିପତ ଦାଖଲ କରିପାରନ୍ତି । ଶୁକ୍ରବାର ଜି-୨୩ ଗ୍ରୁପର ଆଉ ଏକ ବୈଠକ ଅନୁଷ୍ଠିତ ହେବ ।
