ନୂଆଦିଲ୍ଲୀ,୧୪ ।୨: ଜମ୍ମୁ-କଶ୍ମୀର ପୁଲୱାମାରେ ଦୁଇ ବର୍ଷ ତଳେ ଆତଙ୍କବାଦୀ ଆକ୍ରମଣରେ ଶହୀଦ ହୋଇଥିବା ସିଆର୍ପିଏଫ୍ ଯବାନଙ୍କୁ ଶ୍ରଦ୍ଧାଞ୍ଜଳି ଦେଇଛି କଂଗ୍ରେସ । ଏହି ଅବସରରେ କଂଗ୍ରେସର ବରିଷ୍ଠ ନେତା ତଥା ପୂର୍ବତନ ପ୍ରତିରକ୍ଷାମନ୍ତ୍ରୀ ଏ କେ ଆଣ୍ଟୋନି କେନ୍ଦ୍ର ସରକାରଙ୍କୁ ଦୋଷାରୋପ କରି କହିଛନ୍ତି ପାକିସ୍ତାନ ଓ ଚାଇନା ସୀମାରେ ଯୁଦ୍ଧ ଭଳି ପରିସ୍ଥିତି ଉପୁଜିଲାଣି । ହେଲେ ଏପଟେ ମୋଦି ସରକାର ସେନାଙ୍କ ମନୋବଳ ଭାଙ୍ଗି ଦେଉଛନ୍ତି । ତେଣୁ ଦୁଃଖ ଲାଗୁଛି ଯେ ମୋଦି ସରକାର ଦେଶର ସୁରକ୍ଷାକୁ ପ୍ରାଥମିକତା ଦେଉ ନାହାନ୍ତି । ଏହା ପ୍ରଥମଥର ଲାଗି ଲକ୍ଷ୍ୟ କରାଯାଇଛି କି ଏକାଥରେ ଦୁଇଟି ସୀମାରେ ଯୁଦ୍ଧ ପରିସ୍ଥିତି ଉପୁଜିଛି । ସେନା ୨୪ ଘଣ୍ଟା ସୀମାରେ ପ୍ରହରି ଭଳି ଜଗି ରହିଥିଲେ ବି ମୋଦି ସରକାର ଯେମିତି ସେମାନଙ୍କ ଆଡକୁ ଲକ୍ଷ୍ୟ କରୁ ନାହାନ୍ତି । କାରଣ ଗୋଟିଏ ପଟେ ପାକିସ୍ତାନ ଆମ ଦେଶକୁ ଆତଙ୍କବାଦୀଙ୍କୁ ପ୍ରବେଶ କରାଉଥିବା ବେଳେ ଅନ୍ୟପଟେ ଚାଇନା ଜଳପଥରେ ବି ଆକ୍ରମଣ ଯୋଜନା କରି ଚାଲିଛି ।
